Փաստ ինֆո

Արդեն 4-րդ օրն է՝ Ազատության հրապարակը դարձել է հանուն Հայաստանի և Արցախի մեկնարկած շարժման կենտրոնը։

Ապրիլի 17-ից «Հայրենիք» կուսակցության նախագահ Արթուր Վանեցյանը հայտարարեց, որ իր աշխատասենյակը տեղափոխվում է Ազատության հրապարակ, հաջորդ օրը պայքարին միացած 44-օրյայի մասնակցիներ Նվեր Կիրակոսյանն ու Արթուր Ավագյանը հացադուլ հայտարարեցին, նստացույցյին միացավ «Սև հովազ» ջոկատը։

Երեկ՝ ապրիլի 19-ից էլ «5165»-ը հայտարարեց կուսակցության գործունեության ժամանակավոր դադարեցման և շարժմանը միանալու մասին: Նույն օրը նստացույցին միացան նաև շարժման ավագ սերնդի ներկայացուցիչները՝ ազատամարտիկ Աշոտ Սևյանի գլխավորությամբ։

«Քաղաքացիների հոսքը շատ մեծ է։ Առավոտյան մայրերը, երեխաներին դպրոց, մանկապարտեզ տանելուց հետո, անցնում են հրապարակով, ողջունում մեր նախաձեռնությունը և իրենց աջակցությունը հայտնում։ Նկատելի է, որ հետզհետե ավելանում է նաև շարժմանը միացող երիտասարդնեի թիվը։ Այսինքն՝ տպավորությունը, թե մարդկանց չի հետաքրքրում երկրի վիճակը, սխալ է։ Մարդիկ հասկանում են, որ կորցնելով ազգային ինքնությունը, պետության ինքնիշխանությունը, չեն կարող ապրել իրեն ցերազած հայրենիքում»,- այսօր այս մասին ասաց «Հայրենիք» կուսակցության նախագահ Արթուր Վանեցյանը և կրկին հիշեցրեց, որ իրենց պայքարը հենց դրա համար է՝ ունենալ հզոր Հայաստան, հզոր Արցախ, չգնալ թշնամու կողմից պարտադրվող զիջողական քաղաքականության և կանգնեցնել այս իշխանությունների ազգակործան գործունեությունը։

Վանեցյանն ուշադրություն հրավիրեց այն փաստի վրա, որ Ազատության հրապարակ անցած երեք օրերի ընթացքում եկել են մեծ թվով մարդիկ, ովքեր երբևէ քաղաքականությամբ չեն հետաքրքրվել, ինչն էլ իր հերթին վկայում է թե այն մասին, որ մարդիկ մտահոգ են ստեղծված վիճակով, և որ՝ մեկնարկած շարժումը ապակուսակցական, համազգային պայքար է։

«Ես նստած եմ ՀՀ և Արցախի դրոշների տակ․ չկա այստեղ կուսակցական դրոշ, ես չեմ ասում եկեք միացեք ինձ, ուղղակի, եկեք և միացեք պայքարին՝ հանուն Հայաստանի, հանուն Արցախի։ Ազատության հրապարակում յուրաքանչյուր անձ, մարդկանց խումբ, որը կգա և նույն օրակարգով կանի իր անհնազանդության ակցիան, ես մենակ կողջունեմ և ուրած կլինեմ։ Ես չեմ ասում, թոր գան միանան ինձ։ Թող գան իրենց ակցիան անեն, միայն թե գան, լցնեն Ազատության հրապարակը, մարզերում իրենց քաղաքների, գյուղերի հրապարակները լցնեն։ Արցախից տեղահանված մեր քաղաքացիները թող բարձրաձայնեն, որ իրենց համար միևնույնը չէ երկրի ճակատագիրը»,-նշեց Վանեցյանը։

Վանեցյանը վստահեցնում է՝ շարժումը որևէ մեկի կողմից չի ուղղորդվում, այն բացառապես իրենց նախաձեռնությունն է, որի նպատակը Հայաստանն ու Արցախը փրկելն է։ Նա նաև հավաստիացրեց՝ շարժումը հաջողելու է, միայն թե յուրաքանչյուր քաղաքացի պետք է գիտակցի, որ ինքը մեծապես կարող է նպաստել այդ հաջողությանը՝ իր բողոքի գործողությամբ միանալով ընդհանուր պայքարին։

Աղբյուր` Փաստինֆո