Փաստ ինֆո

Տարեց կնոջ սպանության գործով որպես մեղադրյալ անցնող Գարիկ Մաշադյանը, որը ՊԵԿ նախագահի առաջին տեղակալի Ռաֆիկ Մաշադյանի եղբայրն է և Աննա Հակոբյանի ազգականը, արդեն ութ ամիս է, ինչ գտնվում է դատապարտյալների հիվանդանոցում, մինչդեռ՝ քրեական գործում առկա չէ որևէ փաստաթուղթ՝ նրա հիվանդությունների վերաբերյալ։ Տուժողի իրավահաջորդի ներկայացուցիչ, փաստաբան Վահան Հովհաննիսյանը «Փաստինֆո»-ի հետ զրույցում մտահոգություն հայտնեց առ այն, որ տարեց կնոջ սպանության գործով տուժողի ընտանիքը հերթական հարվածն է ստանում։

Հիշեցնենք, որ ըստ մեղադրանքի՝ հոկտեմբերի 21-ի՝ ժամը 20։00-ի սահմաններում Գարիկ Մաշադյանը մուտք է գործել Վարդաշեն փողոցի տարեց բնակիչ Ցողիկ Բադիկյանի տուն, պահանջել ենթադրաբար օգոստոս ամսին իր կողմից տրված ոսկյա խաչը, ինչը Ցողիկ Բադիկյանը չի վերադարձրել այն, որի ընթացքում ծագել է վիճաբանություն ու Մաշադյանը մի քանի անգամ դանակով հարվածներ է հասցրել տարեց կնոջն ու սպանել։

Տուժողի դին հայտնաբերվել է հոկտեմբերի 22-ին՝ ժամը 00.00-ի սահմաններում,ամուսնու կողմից։ Ժամանել են ոստիկանները, կատարել դեպքի վայրի զննություն և դեպքի առթիվ քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 8-րդ կետով, այսինքն՝ ավազակային հարձակմամբ զուգորդված սպանություն, սակայն Մաշադյանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով՝ դիտավորյալ սպանության համար՝ առանց հափշտակության նպատակի։ Փաստաբանի խոսքով՝ դեպքի վայրի զննության արձանագրությունից պարզ է դարձել, որ բնակարանից հափշտակվել են ոսկյա զարդեր և կանխիկ գումար եւ գողության դեպքի առթիվ հարուցվել է քրեական գործ։

Փաստաբան Վահան Հովհաննիսյանը «Փաստինֆո»-ի հետ զրույցում հիշեցրեց, որ քրեական գործի ողջ նախաքննության կամ դատաքննության ընթացքում Գ․Մաշադյանը երբևէ չէր հայտնել, որ տառապել կամ տառապում է որևէ հիվանդությամբ։

«Նրա հիվանդության վերաբերյալ որևէ փաստաթուղթ առկա չէ քրեական գործում։ Նման պայմաններում Մաշադյանը արդեն ութ ամսից ավել իր հանգիստն է վայելում դատապարտյալների հիվանդանոցում։ Այստեղ հետաքրքիր է հետևյալ հանգամանքը, որ բոլոր ՔԿ հիմնարկները ունեն բուժմասեր, որտեղ ըստ անհրաժեշտության բժշկական օգնություն է ցուցաբերվում հիմնարկներում պահվող անձինք։ Դատապարտյալների հիվանդանոցում մահճակալների սակավության պատճառով տեղափոխվում են միայն ծանր հիվանդություններ ունեցող կամ ծայրահեղ ծանր վիճակում գտնվող անձինք և բուժվելուց անմիջապես հետո կրկին վերադարձվում ՔԿ հիմնարկ»,- նշեց փաստաբանը՝ հավելելով, որ նման պայմաններում Մաշադյանը առանց որևէ հիվանդության տևական ժամանակ գտնվում է այդ հիվանդանոցում։
Տուժող կողմը գտնում է, որ վերջինիս տեղափոխելու խնդիրը կարգավորվել է նրա ազգականների կողմից, այդ մասով առերևույթ առկա են հանցագործության հատկանիշներ, որի վերաբերյալ նաև հանցագործության մասին հաղորդում են ներկայացնելու։

Փաստաբանը հիշեցրեց, որ Գարիկ Մաշադյանի հարազատ եղբայրը՝ Ռաֆիկ Հարությունի Մաշադյանը, ՀՀ ՊԵԿ նախագահի 1-ին տեղակալն է, վերջինիս որդին Հարություն Մաշադյանը հանդիսանում է Երևանի կայազորի դատախազության դատախազ, ՀՀ վարչապետ Նիկոլ Փաշինյանի կինը Աննա Հակոբյանը հանդիսանում է Գարիկ Մաշադյանի ոչ հարազատ մորեղբոր աղջիկը։

«Մաշադյանը դանակի երեք տասնյակ հարված էր հասցրել թոշակառու կնոջը և դանակով կտրել նրա պարանոցը։ Սկզբում, երբ դեռ բացահայտված չէր հանցագործություն կատարողի անձը, դեպքը որակվել էր ՀՀ քրեական օրենսգրքի 104-րդ հոդվածի 2-րդ մասով։ Այն բանից հետո երբ պարզվել էր, որ հանցանքը կատարվել էր Մաշադյանի կողմից, միայն վերջինիս ցուցմունքի հիման վրա, դեպքից երկու օր անց նրա արարքը վերաորակվել էր ՀՀ քրեական օրենսգրքի 104-րդ հոդվածի 1-ին մասով, ինչն աբսուրդ է։ Այս բառը չեմ սիրում, բայց դատարանում և բոլոր հնարավոր կառույցներում ասել եմ, որ եթե ՀՀ-ում կգտնվի թեկուզ մեկ նման գործ, երբ անձի արարքը, նման փաստական հանգամանքների պայմաններում, այդպես որակված լինի, ես վայր կդնեմ փաստաբանի արտոնագիրս»,- ընդգծեց փաստաբանը՝ հավելելով. «Շատ կցանկանայի հանդիպել արդարադատության նախարարին, նայել դեմքին ու այս ամեն ինչի պատճառի վերաբերյալ հարց տալ։ Տեսնեմ իր միատոն ձայնով ինչ պետք է պատասխաներ»։

Նշենք, որ քրեական գործը գտնվում է դատաքննության փուլում, փաստաբանի փոխանցմամբ՝ այս ընթացքում Գարիկ Մաշադյանը ներկայացել է դատական նիստերին, այսինքն՝ անգամ առերևույթ որևէ հիվանդություն չունի։

Հետաքրքվեցինք՝ արդյոք փաստաբանական հարցում է իրականացվել կամ միջնորդություն ներկայացվել է՝ առողջական վիճակի վերաբերյալ փաստաթղթեր տուժող կողմին տրամադրելու վերաբերյալ, ինչին ի պատասխան Հովհաննիսյանը նշեց, որ քրեական գործի ողջ նյութերը հետազոտվել են դատարանում, բժշկական փաստաթղթեր իր վերաբերյալ չկան։

«Իր առողջական վիճակի վերաբերյալ նաև ինքը որևէ բան չի հայտնել։

Եթե թեկուզ որևէ հիվանդություն ունենար, գոնե մեկ փաստաթուղթ ներկայացրած կլինեին քննիչին կամ դատարանին, նշանակված կլիներ փորձաքննություն և այլն, որևէ բան չկա կատարելապես առողջ մարդ է։ Եվ հետո, եթե ծայրահեղ ծանր այնպիսի հիվանդ է, որ անհրաժեշտ է եղել նրան ութ ամիս տեղավորել հիվանդանոցում, ինչպես է գալիս և մասնակցում նիստերին»,- նշեց փաստաբան Վահան Հովհաննիսյանը։

Հեղինակ՝ Իզաբել Սահակյան

Աղբյուր` Փաստինֆո