Փաստ ինֆո

Դեկտեմբերի 4-ին ադրբեջանական գերությունից հայրենիք վերադարձած և այժմ մեղադրյալի կարգավիճակ ունեցող զինծառայողներից Ն. Ե.-ն չի կալանավորվի։ Երևանի ընդհանուր իրավասության դատարանը՝ դատավոր Գևորգ Պողոսյանի նախագահությամբ, մերժել է Ն. Ե.-ի նկատմամբ կալանավորումը որպես խափանման միջոց ընտրելու մասին ՔԿ ԶՔԳՎ ՀԿԳ վարչության ներկայացրած միջնորդությունը՝ նրա նկատմամբ այլ խափանման միջոցի հարցը թողնելով վարույթն իրականացնող մարմնի իրավասությանը։ Այս մասին «Փաստինֆո»-ի հետ զրույցում հայտնեց պաշտպան Կարմեն Պողոսյանը։

Հիշեցնենք, որ նոյեմբերի 16-ին ադրբեջանական ագրեսիայից հետո ՀՀ ՊՆ-ն հաղորդեց 13 գերեվարված և 24 անհետ կորած զինծառայողի մասին, սակայն Նիկոլ Փաշինյանն ավելի ուշ հայտնեց, որ անհետ կորած համարվող 24 զինծառայողները գերեվարվել են և շրջանառության մեջ դրեց «24+8» բանաձևը։ Դեկտեմբերի 4-ին ռուսական կողմի միջնորդությամբ Հայաստան է տեղափոխվել 10 ռազմագերի, որոնք գերեվարվել էին նոյեմբերի 16-ին՝ ՀՀ ինքնիշխան տարածքից՝ ադրբեջանական ագրեսիայի հետևանքով։

Գերությունից վերադառնալուց հետո զինծառայողները հարցաքննվել են ՔԿ-ում քննվող քրեական գործի շրջանակներում, իսկ երեկ արդեն հայտնի դարձավ, որ վերադարձած գերիներից մի մասին ձերբակալել են, ապա մեղադրանք առաջադրել՝ ՀՀ քրեական օրենսգրքի 365-րդ հոդվածի 3-րդ մասի հատկանիշներով՝ մարտական հերթապահության կամ ծառայության կանոնները խախտելը, որն առաջացրել է ծանր հետևանք։ Վարույթն իրականացնող մարմինը վերադարձած գերիներից 5-ի նկատմամբ կալանավորումը որպես խափանման միջոց ընտրելու մասին միջնորդություն է ներկայացրել դատարան։

Զինծառայողներից մեկի՝ Ն. Ե.-ի խափանման միջոցի հարցը դատարանը քննել է երեկ և մերժել. զինծառայողն այժմ ազատության մեջ է։ Փաստաբան Կարմեն Պողոսյանը «Փաստինֆո»-ի հետ զրույցում զերծ մնաց գործից մանրամասներ հայտնելուց՝ նշելով, որ դրանք նախաքննական գաղտնիք են պարունակում, մեղադրանքը նոր է առաջադրվել, գործի հանգամանքների և ցուցմունքների վերաբերյալ ոչինչ ասել չի կարող։ Փաստաբանը միայն հայտնեց, որ այդ պահին իր պաշտպանյալը եղել է դիրքի ավագ, կոչումով՝ մայոր է, հրամանատարի տեղակալ։ Քրեական գործի շրջանակներում Ն. Ե.-ն մեկ անգամ ցուցմունք է տվել՝ վկայի կարգավիճակով՝ կասկածանքի շուրջ, իսկ ինչ վերաբերում է մեղադրանքի շուրջ Ն. Ե.-ի դիրքորոշմանը՝ փաստաբանը զերծ մնաց մանրամասնելուց։

Հարցին՝ արդյո՞ք հայրենդարձված գերիների ձերբակալումը Հայաստանում չի վտանգի Ադրբեջանում գտնվող մյուս գերիների վերադարձի գործընթացին՝ Պողոսյանը մտահոգություն հայտնեց, որ բացասական ազդեցություն կունենա։

«Մեր գերիների կալանավորումն իրենք օգտագործելու են՝ Ադրբեջանում գտնվող գերիների համար՝ թե բարոյական, թե հոգեբանական ճնշման համար։ Ունենալու ենք բացասական հետևանքներ» ,- նշեց Պողոսյանը։

Նշենք, որ դատարանը մեղադրյալի կարգավիճակ ունեցող մեկ այլ հայրենադարձված ռազմագերու՝ Ս. Ա-ին կալանավորելու միջնորդությունը բավարարել է։

Հեղինակ՝ Իզաբել Սահակյան

Աղբյուր` Փաստինֆո