Փաստ ինֆո

Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, այսօր կայացել են հասարակական-քաղաքական գործիչ Ավետիք Չալաբյանի և Էմմա Սարգսյանի գործով նախնական դատական լսումները։

«Փաստինֆո»-ի թղթակցի հաղորդմամբ՝ պաշտպանության կողմը նախագահող դատավոր Մնացական Մարտիրոսյանին ինքնաբացարկ հայտնելու միջնորդություն է ներկայացրել՝ արձանագրելով, որ առկա են ինքնաբացարկի հիմքեր։ Մասնավորապես, պաշտպան Վարազդատ Հարությունյանն արձանագրեց, որ խախտվել են Ավետիք Չալաբյանի արդար դատաքննության, պաշտպանության հիմնարար իրավունքները։ Պաշտպանության կողմը գտնում է, որ զենքերի հավասարության սկզբունքի և պաշտպանության իրավունքի իրացման համար անհրաժեշտ է քրեական գործը վերադարձնել դատախազին, քանի որ մեղադրական եզրակացության մեջ տեղ չեն գտել Չալաբյանի անձը բնութագրող, արդարացնող տվյալները։ Բացի այդ՝ թեև Ավետիք Չալաբյանն արդեն իսկ ունի պաշտպանական թիմ, նախագահող դատավորի պնդմամբ՝ գործում ներգրավվել է նաև հանրային պաշտպան։

Պաշտպան Արմեն Անդրիկյանը ևս միացավ միջնորդությանը՝ նախապես նշելով, որ մի փոքր սուր ելույթ է ունենալու։ Նա ընդգծեց, որ Մնացական Մարտիրոսյանի՝ որպես դատարանի, նկատմամբ ունի վերապահումներ և պատահական չի համարում, որ այս իշխանությունների հետաքրքրության շրջանակներում գտնվող գործերի մեծ մասը մակագրվում է հենց այս դատավորին։ Պաշտպանը կասկածի տակ դրեց դատավորի անկախությունը և անաչառությունը՝ նշելով, որ դա չեն կարող ակնկալել դատավորից, ինչը պայմանավորված է թե նախկինում, թե այս գործի շրջանակներում դատավորի գործողություններով։

«Ունենք դատարան, որը հանդիսանում է մեղադրող կողմ, ունենք մեղադրող և ունենք պաշտպաններ, որոնք ստիպված են պաշտպանվել մեղադրողից և մեղադրող դատավորից»,- նշեց Անդրիկյանը՝ հիշեցնելով, որ թե նախկին, թե այս իշխանությունների օրոք հնչեղություն ունեցող գործերով որոշումներ է կայացրել Մարտիրոսյանը, այդ գործերից է նաև ներկայիս վարչապետ Նիկոլ Փաշինյանի գործը և ՄԻԵԴ-ի համաձայն՝ դատարանը կայացրել է ապօրինի դատական ակտ։

Անդրիկյանը նշեց, որ ողջամիտ կասկածներ են առաջ գալիս, որ իշխանափոխությունից հետո Մարտիրոսյանը շարունակում է նախագահող դատավոր լինել հնչեղություն ունեցող գործ, կանխատեսվում է, որ Չալաբյանի գործով ևս կկայացվի ապօրինի դատական ակտ և Չալաբյանը կպատժվի իր քաղաքական հայացքների համար։ Պաշտպանի հայտարարությունները վրդովվեցրին Մնացական Մարտիրոսյանին, վերջինս նախազգուշացրեց՝ պաշտպանի նկատմամբ դատական սանկցիա կիրառելու հնարավորության մասին։

Ավետիք Չալաբյանը միացավ միջնորդությանը և, դիմելով նախագահող դատավոր Մնացական Մարտիրոսյանին, նշեց, որ արդեն երկար տարիներ նա նախագահում է այն դատական գործընթացները, որտեղ քննվում են հանրային բարձր տեսանելիություն ունեցող անձանց հետ կապված գործեր։

«Դրանք այն մարդիկ են, որոնք այս կամ այն կերպ գտնվում են գործող իշխանության հետ որոշակի հակադրության մեջ: Այստեղ օրինակը ես եմ, բայց կան նաև ուրիշ օրինակներ՝ Աղվան Հովսեփյանը, եւ այս դահլիճում մահացած Արմեն Գրիգորյանը: Ես չեմ հիշում որեւէ դեպք, երբ Դուք այդպիսի գործով արդարացնող որոշում եք ընդունել: Ես ենթադրում եմ, որ այս գործում էլ դուք չեք ընդունելու արդարացնող որոշում, Դուք ընդհակառակը, փորձլու եք ծանրացնել մեղադրանքը: Դա ակնառում է բոլոր ներկաներին: Դուք, ըստ էության, ձեզ վրա վերցրել եք ոչ միայն դատավորի, այլ նաեւ հանրային մեղադրողի ֆունկցիա, լրացնում եք հանրային մեղադրողի չարածը: Ես չեմ հիշում մեկ դեպք, երբ մեր որևէ փաստարկ ձեր կողմից ընդունվել է: Դա ենթադրել է տալիս, որ այսուհետ ևս մեր կողմից ներկայացված որևէ փաստարկ Ձեր կողմից չի ընդունվելու: Դա նշանակում է, որ մենք չենք կարող ակնկալել արդար դատաքննություն: Նախորդ ելույթում ես ասացի, որ մեղադրական եզրակացությունը ծայրահեղ միտումնավոր է, և շատ կոնկրետ դրա օրինակը բերեցի: Ես ենթադրում էի, որ կարձագանքեք, բայց անարձագանք թողեցիք: Այսինքն՝ Ձեզ համար միևնույն է՝ մենք ինչ ենք ասում: Ձեզ համար արդեն որոշված է՝ ինչ է լինելու»,-նշեց նա:

Չալաբյանի խոսքով՝ 5 օրում չորս դատական նիստ է նշանակվել, ինչով է պայմանավորված այս շտապողականությունը, ընդ որում, երբ ինքը խնդրել էր դատարանին նիստը հետաձգել գոնե մեկ շաբաթով՝ առողջական վիճակը վերականգնելու, սրտանոթային կոմպլեքս հետազոտություն իրականացնելու համար։

«Իմ առողջական վիճակն իսկապես լուրջ է և կարող է այս շտապողականությունը բերել հենց այս դատական պրոցեսի համար ուղիղ հակառակ արդյունքների: Եթե ես այստեղ Արմեն Գրիգորյանի պես ուշաթափվեմ կամ մահանամ, դրանով ո՞վ է շահելու»,-նշեց Չալաբյանը՝ հավելելով, որ կորցրել է հավատը, որ Մնացական Մարտիրոսյանն այս գործով արդար վճիռ կկայացնի. «Դուք էլ գիտեք, որ չեք կարող այդպիսի որոշում կայացնել: Պատճառն էլ գիտեք՝ ինչու չեք կարող: Ուստի մի մտեք այդ մեղքի տակ:

Ականջալուր եղեք ինքնաբացարկի միջնորդության հիմքերին»։

Կողմերի դիրքորոշումը լսելուց հետո դատարանը մերժեց ինքնաբացարկի միջնորդությունը։ Դատական նիստը հետաձգվեց՝ մինչև օգոստոսի 3-ը։ Նշենք, որ Մնացական Մարտիրոսյանն առաջարկել էր դատական հաջորդ նիստը գումարել օգոստոսի 2-ին, սակայն Ավետիք Չալաբյանը դատարանից ժամանակ է խնդրել սրտի հետազոտության համար, Չալաբյանի խնդրանքից հետո փոխեց նիստի օրը։ Այն կկայանա օգոստոսի 3-ին։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ նախաքննական մարմնի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար:

Հուլիսի 6-ին ՔԿ-ն հաղորդագրություն տարածեց՝ նախաքննության ավարտ հայտարարելու մասին, սակայն դատախազը չէր հաստատել մեղադրական եզրակացությունը և գործի նյութերը վերադարձրել նախաքննական մարմին՝ նախաքննությունը շարունակելու ցուցումով, մասնավորապես, անհրաժեշտ էր առաջադրված մեղադրանքը համապատասխանեցնել ՀՀ քրեական նոր օրենսգրքին: Դատախազի ցուցումը արագ քննիչն իրականացրել է ու մինչ գործը կուղարկվեր դատարան հապճեպ միջնորդել է երկարացնել Ավետիք Չալաբյանի կալանավորման ժամկետը, որը դատարանը բավարարել է՝ կալանավորման ժամկետը երկարացնելով 15 օրով։

Հեղինակ՝ Իզաբել Սահակյան

Աղբյուր` Փաստինֆո