Փաստ ինֆո

«Սա վարչապետ կոչեցյալի ձեռագիրն է՝ իրեն կից իրավապահներին հանձնարարականներ տալ ընդդիմադիրների դեմ գործեր հարուցել։ Այդ պրակտիկան նա սկսեց իշխանության գալուց հետո եւ շարունակում է։ Դա իշխանությունը պահելու նրա միակ գործիքն է, այլ գործիք չունի»-«Փաստինֆո»-ի հետ զրույցում ասաց Հայաստանի Հելսինկյան կոմիտեի նախագահ, իրավապաշտպան Ավետիք Իշխանյանը՝ անդրադառնալով ընդդիմախոսների նկատմամբ քրեական հետապնդումներ սկսելու իշխանության գործելաոճին, ինչը, Նիկոլ Փաշինյանը, կարծես թե կրկին վերսկսում է։

Հիշեցնենք, որ նախ, օրեր առաջ մամուլում տեղեկություն տարածվեց, թե Գլխավոր դատախազ Վարդապետյանը պատրաստվում է խորհրդարան մտնել՝ ԱԺ «Հայաստան» խմբակցության 3 պատգամավորի՝ Սեյրան Օհանյանին, վահե Հակոբյանին եւ Արմեն Չարչյանին անձեռնմխելիությունից զրկելու միջոնրդությամբ, ապա ՀՀԿ փոխնախագահ Արմեն Աշոտյանը հայտարարեց, թե մոտակա ժամանակահատվածում շատ զավեշտալի պատրվակով իշխանությունները պլանավորում են իրեն ձերբակալել:

Ավետիք Իշխանյանը մի կարեւոր հանգամանք շեշտեց՝ մինչեւ հիմա որեւէ մեկի նկատմամբ հարուցված քրեական գործերով որեւէ դատավճիռ գոյություն չունի։

«Սա շատ կարեւոր բան է, ավելին, նույնիսկ մինչեւ իշխանափոխությունը տարբեր գործիչների նկատմամբ հարուցված քրեական գործերը կարճված չեն։ Օրինակ, Անդրիաս Ղուկասյան, Սամվել Բաբայան, եւ այլն։ Դա նշանակում է, որ այդ բոլոր քրեական գործերը կախված են այդ մարդկանց գլխին եւ պատահական չէ, որ եւ Անդրիաս Ղուկասյանը եւ Սամվել Բաբայանը ինքնուրույն չեն, որովհետեւ ցանկացած պահի այդ քրեական գործերով նրանք կարող են կալանավորվել։ Եվ երբ Փաշինյանի վախերը մեծանում են, նա իրեն կից կառույցներին հանձնարարում է նոր քրեական գործեր հորինել։ Ես պատկերացնոււմ եմ, թե ինչպես է նա դա անում՝ գոռում է նրանց վրա եւ հայտարարում՝ որտեղից ուզում եք, գտեք »,-ասում է իրավապաշտպանը՝ շարունակելով , որ Փաշինյանը վախենում է ամեն ինչից եւ չի վստահում ոչ մեկի։ Ըստ Իշխանյանի՝ Փաշինյանը ոչ միայն վախենում է իշխանությունը կորցնելուց, այլեւ՝ անձնական ճակատագրի համար ու չի վստահում անգամ ՔՊ-ականներին։

«Նույնիսկ արտասահմանյան այցելությունների ժամանակ նա իր հետ ջուր է տանում, վախենում է ամեն ինչից, վախենում է, որ կարող է թունավորեն։ Ուժային կառույցների միջոցով ընդդիմախոսներին հետապնդելը վախերի մեջ ապրող բռնապետներին բնորոշ է եւ հիմա, երբ Փաշինյանը հայ ժողովրդի համար ճակատագրական որոշումներ պետք է կայացնի, հանձնարարարկաններ է տալիս պատժելու իր ընդդիմախոսներին։ Այդ համատեքստում պետք է տեսնել Արմեն Աշոտյանի նկատմամբ մեղադրանքի փորձը՝ պեղել ինչ-որ մի բան, գործ հարուցել, որը իհարկե, որեւէ հիմք չի ունենա, բայց կարող են կալանավորել, որոշ ժամանակ հետո ազատ արձակել եւ քրեական գործը կախված թողնել այնպես , ինչպես բազմաթիվ գործեր»,-կարծում է Իշխանյանը։

Իրավապաշտպանը վստահ է, որ հասարակական գործիչ Էդգար Ղազարյանի ծեծը եւս հանձնարարվել է իշխանության կողմից, որովհետեւ այն բացահայտելը շատ պարզ գործ էր։

«Ես համոզված եմ, որ նախկին քաղաքական գործիչներից այն մարդիկ, ովքեր այսօր քննադատում են իշխանությանը, նրանք համոզված են , որ իրենց անցյալը մաքուր է, այլապես , ինչպես Սերգեյ Բագրատյանը, Շիրակ Թորոսյանը եւ այլոք, կամ կլռեին կամ իշխանության մարդիկ կլինեին»։

Ինչ վերաբերում է տեղեկությանը, թե գլխավոր դատախազությունը դատական կարգով վիճարկում է Երևանի կենտրոնում գտնվող «Սիլ պլազա» բիզնես կենտրոնի սեփականաշնորհման օրինականությունը, Ավետիք Իշխանյանը նկատեց, որ ժամանակին, երբ Փաշինյանն ընդդիմություն էր, ըստ հավաստի լուրերի, Խաչատուր Սուքիասյանից է ֆինանսավորվել ՔՊ կոչված ուժը, ուստի Սուքիասյանն իրեն բվական վստահ է զգում եւ համարում է, որ կարող է ինքնուրույն կարծիքներ հայտնել՝ առանց հպատակվելու վարչապետին։

«Պատահական չէ, որ Սուքիասյանը քննադատեց Հայաստանի տնտեսական վիճակը, էկոնոմիկայի նախարարին։ Այս ամենը չի վրիպում Փաշինյանի ուշադրությունից եւ նա հանձնարարել է դատախազ Վարդապետյանին, որը պարզ է, ինքնուրույն որոշումներ կայացնելու ընդունակ չէ, եւ վարչապետի հրամանով է առաջնորդվում, սաստել խաչատուր Սուքիասյանին»,-ասաց Ավետիք Իշխանյանը, միեւնույն ժամանակ հռետորական հարցադրում հնչեցնելով՝ արդյո՞ այդ գործով թելերը կհասնեն գործող նախագահ վահագն Խաչատուրյանին, որն այդ սեփականաշնորհման տարիներին Երեւանի քաղաքապետն էր։

«Արդյո՞ք այդ գործը կհասնի նրան եւ մեղադրանք կառաջադրվի Վահագն Խաչատրյանին։ Սա հռետորական հարց համարեք»,-եզրափակեց իրավապաշտպանը։

Աղբյուր` Փաստինֆո