Փաստ ինֆո

Ո՞րն է եղել այն հայանպաստ և Հայաստանի շահերից բխող գոնե մեկ քայլը, որ ՀՀ վարչապետի աթոռն զբաղեցնող անձն այդ աթոռը գրավելու օրվանից մինչ օրս արել է։

Երկար պրպտելուց, մինչև 2018 թվական հետ գնալուգալուց հետո անգամ դժվար թե գտնեք նման կոնկրետ քայլ, ծրագիր, գործ կամ նախաձեռնություն։ Փոխարենը՝ ազարբայջան սարքովի պետությանն ի նպաստ քայլեր և գործողություններ՝ որքան ուզեք։ Նմանապես՝ Թուրքիայի շահը սպասարկող․․․

Պատահական չէ, որ թուրքադրբեջանական տանդեմը ներկա իշխանության առաջին դեմքին իր մարդն է համարում, ավելին, խոստովանում է, որ փաշինյանական գունավոր հեղափոխության ֆինանսավորողներից է եղել։ Իսկ փաշինյանը սեփական իշխանությունը պահելու համար ինչի ասես պատրաստ է դիմել, այդ թվում՝ պարբերաբար հանդես գալ որպես ալիևի դեսպանը Հայաստանում՝ տիրաժավորելով այն բարբաջանքները, որոնցով երկու տասնամյակ սեփական ժողովրդին կերակրում էր կիրթ հարևանը։ Այն ոխերիմ հարևանը, որը ԼՂՀ 85 տոկոսը ահաբեկչական ուժերի օգնությամբ գրավելուց հետո արդեն երկու տարի է ՀՀ սահմանը խախտելով, տնավորվել է Հայաստանի տարածքում և առաջ է գալիս ամեն օր։ ՈՒ սրա ամեն առաջխաղացում փաշինյանական վարչախումբը արդարացնում է։

Բայց ոչ միայն թուրքադրբեջանական եղբայրությանն են կամավոր անձնատուր եղել ներկաները, այլ՝ ընդհանրական վերցրած՝ Արևմուտքին՝ արդեն տևական ժամանակ հանդես գալով որպես հակառուսականության անմիջական և միջնորդավորված տարածողներ՝ որպես թե՝ Արևմուտքը պայմաններ է դնում ՀՀ իշխանությունների առջև՝ Ռուսաստանից «կտրվելու» համատեքստում։ Իսկ ի՞նչ ասել է ՀՀ-ի համար՝ ձերբազատվել Ռուսաստանից։

ՀԱՊԿ-ը լքելու պրիմիտիվ պահանջի և 102-րդ ռազմաբազային դուրս հրավիրելու՝ արևմտամետ- «ազգայնական» և արևմտամետ-կոսմոպոլիտ խմբավորումների երազանքը չնչին իսկ առնչություն չունի իրականության հետ։ Իսկ իրականությունը ոչ միայն գազ ու լույս է, ոչ միայն երկաթուղի, այլև հայ-ռուսական առևտրատնտեսական ամենասերտ և մասշտաբային կապեր, ներդրումներ, աշխատանքային միգրացիա և հայկական ամենամեծ սփյուռք։

Ընդ որում, հայ հասարակությանը գլոբալ առումով ապակողմնորոշելուց զատ խոշոր հարց է մնում՝ այդ ու՞մ գիրկն են շտապում նետվել գլոբալիստ-ազգայնականներն ու կոսմոպոլիտները։ Այն Արևմուտքի՞, որն, ըստ էության, ՌԴ-ին ուղղված անգլոամերիկյան պատժամիջոցների՝ բնավ ոչ իր շահերից բխող թակարդն է ընկել և դուրս գալ չի կարողանում։ Լեհաստանն արդեն աղբ է վառում, մյուսներն էլ արդեն՝ուկրաինացիներին ուղղված ոչ բարի տոնով՝ զբաղված են ձմեռվա համար փայտ կուտակելով և խնայողությունների բյուջեի անցնելով։

Եվրոպայի վիճակի տիպիկ գնահատականը 2022-ի սկզբին իր հարցազրույցներից մեկում տվել է տաղանդավոր փիլիսոփա՝ Կարեն Սվասյանը, ասելով, որ Եվրոպան ինքն իրեն այլևս չի տիրապետում։ Ավելին, Սվասյանը Եվրոպան համեմատել է մեռած մարդու հետ, որը չգիտի, որ մեռած է և քանի որ չգիտի՝ ինքնաբերաբար շարունակում է ապրել, կարծես՝ ոչինչ չի եղել։

Հիմա՝ այս գերված Եվրոպայից ի՞նչ սպասելիքներ կարող է ունենալ Հայաստանը։

Եվ ընդհանրապես, ե՞րբ է գալու և լինելու այն ժամանակը, երբ Հայաստանը նախ՝ իր ուժերի վրա հենվի, ոչ թե՝ անկամ և անուժ կերպարի տակ մտած՝ այս ու այն կողմ նայի խնդրողի հայացքով, թե՝ եկեք մեզ փրկեք։ Դեռ մի բան էլ՝ մուննաթ գա, թե՝ «դիմում ենք, բայց՝ մեր ռազմավարական դաշնակիցը ինքնամոռաց կերպով չի նետվում փրկելու։ Հարց է ծագում, իսկ դու, դո՛ւ ի՞նչ ես անում ՀՀ՝ ոչ բարով իշխանություն, դու դաշնակցային պարտավորություննե՞րդ ես կատարում, երբ սովորությանդ համաձայն ի սկզբանե տակից խաղեր ես տալիս․․․ Քաղաքականության կարևոր պայմաններից մեկը կանխատեսելիությունն է։ Մյուսը՝ վստահելի գործընկեր լինելը։ Երկուսից էլ զուրկ է ՀՀ ներկա իշխանությունը։
ՌԴ, Իրան, Չինաստան՝ տարածաշրջանային հզոր պետություններին վանելով՝ ինչի՞ ես ձգտում։

Թուրքադրբեջանական տանդեմը՝ Հայաստան մտցնելու՞ն։ Այդ նպատակո՞վ ես 150000 դոլարանոց ներդրում անող ցանկացածի ՀՀ քաղաքացիություն խոստանում։ Մուրացկանի այս հոգեբանությամբ՝ մինչև ու՞ր, մինչև ե՞րբ։ Արաբական Միացյալ Էմիրությունը՝ հսկայական ներդրում անողներին անգամ քաղաքացիություն հազվադեպ է շնորհում։ Արի՛, ներդրումներ արա, հարստացիր, հարստացրու՛ երկիրս, բայց՝ ամեն ներդրումի հետևում իմ քաղաքացին պիտի լինի որպես շահույթ ստացող և երաշխավոր։

ՀՀ՝ տասնամյակների քաղաքական ձեռքբերումները և կապերը քանդած, արդյունաբերական Հայաստանը մինչև վերջ ավերած և սպասարկու, ենթակա պետության ճանապարհը բռնած հհշիզմը մուտացիայի ենթարկված՝ վերադարձել է։

Սա պիտի գիտակցվի և անհրաժեշտ քայլերն արվի։

Աղբյուր` Փաստինֆո