Փաստ ինֆո

Քաղաքացիներն այս պահին Ազատության հրապարակից, «Հայրենիք» կուսակցության ղեկավար Արթուր Վանեցյանի գլխավորությամբ, քայլերթով շարժվում են Ֆրանսիայի հրապարակ՝ միանալու համահայկական մեծ հանրահավաքին:

Լրագրողների հետ զրույցում Արթուր Վանեցյանը վերահաստատեց, որ այսօրվա հանրահավաքը բացառապես խաղաղ բնույթ է կրելու.

«Ես արդեն 14 օր է՝ փողոց եմ դուրս եկել, մենք որևէ ագրեսիա չենք արել, մենք խաղաղ անհնազանդության ակցիաներ ենք արել և շարունակելու ենք անել՝ ավելի ուժեղացնելով ճնշումը»-ասաց Վանեցյանը:

ԱԱԾ նախկին տնօրենը դիմեց իրավապահներին՝ հորդորելով նրանց գործել բացառապես իրենց լիազորությունների շրջանակներում.

«Ես համոզված եմ , որ մեր իրավապահ համակարգում մեծամասնությունը իրապես պետական մտածողություն ունեցող, հայրենասեր մարդիկ են, և իրենք գիտակցում են, որ չպետք է ոչ իրավաչափ ուժ գործադրեն ցուցարարների վրա, պարտավոր են ապահովել խաղաղ ցույցերի մասնակիցների անվտանգությունը, դա պետության ուղիղ պարտականությունն է: Եթե այստեղ լինեն սադրիչներ, դա միայն կարող են լինել իշխանությունից, քանի որ ժողովուրդն արդեն փողոցում է, իր խոսքն ասել է, մեծամասնությունն արդեն Փաշինյանի հրաժարականի շուրջ միավորվել է, ուստի սադրանք իրականացնելու միտք չկա, ոնց սկսել ենք, այնպես էլ հասնելու ենք ավարտին»-ասաց Ա.Վանեցյանը:

Խոսելով ընդդիմության հետագա քայլերի մասին՝ Արթուր Վանեցյանն ընդգծեց, որ բացառում է Նիկոլ Փաշինյանի կազմակերպած ընտրություններին կրկին մասնակցելը.

«Մի անգամ մասնակցել ենք իր կազմակերպած ընտրություններին, տեսել ենք՝ ինչ է լինում, դա բացառում ենք»,-ասաց նա:

Ա.Վանեցյանը հայտարարեց, որ այսօրվա հանրահավաքով մտնում են վճռական փուլ.

«Այսօր սկիզբ ենք դնում Չարի վերջին, հայ ազգի վերծնունդի, օրն է»,-հայտարարեց նա:

Աղբյուր` Փաստինֆո