Փաստ ինֆո

Նախօրեին Բրյուսելում տեղի ունեցավ եռակողմ հանդիպում՝ ՀՀ վարչապետ Նիկոլ Փաշինյանի, Եվրոպայի խորհրդի նախագահ Շառլ Միշելի, Ադրբեջանի նախագահ Իլհամ Ալիեւի մասնակցությամբ։ Հանդիպման արդյունքների վերաբերյալ եվրոպացի պաշտոնյան հանդես է եկել հետաքրքիր հայտարարություններով, որոնց շուրջ «Փաստինֆո»-ն  զրուցել է ռազմական գործիչ, ՀՀ ԶՈւ Գլխավոր շտաբի նախկին պետ Մովսես Հակոբյանի հետ ։

- Պարոն Հակոբյան, կուզենայինք լսել ձեր մեկնաբանությունը՝ Փաշինյան- Ալիև բրյուսելյան վերջին հանդիպման վերաբերյալ, որի մանրամասներին մենք տեղեկացանք Շառլ Միշելի՝ երեկ արված հայտարարությունից միայն։

- Շառլ Միշելը բարձրաձայնեց  միայն այն, ինչ պայմանավորվել էին։

- Ըստ այս պայմանավորվածության, ստացվում է, որ Հայաստանը բաժանվում  է երկու մասի՝ ցամաքային ճանապարհով  կտրվելով  իր հյուսիսային և հարավային հարևաններից։ Ինչպե՞ս կարող է սա տեղի ունենալ կամ ինչպե՞ս կարելի է սա թույլ տալ։

-Պայմանավորվածությունները ձեր նկարագրածի նման չեն։ Բացի այդ, այս պայմանավորվածությունը նոր չէ, այն ամրագրվել է, դեռևս, 2020 թվականի նոյեմբերի  9-ին կնքված փաստաթղթով, որի կետերը, ինչպես որ սա է, փուլ առ փուլ ի կատար են ածվում։ Վերոհիշյալ փաստաթղթով, ի սկզբանե, պայմանավորվածություն է եղել՝ ճանաչելու միմյանց տարածքային ամբողջականությունը, ինչն էլ, ինչպես արդեն ասացի, փուլ առ փուլ տեղի է  ունենում։

- Ըստ փուլ առ փուլ տեղի ունեցող զարգացումների, միջպետական երկու ճանապարհների վրա գտնվող Տիգրանաշենն ու Տավուշի գյուղերը ադրբեջանական կողմին հանձնելուց  հետո, Հայաստանն, ըստ էության, վերածվելու է մի մեծ անկլավի։

-Աշխարհագրությունը լավ չեք պատկերացնում, դրա համար այդպես եք վերլուծում։ Հայաստանն անկլավ դառնալ չի կարող։ Հայաստանը սահմաններ ունի և՛ Վրաստանի, և՛ Իրանի հետ, այսինքն, մենք ունենք համապատասխան ճանապարհներ։ Խոսքը վերաբերում է այդ ճանապարհների որոշ հատվածներին, որոնք անցնում են վերոհիշյալ անկլավներով։  Եթե այդ անկլավները փոխանցվեն Ադրբեջանին, ապա մենք պարտադրված կլինենք ուրիշ՝ այլընտրանքային ճանապարհներով հաղորդակցվել։

-Այդպիսի  ուրիշ՝ այլընտրանքային մեկ  ճանապարհ մենք արդեն ունենք, պարոն Հակոբյան, Սյունիքում, որ մեզ պարտադրվեց Գորիս – Կապան 30 կմ-անոց ճանապարհահատվածի հանձնումից հետո և այդ այլընտրանքային ճանապարհը, ինչպես պարզվեց,  անպիտան է՝ նույնիսկ մարդատար մեքենաների երթևեկության համար, էլ չենք խոսում  բեռնատարների և ռազմական տեխնիկայի տեղափոխման պարագայում, եթե, հանկարծ, Աստված մի արասցե, նորից պատերազմ սկսվի։

-Հասկանում եմ։ Դրա համար պատերազմը չպետք է պարտվեինք։

- Ի՞նչ է սպասվում Հայաստանին՝ աշխարհաքաղաքական և անվտանգային առումներով, եթե նախօրեին Բրյուսելում տեղի ունեցած պայմանավորվածություններն իրականություն դառնան։

-Չեմ կարող այդ հարցին պատասխանել, որովհետև բանակցային գործընթացին ամբողջական առումով, չեմ տիրապետում։

-Լավ, ավելի հստակեցնեմ հարցս՝ ի՞նչ փոփոխությունների պետք է պատրաստվի Հայաստանի Հանրապետությունը, եթե, հանկարծ, Տիգրանաշենի և Տավուշի, այսպես կոչված, անկլավները հանձնվեն ադրբեջանական կողմին։

-Թանկանալու են մեր լոգիստիկ ծառայությունները, սահմանափակվելու են մեր հաղորդակցման ուղիները, իսկ մեր կյանքը դրանից ավելի լավը չի դառնալու։

-Ձեր կարծիքով, ինչպե՞ս բրյուսելյան պայմանավորվածություններին կարձագանքի մեր ռազմավարական դաշնակից Ռուսաստանի Դաշնությունը։

-Ռուսաստանի Դաշնությունն աջակցելու է այն պայմանավորվածությանը, որ կնքելու են կողմերը, որովհետև այս ամենը Ռուսաստանի Դաշնության հետ որևէ կապ չունի։ Խոսքը երկու երկրների՝ Հայաստանի և Ադրբեջանի միջև կառուցվող հարաբերության մասին է։

- Բայց  այդ կառուցվող հարաբերությունն, ակնհայտ կերպով, վտանգում է Ռուսաստանի Դաշնության շահերին՝ Հարավային Կովկասում։

-Եկեք մենք Ռուսաստանի Դաշնության շահի մասին չմտածենք, այլ՝ մտածենք մեր շահի մասին։

-Բայց ո՞վ է ներկայացնում մեր շահը՝ վերոհիշյալ իրավիճակում։

- Հայաստանի Հանրապետության ղեկավարը։

- Հայաստանի Հանրապետության ղեկավարն, իսկապե՞ս, ներկայացնում է մեր շահը, պարոն Հակոբյան։

- Պետք է ներկայացնի…

- Այսօր իշխանության ներկայացուցիչները հայտարարել են, թե «Զանգեզուրի միջանցք» ասված երևույթ գոյություն չունի, այդպիսի բան չկա, պարզապես, Հայաստանը դառնում է խաչմերուկ… Անձամբ ես, սա չեմ հասկանում։ Կօգնե՞ք հասկանանք։

-Ես էլ չեմ հասկանում…

- Պարոն Հակոբյան, հետաքրքիր է իմանալ՝ ինչպե՞ս եք վերաբերում այն պրոցեսներին, որ վերջին շաբաթների ընթացքում տեղի են ունենում մեր քաղաքի փողոցներում, որովհետև հավաքական ընդդիմությունը, որ ղեկավարում է այդ պրոցեսներն ու շարժումը, հայտարարում է, որ այս ամենն արվում է՝ թույլ չտալու համար այն զարգացումները, որի մասին մենք մինչ այս պահը զրուցում էինք։

-Ես քաղաքականությամբ չեմ զբաղվում, հետևաբար, փողոցում կատարվող գործողությունները մեկնաբանել չեմ կարող։

Աղբյուր` Փաստինֆո