Փաստ ինֆո

Հրապարակավ գրազ եմ գալիս՝ Փաշինյանին իմպիչմենտ հայտնելու գաղափարի հեղինակի հետ՝ իրենք գեթ մեկ ՔՊ-ական պատգամավորի չեն կարողանալու «վերբովկա» անել: ՔՊ-ում, իհարկե, կան տարաձայնություններ, բայց Նիկոլ Փաշինյանի հանցագործ իշխանությունը մեկ մարդու նման միավորվում է, երբ տեսնում է, որ իշխանություն կորցնելու վտանգ կա, որովհետև շատ լավ հասկանում են, որ իշխանություն կորցնելուց հետո իրենք նախկին իշխանությունների նման հանգիստ չեն կարողանալու փողոցով քայլել, իրենց գերակշիռ մեծամասնությունը՝ ՔՕ ծանրագույն հոդվածով դատապարտվելու է, իսկ իշխանության մնալն իրենց փրկօղակն է։ Եթե ընդդիմությանը թվում է, թե կարողանալու են իրենց փողերով անգամ մեկ ՔՊ-ական գնել, ապա սխալվում են, Նիկոլը եկել է ժողովրդով, պետք է գնա ժողովրդով:

«Փաստինֆո»-ի հետ զրույցում նման հայտարարություն է արել ԱԺ նախկին պատգամավոր Նաիրա Զոհրաբյանը:

Օգոստոսի 2-ին լրանում է Նիկոլ Փաշինյանի վարչապետ ընտրվելու 1 տարին, որից հետո ընդդիմադիր քաղաքական ուժերը կարող են իմպիչմենտի գործընթաց նախաձեռնել:

Ընդդիմադիրներից ոմանք պնդում են, որ որևէ պարագայում չեն վերադառնալու խորհրդարան, ոմանք էլ կարծում են, որ պետք է վերադառնալ և փողոցային պայքարը չհաջողելուց հետո Նիկոլ Փաշինյանին պաշտոնանկ անելու գործընթաց սկսել:

Իմպիչմենտի գործընթաց սկսելու համար պետք է պատգամավորների առնվազն մեկ երրորդի ստորագրությունը, մինչդեռ այդ թվով պատգամավորներ ընդդիմադիր երկու խմբակցություններում չկան, ուստի անհրաժեշտ է լինելու նաև ՔՊ խմբակցության պատգամավորների ձայները:

ԱԺ նախկին պատգամավոր Նաիրա Զոհրաբյանը վստահ է, որ որևէ իշխանական չի միանա Փաշինյանին իմպիչմենտ հայտնելու գործընթացին։

«Իմպիչմենտի գործընթաց սկսելն ընդամենը կլոունադա կլինի, սա ընդդիմության համար «ատմասկա է»՝ խորհրդարան վերադառնալու, շատ ավելի ազնիվ կլինի ասել, որ փողոցում չհաջողեցինք ու վերադառնում ենք խորհրդարան՝ Հարկային օրենսգիրք, ջրի մասին օրենք և այլ նախագծեր քննարկելու »,- մեզ հետ զրույցում ասաց ԱԺ նախկին պատգամավորը:

Նաիրա Զոհրաբյանը թեև «Դիմադրության» շարժումը ձախողված չի համարում, բայց այլևս չի տեսնում ճանապարհային այն քարտեզը, որով ընդդիմությունը կարող է հասնել Նիկոլ Փաշինյանի հրաժարականին, կարծում է՝ գրագետ քայլեր ու ճիշտ լիդերներ են պետք ընդդիմությանը.

«Շատ ավելի կոնկրետ ու առարկայական քայլեր են պետք, ոչ թե՝ «ֆանարները բարձրացրեք, ֆանարներն իջեցրեք», երբ հստակ օրակարգով ընդդիմություն կլինի, կամ էլ այս ընդդիմությունը, որը դեռևս ռեալ պոտենցիալ ունի, հստակ օրակարգ կձևավորի, այդ ժամանակ ես ինքս նորից կլինեմ առաջին շարքերում»,-ասել է Զոհրաբյանը և հավելել, որ ընդդիմությունը չի ձախողել, բայց այն խնդիրը, որը դրել էին իրենց առջև, չի ստացվել, երկում կա լրջագույն ճգնաժամ, կա հանրային մեծ «կոնսենսուս՝ մինուս Նիկոլ», ընդդիմությունը պետք է կարողանա ճիշտ և գրագետ աշխատել ժողովրդի հետ։

Նաիրա Զոհրաբյանի կարծիքով՝ ընդդիմությանը պակասում է նաև մինչև վերջ գնալու վճռականությունը։

«Երբ առաջնագծում կլինեն մարդիկ, որոնք պատրաստ կլինեն մեռնելու, կալանավորվելու, ժողովրդի մեջ հավատը կվերադառնա։ Շատ կարևոր է նաև հստակեցնել՝ ո՞վ է լինելու լիդերը, հասարակությունը պետք է տեսնի լիդերին, ստվերային կառավարության կազմը և լսի ճանապարհային քարտեզը՝ թե առկա խնդիրներն ինչպե՞ս են լուծվելու, «Նիկոլ չկա» ասելով Նիկոլը չի դադարում լինելուց։ Ես, օրինակ, ուզում եմ իմանալ Բերձորի, Աղավնոյի, Շուշիի ու Հադրութի խնդիրը, Թուրքիայի հետ բանակցությունների խնդիրը,տնեսական կոլապսի խնդիրը ինչպե՞ս են լուծելու, ես և իմ նման հազարավորներն ուզում ենք ստանալ ոչ թե առաջիկա մեկ ամսվա, այլ՝ 10 տարվա Հայաստանի տեսլականի ճանապարհային քարտեզը, երբ այս ամենը ներկայացվի, ես վստահեցնում եմ, հրապարակում կլինի այնքան մարդ, որից հետո Նիկոլ

իսկապես չի լինի»,-ասաց Զոհրաբյանը:

ԱԺ փոխնախագահ Իշխան Սաղաթելյանին և ԱԺ տնտեսական հարցերի մշտական հանձնաժողովի նախագահ Վահե Հակոբյանին պաշտոններից հեռացնելու ՔՊ-ի որոշումից հետո, ընդդիմադիր բոլոր պատգամավորները՝ ի համերաշխություն իրենց գործընկերների, հրաժարվեցին ԱԺ հանձնաժողովների նախագահի և փոխնախագահի իրենց պաշտոններից, սակայն ԱԺ Մարդու իրավունքների պաշտպանության և հանրային հարցերի մշտական հանձնաժողովի ղեկավար Թագուհի Թովմասյանը հրաժարվեց թողնել իր պաշտոնը և հայտարարեց, որ շարունակելու է պաշտոնավարել որպես հանձնաժողովի անկախ նախագահ:

ԱԺ մարդու իրավունքների և հանրային հարցերի հանձնաժողովի նախկին նախագահ Նաիրա Զոհրաբյանը կարծում է, որ Թագուհի Թովմասյանի այս քայլը, բացի այն որ խոչընդոտում է խորհրդարանում լիարժեք ճգնաժամ ստեղծելուն, իսկական ալիբի է ՔՊ-ի համար.

«Ես աշխատում եմ ձեռնպահ մնալ այս խնդրի մասին խոսելուց, որովհետև Թագուհի հետ մենք լրագրողական և գործընկերային ճանապարհ ենք անցել, բայց եթե կար որոշում, որ ընդդիմությունն ԱԺ-ում պետք է վայր դնի իր բոլոր պաշտոնները, բոլորը պետք է դնեին, սա անքննելի է: Ես տեղեկությունն ունեմ, որ երբ ԵԽԽՎ-ում Հայաստանի հարցով զեկուցողները մտահոգություն են հայտնել, որ բոլոր ընդդիմադիրները վայր են դրել իրենց պաշտոնները, Հայաստանի իշխանությունները, նշյալ տիկնոջ օրինակը բերելով, ասել են՝ ոչ, այդպես չէ, ընդդիմության ներկայացուցիչը շարունակում է ԱԺ ղեկավար կազմում լինել, բայց սա ընդդիմության և Թագուհի Թովմասյանի խնդիրն է, սա բարոյական հարց է և յուրաքանչյուր ոք իր բարոյականության չափման միավորով է որոշում այս հարցը: Ընդդիմադիրների՝ պաշտոններից հրաժարվելուց հետո կարող էր լուրջ ճգնաժամ ստեղծվել, եթե Թագուհին հրաժարվեր այդ պաշտոնից, որն ի դեպ, «Հայաստան» դաշինքն է ուղղակի նվիրել իրեն, բայց չեղավ այդպես»-ասաց զրուցակիցը:

Զոհրաբյանն ընդգծում է՝ընդդիմադիրները պետք է լուծեն այս հարցը.

«Ես չեմ ընդունում այն թեզը, երբ շատերը լռում են կոլեգիալության սկզբունքից ելնելով, բոլոր նրանք, ովքեր իրենց գործողություններով, դիտավորյալ կամ չհասկանալով, ամրապնդում են Նիկոլի իշխանությունը ինձ համար թշնամի են »,-եզրափակեց նա:

Աղբյուր` Փաստինֆո