Փաստ ինֆո

Իրավապահները չեն պատրաստվում վերացնել Երևանի ընդհանուր իրավասության դատարանի դատավոր Դավիթ Հարությունյանի նկատմամբ ԱԱԾ-ի կողմից ապօրինի իրականացված օպերատիվ-հետախուզական միջոցառումների՝գաղտնալսումների, հեռախոսային խոսակցությունների վերծանումների արդյունքում ստացված տվյալները և վճռաբեկ բողոքով պահանջում են բեկանել հօգուտ դատավորի կայացված որոշումը։

Ինչպես արդեն տեղեկացրել ենք՝ դատավոր Դավիթ Հարությունյանը դատական կարգով պահանջել է պարտավորեցնել ԱԱԾ-ին՝ վերացնել իր նկատմամբ իրականացված օպերատիվ-հետախուզական միջոցառումների՝ գաղտնալսումների, հեռախոսային խոսակցությունների վերծանումների արդյունքում ստացված տվյալները, որոնք օրինական ուժի մեջ մտած դատական ակտով թեև անթույլատրելի են ճանաչվել և քննիչի հավաստմամբ՝ հանվել գործից, բայց շարունակում են պահվել ԱԱԾ-ում։

Դատավորը պնդում է, որ իր վերաբերյալ տվյալները չեն կարող հասանելի լինել երրորդ անձանց։ Դատավորը բողոքի շրջանակներում պահանջել էր ճանաչել նաև դատավորի գործառութային անձեռնմխելիության և սահմանադրական իրավունքների խախտումը, ինչպես նաև՝ պարտավորեցնել վարույթն իրականացնող մարմնին՝ ներողություն խնդրել իրենից՝ որպես արդարացվածի։ Երևանի ընդհանուր իրավասության դատարանը՝ դատավոր Վաչե Մարգարյանի նախագահությամբ, մերժել էր դատավորի բողոքը, ինչի դեմ վերաքննիչ բողոք է ներկայացվել, որը բավարարվել էր։

Դատավորի ներկայացուցիչ, փաստաբան Միքայել Շխիմյանը «Փաստինֆո»-ի հետ զրույցում հայտնեց, որ որքանով տեղեկացված է՝ դատախազությունը վճռաբեկ բողոք է ներկայացրել, սակայն կողմը բողոքը դեռևս չի ստացել։

Հիշեցնենք, որ քրեական գործը, որի շրջանակներում դատավորները գաղտնալսվել են, հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո:

Ֆեյսբուքյան օգտատեր Արտակ Գալստյանը, որը հայտնի է որպես «Վանոյի Արտակ», գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից: Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը: ԱԱԾ քննչական դեպարտամենտում շուրջ 2.5 տարի քննվող քրեական գործով դատավորներ Մխիթար Պապոյանը, Արշակ Վարդանյանը և Դավիթ Հարությունյանը տուժող են ճանաչվել, Վազգեն Ռշտունին ու Արման Հովհաննիսյանը՝ հարցաքննվել։

Ընդ որում, թեև քրեական գործը հարուցված է դատավորներին զրպարտելու մասին հաղորդման հիման վրա, օպերատիվ միջոցառումներ իրականացվել են դատավորների նկատմամբ։ Գաղտնալսվել են Երևանի ընդհանուր իրավասության դատարանի դատավորներ Դավիթ Հարությունյանը, Արման Հովհաննիսյանը, Վերաքննիչ քրեական դատարանի դատավորներ Մխիթար Պապոյանը, Արշակ Վարդանյանը, այն ժամանակ դատարանի նախագահի պաշտոնը զբաղեցնող Վազգեն Ռշտունին, ինչպես նաև Սահմանադրական դատարանի դատավոր Հրայր Թովմասյանը: Դատավոր Հարությունյանն ու Արշակ Վարդանյանը վիճարկել են իրենց նկատմամբ ՕՀՄ-ներ իրականացնելու թույլտվությունները, ինչի արդյունքում արձանագրվել է դատավորների իրավունքների խախտումը, իսկ ՕՀՄ իրականացնելու արդյունքում ձեռք բերված տվյալները ճանաչվել են որպես անթույլատրելի ապացույց, և վարույթն իրականացնող մարմնի հավաստմամբ` հանվել գործից:

Հեղինակ՝ Իզաբել Սահակյան

Աղբյուր` Փաստինֆո