Փաստ ինֆո

Այն մարդիկ, ովքեր հասկանում են, որ այս իշխանությունների անգամ մեկ օր ավել մնալը երկրին վնասում է, թող դուրս գան փողոց, ինքնակազմակերպվեն։ Քիչ առաջ Ֆրանսիայի հրապարակում ընթացող համաժողովրդական հանրահավաքի ժամանակ նման հայտարարությամբ հանդես եկավ «Հայրենիք» կուսակցության նախագահ Արթուր Վանեցյանը։

«Առավոտյան բիրտ ուժ կիրառվեց, քանի որ այսքան մարդկանցով չէինք փակել փողոցները։ Եթե 1-2 օր մեզ ստիպենք արթնանալ առավոտյան ժամը 8-ին, որոշենք որ ուրիշ գործ չունենք անելու, մեր գործը Հայրենիքի պաշտպանությունն է, 2-3 օրում մենք այդ հարցը լուծելու ենք։ Այսօր ուսանողությունը միացավ մեր պայքարին։ Այսօր հրապարակում կան նաև շատ բժիշկներ, ուսուցիչներ, դասախոսներ, պետական համակարգի ծառայողներ, որոնք ինչ-ինչ պատճառներով չեն ուզում բարձրաձայնել, որ այստեղ են։ Մի՛ վախեցեք, սրանք այլևս իշխանություն չունեն, ում էլ այս երկու օրվա ընթացքում հասցնեն աշխատանքից ազատել, հավատացե՛ք բոլորը վերականգնվելու են, մեղավորներն էլ պատժվելու են»,-նշեց Վանեցյանը և հավելեց, որ հայ ազգի միասնականության դեմ ոչ ոք չի կարող գործել։

Ելույթի վերջում Արթուր Վանեցյանի հետ բազահազարանոց հանրահավաքի մասնակիցները վանկարկեցին՝ «Հայաստա՛ն, ոտքի՛», «Արցա՛խ, ոտքի՛», «հա՛յ ազգ ոտքի»՛։

Աղբյուր` Փաստինֆո