Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, շարունակվում են հասարակական-քաղաքական գործիչ Ավետիք Չալաբյանի և Էմմա Սարգսյանի գործով դատական լսումները։

«Փաստինֆո»-ի թղթակցի հաղորդմամբ՝ Ավետիք Չալաբյանը հայտարարությամբ հանդես եկավ՝ տեղեկացնելով, որ բժշկական հետազոտություն է անցել, ախտորոշվել է հիպերտենզիա 3-րդ աստիճանի, նշանակվել է ամբուլատոր բուժում և չի բացառում, որ հետագայում խնդիրների առաջ գալու դեպքում հնարավոր է, որ խնդրեն նիստը հետաձգել, ինչին ի պատասխան նախագահողը նշեց, որ հետագայում, եթե խնդիր առաջանա, Աստված ոչ անի Չալաբյանն ի վիճակի չլինի, պաշտպանը հայտարարությամբ հանդես կգա։
Ավետիք Չալաբյանի պաշտպան Վարազդատ Հարությունյանը միջնորդություն ներկայացրեց՝ վարույթը կարճելու մասին։ Պաշտպանը նշեց, որ ֆորմալ առումով գործի հարուցման հիմք է հանդիսացել ոստիկանության ծառայողի զեկուցագիրը, որում նշված էր, թե համացանցում առկա տեղեկատվությունն ուսումնասիրելու ընթացքում նկատել է «Medianews» կայքում հրապարակված ձայնագրությունը, մինչդեռ, պաշտպանության կողմի դիտարկմամբ՝ քրեական դատավարության օրենսգրքի համաձայն՝ չի կարող քրեական հետապնդում չի կարող հարուցվել, իսկ հարուցվցած քրեական հետապնդումը ենթակա է դադարեցման, եթե վարույթը նախաձեռնվել է օրենսգրքով չնախատեսված աղբյուրի հիման վրա։ Այս պարագայում, Վարազդատ Հարությունյանի արձանագրմամբ, Չալաբյանի նկատմամբ քրեական հետապնդման համար հիմք է հանդիսացել «ֆեյք», իշխանական լրատվամիջոցում հրապարակված մոնտաժված ձայնագրությունը։ Իշխանական պրոպագանդայով զբաղվող լրատվամիջոցը, փաստաբանի գնահատմամբ, «ֆեյք» է, քանի որ չի համապատասխանում ԶԼՄ-ների մասին օրենքով սահմանված կարգավորումներին, համաձայն որի՝ էլեկտրոնային լրատվամիջոցը պետք է պարունակի մի շարք տեղեկություններ։

«Ստացվում է, որ Ավետիք Չալաբյանի՝ որպես քաղաքական գործչի, նրա մասնակցությամբ իրականացվող քաղաքական գործընթացները, մասնավորապես, վերջին ամիսներին ՀՀ-ում իշխանափոխության պահանջով հանդես եկող շարժումների գաղափարական, նպատակային հիմնասյուները խարխլելու, քանդելու համար իրականացվել է այս ձայնագրությունը, որն իրենից ներկայացնում է ձայնագրության մոնտաժ, որն իրականացվել է, օրինակ, հատուկ ծառայությունների միջոցով, տրվել է բացառապես իշխանական պրոպագանդայով հայտնի ֆեյք լրատվամիջոցին, ձևական առումով էական գործի հարուցման օրինականություն ապահովելու համար ոստիկանության Երևան քաղաքի վարչության հետաքննության վարչության ավագ տեսուչ Ս. Սարգսյանը փաթեթավորված այս ամբողջ պրոդուկտը հանձնել է զեկուցագրի տեսքով և ուղարկել ՔԿ »,- նշեց Հարությունյանը։

Պաշտպանության կողմը գտնում է, որ պետք է հարցաքննվի նաև Տարոն Չախոյանը։ Ավետիք Չալաբյանը հայտարարությամբ հանդես եկավ՝ նշելով, որ նախաքննական մարմինը հանցավոր անգործություն է ցուցաբերել, որևէ գործողություն չի կատարել՝ ձայնագրության ամբողջական տարբերակը ձեռք բերելու համար, ավելին՝ ծանուցում է ուղարկվել կայքի խմբագրին՝ հարցաքննության համար, սակայն վերջինս չի ներկայացել։

«Եթե այդ տեղեկատվությունը կարևոր է, ինչու հետամուտ չեք լինում՝ տեղեկատվությունը ստանալու։ Շատ պարզ պատճառով։ Հարգելի պետական մեղադրողը հայտարարեց, որ գործը քաղաքական ենթատեքստ չունի։ Որովհետև պարզ էր դառնալու, թե ով է ձայնագրությունն արել, ինչու էր այդ կոմունիկացիան արվել, գնալու էր հասնել մինչև պատվիրատուն, իսկ մենք գիտենք, թե ով է պատվիրատուն՝ նստած է վարչապետի աթոռին»,- նշեց Չալաբյանը։

Հանրային մեղադրողն առարկեց միջնորդության դեմ՝ նշելով, որ այն ենթակա է մերժման։ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, լսելով կողմերին, մերժեց կարճման միջնորդությունը։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հուլիսի 6-ին ՔԿ-ն հաղորդագրություն տարածեց՝ նախաքննության ավարտ հայտարարելու մասին, սակայն դատախազը չէր հաստատել մեղադրական եզրակացությունը և գործի նյութերը վերադարձրել նախաքննական մարմին՝ նախաքննությունը շարունակելու ցուցումով, մասնավորապես, անհրաժեշտ էր առաջադրված մեղադրանքը համապատասխանեցնել ՀՀ քրեական նոր օրենսգրքին: Դատախազի ցուցումը արագ քննիչն իրականացրել է ու մինչ գործը կուղարկվեր դատարան հապճեպ միջնորդել է երկարացնել Ավետիք Չալաբյանի կալանավորման ժամկետը, որը դատարանը բավարարել է՝ կալանավորման ժամկետը երկարացնելով 15 օրով։

Հեղինակ՝ Իզաբել Սահակյան

Աղբյուր` Փաստինֆո