Փաստ ինֆո

ՀԱԿ նախկին ակտիվիստ Տիգրան Առաքելյանն ահազանգում է՝ ՀՀ քննչական կոմիտեում իրեն խոշտանգելու մասին, որին, ըստ Առաքելյանի, ներկա է եղել նաև ՔԿ նախագահ Արգիշտի Քյարամյանը։ Հրապարակված տեսանյութով Տիգրան Առաքելյանը պատմում է, որ իր բնակարանում խուզարկություն է իրականացվել, խուզարկությունը դեռ չավարտված իրեն տարել են ՔԿ Երևանի քննչական վարչություն , որտեղ իր նկատմամբ շատ վատ վերաբերմունք է եղել։

«Ինձ պահեցին մոտավորապես 11 ժամ, դրանից մոտ 8-9 ժամը եղել եմ ձեռնաշղթաներով` ձեռքերս հետեւում, ենթարկվել եմ ծեծի, հայհոյանքների, ենթարկվել եմ շանտաժի, սպառնալիքների, ինձ ասել են, որ կնոջդ եւ երեխայիդ դու այլեւս չես տեսնելու, մեքենան տակը կգցի, ձեր տունը պաժառ կընկնի գիշերը, ինչ-որ բան կպատահի ընտանիքիդ, որովհետեւ ձեզ ընտանիքով ենք վերացնելու: Ասողը եղել է ոչ ավել, ոչ պակաս, Քննչական կոմիտեի նախագահ Արգիշտի Քյարամյանը: Նա այդ օրը ինձ հետ հանդիպել է երկու անգամ: Երկու հանդիպումների ժամանակ էլ ես խոշտանգվել եմ: Խոշտանգվել եմ էլեկտրաշոկով, ջուրը լցրել են վրաս եւ էլեկտրաշոկով մարմնի տարբեր հատվածներում սկսել են վառել: Այնպիսի հարվածներ չեն հասցրել, որ կապտուկ առաջացնեն, բայց էլեկտրաշոկով կտտանքների են ենթարկել»,- պատմում է Առաքելյանը՝ ցույց տալով ձեռքերի կապտուկները։

ՀՀ քննչական կոմիտեի մամուլի քարտուղար Գոռ Աբրահամյանը «Փաստինֆո»-ի հետ զրույցում, անդրադառնալով խոշտանգման մասին հայտարարություններին, դրանք գնահատեց որպես անհիմն և օդից կախված։ Աբրահամյանի խոսքով՝ դրա համար կա իրավական ընթացակարգ՝ հանցագործության մասին հաղորդում ներկայացնելու վերաբերյալ, և, եթե անձի նկատմամբ կատարվել է խոշտանգում, նրան ոչինչ չի կաշկանդում այդ ընթացակարգից օգտվել։ Ինչ վերաբերում է Առաքելյանի նկատմամբ հետապնդմանը, ապա ՔԿ-ից հայտնեցին, որ Տիգրան Առաքելյանը հունիսի 17-ին ձերբակալվել էր դատարան ներկայացվելու նպատակով՝ ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում քննվող քրեական վարույթի շրջանակում։ Նրա նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 258-րդ հոդվածի 2-րդ մասի 8-րդ եւ 10-րդ կետերով (շորթումը, որը կատարվել է՝ մի խումբ անձանց կողմից նախնական համաձայնությամբ՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով) և 46-490-րդ հոդվածի 2-րդ մասով (դատավորի, դատախազի, քննիչի, քննչական մարմնի ղեկավարի, հետաքննության մարմնի, փաստաբանի, ներկայացուցչի, փորձագետի նկատմամբ սպառնալիքը կամ նրանց մասին տեղեկություն հրապարակելը կամ նրանց գույքը ոչնչացնելը կամ վնասելը կամ նրանց նկատմամբ բռնություն գործադրելը):

Միջնորդություն է ներկայացվել դատարան՝ նրա նկատմամբ կալանքը որպես խափանման միջոց ընտրելու վերաբերյալ։ Դատարանը այլընտրանքային խափանման միջոց՝ տնային կալանք է կիրառել։

Հեղինակ՝ Իզաբել Սահակյան

Աղբյուր` Փաստինֆո