Փաստ ինֆո

«Հայաստան» դաշինքը մի շարք ապացույցներ է ներկայացրել ՍԴ, այդ թվում՝ կրիչներով, քանի որ խոսքը գնում է տեսանյութերի մասին, ներկայացվել է 109 ընտրատեղամասերի արդյունքների վերաբերյալ վերլուծությունը, որը վերաբերում է շուրջ 88 հազար ձայնի, որոնցից 4 հազար ձայնի մասով չկար ստորագրություն։ Այս մասին հրավիրված մամուլի ասուլիսին ասաց «Հայաստան» դաշինքի ներկայացուցիչ Արամ Վարդևանյանը։

«Նժարի վրա դրված էր 88.000 քվե, բայց պարզվում է, որ 88.000-ից 4.000-ը բացակայում է»,- նշեց Վարդևանյանը։

Բացի դա՝ Վարդևանյանը նշեց, որ մոտ 30-40 ընտրական տեղամասերի մասով ուսումնասիրությունների արդյունքում իրավիճակներ են եղել, երբ ստորագրման մատյանի էջերից մի քանի հատ է եղել, նույնը՝ տպված, բայց ունեցել է տարբեր բովանդակություն։ Ինչ վերաբերում է վարչապետի պաշտոնակատարի ինստուտին, երբ վերջինս հրաժարական է տալիս, Վարդևանյանը նշեց, որ մի ամբողջ շղթա է բացահայտվել. «Վարչապետի պաշտոնակատարի կարգավիճակն այդպես պահպանվեց, ի հակադրումն իրավաբանական համայնքի կարծիքին, մեկ նպատակով՝ վարչական ռեսուրսի չարաշահման։ Այս շղթան ևս բացահայտել ենք»։

Վարդևանյանն ընդգծեց, որ առաջին անգամ արձանագրվել է վարչական ռեսուրսի չարաշահումը՝ իշխանության կողմից։

Բացի դա՝ Վարդևանյանը մատնանշեց նաև ատելության խոսքի շղթան, մասնավորապես, նշեց, որ ցանկացած քաղաքական ուժ կարող է ագրեսիվ հռետորաբանություն ցուցաբերել, մինչդեռ այն, ինչ տեսնում էինք իշխանական դիրքից հանդես եկող պատգամավորի թեկնածուի կողմից, ով զուգահեռաբար նաև վարչապետի պաշտոնակատարն էր, ատելության խոսքի ծավալն անգերազանցելի էր։

Աղբյուր` Փաստինֆո