Փաստ ինֆո

Արցախից տեղահանվածները բողոքի ակցիա են իրականացնում Հանրապետության հրապարակի մոտ։ 

Հադրութից տեղահանվածներից մեկն ասաց, որ այսօր բողոքի ակցիային մասնակցում են հիմնականում Հադրութի բնակիչները, սակայն բոլոր բնակավայրերից տեղահանվածներին կոչ են արել հավաքվել։

«Մեր այսօրվա հիմնական պահանջը սոցիալական անարդարությունն է։ Բացի այդ կառավարությունից պահանջում ենք, որ մեզ փախստականի ստատուս տան, բայց դա էլ չի ստացվում։ Մինչև հուլիս երկու տեսակի սոցիալական աջակցություն էի ստանում, մեկը բնակարանների վարձեր, մյուսն էլ՝ 68 հազար դրամի աջակցությունը։ Հուլիսից կտրել են 68 հազար դրամի աջակցությունը, ընդ որում ժողովրդին տեղյակ չեն պահել, որ կտրում են։ Որոշ ժամանակ առաջ, որ դիմում էինք, ասում էին՝ դե հեսա կլինի, իսկ հիմա երբեմն զանգերին էլ չեն պատասխանում»,-ասաց հադրութեցին։

Վերջինս անդրադարձավ կառավարության նոր որոշմանը, որի համաձայն՝ մեկ շնչին 25 հազար դրամ են տրամադրելու, բայց նկատեց՝ Երևանի կյանքի արժողության այդ գումարը չի բավականացնի. «Այդ 25 հազարից մարդիկ պետք է տան վարձ վճարեն, ապրուստը հոգան»։

Հարցին՝ առաջարկե՞լ են իրենց Արցախ վերադառնալ, հադրութեցին նշեց, որ առաջարկ չկա, իրենք իրենց խոսում են։ Նրա կարծիքով առաջարկն այն կլինի, որ ժողովրդին հավաքեն, խոսեն նրանց հետ, քննարկեն ու ասեն, թե ինչ պայմաններով կարող են հետ վերադառնալ։

«Իրենք իրենց խոսում են, որ պայմաններ են ստեղծելու։ Ի՞նչ պայմաններ եք ստեղծելու։ Երեկվա դեպքի մասին լսել եք։ Չեմ հասկանում, էս ի՞նչ իշխանություն է, մարդուն ուղարկում ես թշնամու քթի տակ աշխատելու, գոնե մի զինվոր, զենքով մարդ չեն ուղարկում հետը։ Թշնամին էլ տեսնում է՝ դիմացը դիմադրություն չկա, սպանում է։ Կան ղեկավարներ, որ ասում են՝ թուրքի հետ պետք է համակերպվենք»,-նշեց հադրութեցին։

Աղբյուր` Փաստինֆո