Փաստ ինֆո

Արցախում շրջափակման մեջ գտնվող մարդիկ մտահոգված են, լարված, առաջին հայացքից մեր կենցաղում որևէ տարբերություն չկա, բայց բոլորը սպասումով են, գիտակցում են, որ պետք է պինդ լինել, չընկճվել, իրար պահելով պետք է դուրս գանք այս վիճակից: Բոլորս գիտակցում ենք, որ հարցին պետք է քաղաքական լուծում տրվի, որը Երևանի կենտրոնում է հիմա, բայց, ցավոք, չենք տեսնում որևէ գործողություն այս ուղղությամբ: «Փաստինֆո»-ի հետ զրույցում ասել է Արցախի ԱԺ պատգամավոր Մետաքսե Հակոբյանը:

Նրա փոխանցմամբ` այս պահին Արցախում սննդի, դեղորայքի կամ առաջին անհրաժեշտության պաշարների սղություն դեռևս չկա, պաշարները բավարար են.

«Կան բաներ, որ շատ են, կան բաներ, որ քիչ են:Շաքարի ու բանջարեղենի խնդիրը կա, քանի որ հիմնականում ներկրում են Հայաստանից, բայց սա էլ խնդիր չէ, մարդիկ փոխարինողներ են գտնում, որևէ մեկը կենտրոնացած չէ սրա վրա:

Բացի սա՝ արցախցիների մոտ սովորություն կա, որ ամբողջ ամառվա ընթացքում ձմռան պաշար են կուտակում, հաստատ բոլորի տներում մեկ տարվա սնունդը կա, եզակի ապրանքատեսակներ էլ եթե չլինեն, դրանից մարդիկ չեն նեղվում, կա՝ կգնեն, չկա՝ չեն գնի:

Դեղեր էլ ունեն պահած: Միակ խնդիրը ծանր հիվանդների առկայությունն է, այդ թվում՝ երեխաների, փորձում են լուծումներ գտնել՝ խորհրդակցելով Հայաստանի առողջապահական համակարգի ներկայացուցիչներ հետ, բայց այս առումով մարդկանց վրա կարող է շատ թանկ նստել, եթե ճնապարհը շարունակի փակ մնալ»,-ասաց Հակոբյանը:

Զրուցակիցը շեշտում է՝ չի կարելի Արցախում ստեղծված իրավիճակը միայն հումանիտար շղարշի տակ անցկացնել, այն քաղաքական շատ լուրջ խնդիր է, որը բերել է հումանիտար աղետի:

«Հայաստանի վարչապետը շատ վտանգավոր գործընթաց է սկսել, առաջին հայացքից թվում է, թե ընդամենը ինֆորմացիա է տալիս, բայց ամեն ինչ տանում է հումանիտար դաշտ:Ինքը չի նշում այն պատճառները, որոնք բերել են հումանիտար աղետի, խոսում է հետևանքից, բայց չի խոսում պատճառներից: Սա ընդհանրապես հումանիտար խնդիր չէ, այլ հստակ քաղաքական լուծում պահանջող հարց է»,-ասում է Մետաքսե Հակոբյանը:
Ըստ նրա՝ Լաչինի միջանցքը փակելու Ադրբեջանի նպատակն ակնհայտ է՝ Սյունիքով միջանցք ստանալ Հայաստանից.

«Ադրբեջանը և Թուրքիան Զանգեզուրի միջանցքն են ուզում, սրա մասին այլևս չեն էլ թաքցնում:Պատահական չէր հապշտապ Լաչինի միջանցքի տեղափոխումը, հենց այդ ժամանակվանից սկսեցին Սյունիքով Նախիջևանը և Ադրբեջանը կապելու հարց բարձրացնել:Հիմա էլ փակել են Լաչինի միջանցքը, որ նման ճանապարհ ստանան Սյունիքով»,-ասաց Մետաքսե Հակոբյանը և հավելեց. «Արցախում հստակ ունենք դիրքորոշում, որ պահանջը միայն Արցախից չէ, պարզապես, ինչպես միշտ, Արցախն են դրել զոհասեղանին, գիտակցում ենք, որ այս պահին կանգնած ենք նաև հանուն Հայաստանի: Հույս ունենք, որ Հայաստանի մեր հայրենակիցները պահանջատեր կլինեն իրենց իշխանություններից, և ոչ թե ՄԱԿ-ի գրասենյակից, Ռուսաստանի կամ Ամերիկայի դեսպանատներից, բոլոր- բոլորից պահանջում են, բացի Նիկոլ Փաշինյանից, որն այս ամենի պատասխանատուն է: Արցախի պաշտոնյաներին էլ կոչ եմ արել՝ չխաղալ այն խաղը, որը Նիկոլն է գծել, այլ գնալ ու հստակ իրեն պահանջները ներկայացնել, միջազգային հանրությունը ոչ մի քայլ չի անելու, քանի քայլ չի անում Հայաստանի իշխանությունը»:

Աղբյուր` Փաստինֆո