Փաստ ինֆո

15 օր է՝ Արցախը Հայաստանին ու, առհասարակ, արտաքին աշխարհին կապող միակ ճանապարհը փակ է։ Սննդամթերքի, դեղորայքի ու առաջին անհրաժեշտության մյուս ապրանքների շուկայում տիրող իրավիճակը հասկանալու համար «Փաստինֆո»-ն զրուցել է Արցախի հանրային ծառայությունները և տնտեսական մրցակցությունը կարգավորող հանձնաժողովի աշխատակազմի տնտեսական մրցակցության պաշտպանության վարչության պետ Հրաչ Ավթանդիլյանի հետ։

-Պարոն Ավթանդիլյան, ո՞ր ապրանքատեսակներն են իսպառ բացակայում մթերային խանութներում։

-Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի կողմից Ստեփանակերտ քաղաքում գործող 22 առևտրային օբյեկտներում մի շարք լայն սպառման ապրանքատեսակների իրացման գների վերաբերյալ ամենօրյա ռեժիմով իրականացվում են դիտարկումներ:

Օպերատիվ շտաբի հանձնարարությամբ նմանատիպ դիտարկումներ իրականացվում են նաև Ասկերան, Մարտունի և Մարտակերտ շրջկենտրոններում և կատարված դիտարկումների արդյունքները տրամադրվում են Հանձնաժողովին:

Շրջափակման հետևանքով Հայաստանի Հանրապետությունից սննդամթերք և դեղորայք հնարավոր չի լինում հասցնել Արցախի Հանրապետություն, որն էլ իր հերթին առաջացնում է սննդամթերքի, դեղորայքի և վառելիքի պակաս:

Իրականացված դիտարկումների արդյունքներով առևտրային օբյեկտներում նկատվում են ալյուրի, ձեթի, բրնձի, որոշակի քանակի ձվի, ոսպի, աղի, ոլոռի, երշիկի, նրբերշիկի և ծխախոտի որոշակի տեսակների պակաս, իսկ որոշ ապրանքատեսակներ գրեթե բացակայում են, մասնավորապես՝ շաքարավազ, հնդկաձավար:

-Բանջարեղենի շուկայում ի՞նչ վիճակ է։ Արցախում մշակվող բանջարեղենի (մասնավորապես կարտոֆիլը) դեֆիցիտը լրացնելու ի՞նչ պոտենցիալ ունի։

-Արցախի Հանրապետությունում իրացվող բանջարեղենի և մրգերի ահռելի մասը ներկրվում էր Հայաստանի Հանրապետությունից, և ներկայումս՝ շրջափակման հետևանքով, շուկայում զգացվում է բանջարեղենի և մրգերի դեֆիցիտ, մասնավորապես՝ կարտոֆիլի, սոխի, գազարի, կաղամբի, խնձորի և ադամաթուզի: Նույնիսկ բանջարեղենի և մրգերի իրացմամբ զբաղվող տնտեսավարող սուբյեկտները արդեն դադարեցրել են իրենց գործունեությունը՝ ապրանքատեսակների բացակայությամբ պայմանավորված: Ինչ վերաբերում է գյուղական բնակավայրերից բանջարեղենի (կարտոֆիլի) բացակայությունը լրացնելուն, նշեմ, որ առկա ռեսուրսների ճիշտ կառավարման համար համապատասխան կառույցները ձեռնարկում են անհրաժեշտ միջոցներ:

-Դեղատներում ո՞ր դեղերն են բացայակում։

-Հանձնաժողովի կողմից ամենօրյա ռեժիմով դիտարկումներ են իրականացվում Ստեփանակերտ քաղաքի և շրջկենտրոնների դեղատներում՝ վերահսկելու և բացառելու դեղամիջոցների, մանկական կերերի և տակդիրների իրացման գների անհիմն բարձրացումները: Գների անհիմն թանկացման վերաբերյալ քաղաքացիների և օպերատիվ շտաբի կողմից ստացված բոլոր բողոքները գրանցվում են, և աշխատակազմի տնտեսական մրցակցության պաշտպանության վարչության կողմից օպերատիվ կերպով ընթացքավորվում՝ արդյունքների մասին տեղեկացնելով վերջիններիս: Լինում են դեպքեր, երբ քաղաքացիների բողոքները հիմնավոր չեն և դեղատան կողմից չէր իրականացվել գնի բարձրացում, այսինքն իրացման գնի թվացյալ փոփոխությունը պայմանավորված է ապրանքանիշների, դրանց փոխարինողների, ծագման երկրի և դեղաչափերի տարբերությամբ: Իսկ այն դեպքերում, երբ բողոքները հիմնավոր են, Հանձնաժողովը իրեն վերապահված լիազորությունների շրջանակում կիրառում է պատասխանատվության միջոց:

Ստեղծված իրավիճակով պայմանավորված, հանրապետությունում նկատվում է ճնշման, ջերմիջեցնող ցավազրկող, հակաբիոտիկ և շաքարային դիաբետով տառապող անձանց համար անհրաժեշտ դեղորայքի, ինչպես նաև մանկական կերերի և տակդիրների պակաս:

-Ի՞նչ ապրանքատեսակների մասով է արձանագրվել գների բարձրացում։

-Հանձնաժողովը մշտական կապի մեջ է գտնվում տնտեսավարող սուբյեկտների հետ և նկատելի է նրանց բարձր պատասխանատվությունը: Ներկայումս շուկայում բացակայում են ավելի մատչելի ապրանքատեսակները և Հանձնաժողովի կողմից իրականացվող դիտարկումներում արդեն ֆիքսվում են որակական ավելի բարձր հատկանիշներ ունեցող ապրանքատեսակները՝ համապատասխան իրացման գներով:

Հանձնաժողովը հորդորում է տնտեսավարող սուբյեկտներին պահպանել տնտեսական մրցակցության պաշտպանության օրենսդրության դրույթները, իսկ հանրությանը՝ անբարեխիղճ վարքագիծ դրսևորող տնտեսավարող սուբյեկտների վերաբերյալ անմիջապես տեղեկացնել Հանձնաժողովին:

-Շրջաններում մշտադիտարկան արդյունքում ստացված պատկերը մայրաքաղաքից ինչո՞վ է տարբերվում։

-Արցախի Հանրապետության շրջանների վարչակազմերի կողմից իրականացված և Հանձնաժողովին տրամադրված տեղեկատվության համաձայն, շրջկենտրոններում որոշակի ապրանքատեսակներ ի համեմատ մայրաքաղաքի դեռևս առկա են, սակայն գտնվում են սպառման եզրին: Ավելի շատ նկատվում է շաքարավազի, բանջարեղենի և մրգերի դեֆիցիտ:

Աղբյուր` Փաստինֆո