Փաստ ինֆո

Մենք հիմա փորձում ենք Արցախին վերադարձնել բանակցությունների սեղան, որպեսզի այլ հարցեր չլինեն, որպեսզի Արցախի ԱԺ-ից մեկ այլ կարծիք չհնչի, իսկ Հայաստանից ՝ այլ: Թեև մինչ այժմ էլ պարզ չէ, թե ինչու՞ են Արցախից այլ կարծիքներ հնչում երբեմն, ենթադրում եմ, քաղաքական նկատառումներից ելնելով, քանի որ իրենք մշտապես իմացել են ամեն ինչ՝ ամեն ստորակետը, ամեն ձևակերպումը: Այս մասին խորհրդարանում հայտարարել է ԱԺ նախագահ Ալեն Սիմոնյանը:

Լրագրողի ճշգրտող հարցին՝ Արցախի իշխանությունները տեղեկացվել և համաձայնվե՞լ են, որ միայն Հայաստանի տարածքի մասին խոսվի՝ Սիմոնյանն ասաց.

«Այո, տեղեկացվել են և համաձայնվել են, քանի որ այլ տարբերակ չկա: Ասեմ ավելին, շատ հաճախ Արցախի մեր գործընկերներն են մեզ նախազգուշացրել, որ մտավախություն ունեն Հայաստանի անվտանգության վերաբերյալ»,-ասաց նա:
Ալեն Սիմոնյանը վստահեցրեց, որ չկա այնպիսի բան, որ վարչապետը գիտի, իսկ Արցախի իշխանությունները չգիտեն:

Նա նաև շեշտեց, որ որևէ քայլ չի արվել և արվելու՝ առանց Արցախի որոշման.

«Թող տպավորություն չլինի, որ եթե Արցախը բանակցի, ապա Հայաստանը չի խառնվելու, մենք Արցախը միայնակ չենք թողնելու, բոլոր այն տարբերակները, որտեղ կարելի է միայնակ թողնել Արցախին, մեզ համար ընդունելի չէ, նման խոսակցություն չի եղել»,-ասաց Սիմոնյանը:

Աղբյուր` Փաստինֆո