Փաստ ինֆո

Հանրապետության Հրապարակում «Համեր» մակնիշի ավտոմեքենայով խուլիգանություն կատարած 25-ամյա երիտասարդնի նկատմամբ կալանավորումը որպես խափանման միջոց ընտրելու մասին միջնորդություն է ներկայացվել դատարան։ Այս մասին «Փաստինֆո»-ին հայտնեցին ՀՀ քննչական կոմիտեից՝ հավելելով, որ միջնորդությունը ներկայացվել է այսօր և դեռևս չի քննարկվել։

Հիշեցնենք, որ փետրվարի 10-ին՝ ժամը 23։30-ի սահմաններում, Հանրապետության Հրապարակում «Համեր» մակնիշի ավտոմեքենայի վարորդը, հասարակական կարգը առերևույթ խախտելով, մեքենան վարել է ոստիկանների և քացաքացիների ուղղությամբ; Մեքենայի ընթացքը կանգնեցնելու համար գործադրվել է հրազեն՝ անվադողերի ուղղությամբ, ավելի ուշ վարորդը թողել է մեքենան և դիմել փախուստի։ ՔԿ-ից մանրամասնել էին, որ վարորդը պարեկներից գումար էր ուզել՝ մեքենան լիցքավորելու համար, այնուհետև սկսել էր անկանոն վարել Հանրապետության հրապարակում։ Իրավապահները պարզել են, որ ավտոմեքենայի ղեկին Արարատի մարզի Արարատ քաղաքի բնակիչ 25-ամյա Գեղամ Սահրադյանն է։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 297-րդ հոդվածի 3-րդ մասով (խուլիգանությունը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ), 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելու նպատակով պաշտոնատար անձի կամ նրա մերձավոր ազգականի կամ մերձավորի կամ նշված անձանց դաստիարակության, խնամքի կամ հսկողության տակ գտնվողի նկատմամբ բռնություն գործադրելը) և 264-րդ հոդվածի 2-րդ մասի 5-րդ կետով (գույքը ոչնչացնելը կամ վնասելը, որը կատարվել է խուլիգանական դրդումներով)։ Մեքենայի վարորդը ձերբակալվել է։ Վարույթի շրջանակներում վկայի և տուժողի դատավարական կարգավիճակներով հարցաքննվել են պարեկային ծառայության մի շարք աշխատակիցներ: Խուզարկությամբ վարորդի մոտ հայտնաբերվել է 1,9 գրամ քաշով թղթի մեջ փաթեթավորած բյուրեղանման «Մեթամֆետամին» տեսակի թմրանյութին նմանվող զանգված։ Վարորդը ձերբակալվել է։

Լուսանկարը՝ Գագիկ Շամշյանի։

Հեղինակ՝ Իզաբել Սահակյան

Աղբյուր` Փաստինֆո