Փաստ ինֆո

30 տարի շարունակ ասում էինք, որ հայրենիք ենք պարգևել մեր երեխաներին, բայց ստացվում է այնպես, որ գլխիկոր բեռ ենք պարգևել։ Այս մասին «Փաստինֆո»-ի հետ զրույցում ասաց ԱՀ ԱԺ պատգամավոր Մետաքսե Հակոբյանը։

Ինչպես արդեն տեղեկացրել ենք՝ երեկ Գորիս-Կապան ավտոճանապարհին ադրբեջանցիները կանգնեցրել են Արցախից մեկնող միկրոավտոբուսը, որի վրա պատկերված է եղել Արցախի դրոշը և Տատիկ-Պապիկի սիմվոլը, դանակով մաքրել են նշանը և դրոշը, ապա գոռգոռալով մեքենայից իջեցրել երեխաներին։

ԱՀ ԱԺ պատգամավոր Մետաքսե Հակոբյանը «Փաստինֆո»-ի հետ զրույցում հայտնեց, որ երեխաները բացարձակ վախեցած չէին, առավել ևս, երեխաներից մեկի հայրը զոհվել է պատերազմում։

«Իրենց մեջ ավելի շատ ցասում էր, ամոթ, ամոթ՝ այս իշխանությունների փոխարեն, քան մեկ այլ զգացում, որովհետև վախ բացարձակ չկար։ Երեխաները ցանկանում են շուտ մեծանալ, որ իրենց վրեժը լուծեն»,- նշեց Հակոբյանը։

Հակոբյանը գտնում է, որ միջադեպը նաև Արցախի ապիկար իշխանությունների հանցավոր անտարբերության, հանցավոր անգործության հետևանքով է։ Նրա դիտարկմամբ՝ անկախ նրանից՝ խաղաղ, թե պատերազմական ժամանակ է, երբ երեխաները, անչափահասներն առանց ծնողների ինչ-որ տեղ են գնում, ապա նրանց անպայման պետք է ուղեկցել ոստիկանական գոնե ինչ-որ խմբով։

«Հիշեցի, որ սեպտեմբերի 2-ին, երբ ՔՊ-ականներն ընդամենը 7 հոգով եկել էին Արցախ, 12 հոգանոց թիկնազորով էր ուղեկցում, այն պարագայում, երբ մեր երեխաներին նստեցրել են ավտոբուս, որի վրա Արցախի դրոշն էր և անց են կացնում այն անցակետով, որտեղ այսօր թուրքն է»,- նշեց Հակոբյանը։

Գորիս-Կապան ավտոճանապարհին ավտոբուսը կանգնեցնելու, դրոշը ջնջելու միջադեպին Ալեն Սիմոնյանն անդրադարձել էր՝ նշելով, թե դա լուրջ բան չէ, փոքր միջադեպ է, ոչ ոք չի կարող դրոշը ջնջել, մինչդեռ, Հակոբյանը հիշեցրեց, որ դեռևս մեկ տարի առաջ վերջինիս ղեկավարը (Նիկոլ Փաշինյանը հեղ.) աշխատանքից ազատեց անձին, երբ տեսել է, որ ՀՀ դրոշը գետնին է։

«Դա իրենց համար փոքր միջադեպ չէր, բայց որ թշնամին ջնջում է դրոշը, դա արդեն փոքր միջադեպ է։ Այսօր արդեն Հայաստանի դրոշն են ջնջում մեքենաների վրայից։ Սա են մեր իշխանությունները և այս ամենում ամենավատն ու սարսափելին այն է, որ փաստորեն, իրենք չխորշեցին հազարավոր երեխաների կյանքի թելը կտրել, դնել հողի տակ և այսօր դեռ շարունակում են խաղալ մեր երեխաների կյանքերի ու ճակատագրերի հետ, ինչին մենք երեկ ականատես եղանք։ Իրենց համար ոչ հայերենը, ոչ հայի երեխան արժեք չէ»,- ընդգծեց Հակոբյանը՝ հավելելով, որ զրուցել է ՄԻՊ-ի հետ, նրան ևս դեռ չի հաջողվել տեսնել երեխաներին, սակայն մոտակա օրերին և ՄԻՊ-ը, և՛ ինքը կայցելեն երեխաներին։

Հակոբյանը պարզաբանեց, որ դա որևէ կերպ քաղաքականության հետ կապ չունի, պարզապես ինքը՝ որպես մայր, ում որդին այդ երեխաների հասակակիցն է, պետք է անձամբ իր աչքերով տեսնի, թե ինչ վիճակում են այդ երեխաները, թեև վստահ է, որ իրենց մեջ ոգին կա։

Անդրադառնալով ադրբեջանցիների կողմից սադրանքներին, որի հետեւանքով հայ զինծառայող է վիրավորվել՝ Հակոբյանը նշեց, որ մեր զինծառայողը վիրավորում էր ստացել թիրախավորված՝ դիպուկահարի արձակած կրակոցից։ Նրա փոխանմամբ՝ այդ ուղղությամբ ռուս խաղաղապահները շատ կոշտ միջոցներ են ձեռնարկել։

«Վստահ եմ, որ մենք մոտ ժամանակներս դրա հետևանքները կզգանք, քանի որ սա ոչ թե սադրանք է Արցախի ժողովրդի նկատմամբ, հոգեբանական ճնշում, այլ՝ սադրանք է ռուս խաղաղապահի և ՌԴ-ի նկատմամբ, որովհետև թուրքն այս կերպ, նմանատիպ գործողություններով փորձում է ցույց տալ, որ ինքն է տերը՝ և Արցախում, և՛ Հայաստանում. Արցախում նմանատիպ սադրանքներ կատարելով, Հայաստանում՝ Գորիս- Կապան ճանապարհին իրենց տեր ու տիրական զգալով։ Այսինքն՝ իրենք սա անում են, որ ամեն կերպ նսեմացնեն ռուս խաղաղապահների ահռելի աշխատանքը, ինչն իրենք անում են և իսկապես կարողանում են խաղաղությունը պահպանել այս մի փոքր Արցախի վրա, բացառությամբ՝ այդ հատուկ արված սադրանքների։ Ամբողջ աշխարհին ուզում են ցույց տալ, որ այսօր ռուս խաղաղապահներն իրենց գործառույթները չեն կատարում, իրենց նպատակն է, որ ամեն միջոց օգտագործեն՝ ազատելու Արցախը ռուսների և ռուս խաղաղապահների ներկայությունից»,- նշեց նա։

Աղբյուր` Փաստինֆո