Փաստ ինֆո

Իշխանություններն անցել են բացահայտ ստի և կեղծիքի: Իրավիճակը աբսուրդային է, ադրբեջանական զորքը եկել է Հայաստանի տարածք և մեր բանակն չի էլ դիմադրում: Ես կարծում եմ, որ ադրբեջանական զորք մտցնելով Հայաստանի տարածք Ալիևը ուզում է, որ Փաշինյանը իրեն վերադարձնի Տավուշի գյուղերը։ Այս մասին մամուլի ասուլիսի ժամանակ ասաց մեդիափորձագետ Տիգրան Քոչարյանը:

Նա անդրադարձավ երեկվա տեսագրությանը, որտեղ ադրբեջանցի զինվորները ստորացնում են հայ զինվորներին, նշելով, որ այսպիսի բան վերջին 30 տարիների ընթացքում մենք չենք տեսել:

«Առաջ հայ զինվորը անգամ առանց զենքի կարող էր կռվել թուրքի դեմ, այսպիսի մարտական ոգի էր մեզ մոտ: Ուզում եմ նաև զգուշացնել սփյուռքում ապրող մեր հայրենակիցներին, որ ադրբեջանցիները փորձելու են ձեզ թուլացներ, բիզնեսներ խլել ձեզանից և սա շարունակական է լինելու, քանի որ Հայաստանում նստած է մի իշխանավոր, որը պատրաստ է ամեն ինչ զիջել, որպեսզի մեկ օր ավել մնա իշխանության»,-նկատեց մեդիափորձագետը:

Քոչարյանի կարծիքով, տարբեր ուժեր, այդ թվում Փաշինյանը, փորձում են այնպես անել, որ ընտրությունները չկայանան:

«Այսօր Փաշինյանին պատկանող թերթը նշեց, որ նա 50% չի հավաքում և անգամ նա քարոզչություն չի կարող անցկացնել: Այժմ կա սահմանների խնդիր և նա չի կարողանում այս հարցերը լուծել: Կարծում եմ, հասկանալով,  որ Փաշինյանը չի ընտրվի, Ալիև-Փաշինյան զույգը այժմ փարձում է մաքսիմալ շահ ստանալ մինչև ընտրությունները: Քանի որ ընտրություններից հետո հնարավոր է, որ որոշ պայմանավորվածություններ չեղարկվելու են և անիվը հակառակ կողմն է պտտվելու»,- ասաց մեդիափորձագետը:

Քոչարյանը անդրադարձավ նաև այն փաստաթղթին, որը Փաշինյանը պատրաստվում է ստորագրել Ադրբեջանի հետ:

«Այդ փաստաթղթում խոսքը գնում է առաջին արցախյան պատերազմում Տավուշում ազատագրած որոշակի տարածքների մասին, մոտավորապես 7-8 գյուղ: Իսկ իշխանությունը հետո կնշի, որ դա խորհրդային Ադրբեջանի հողերն են: Սակայն հարց է առաջանում, այս գյուղերը ինչու են ազատագրվել: Որպեսզի ապահովեն Իջևանի շրջանի անվտանգությունը, եթե մենք հանձնենք նրանք, հայկական գյուղերը այլևս ապահով չեն լինելու: Փաստորեն Սյունիքը դարձել է ոչ անվտանգ, իսկ շուտով անվտանգ չի լինի նաև Տավուշը: Իսկ ամենաշատը նրանք ուզում են վերցնել Տիգրանաշեն գյուղը, որը հայկական անկլավ է Նախիջևանի մոտ»,- շեշտեց նա:

Մեդիափորձագետի դիտարկմամբ, Մեղրիի միջանցը կառուցելու դեպքում, այն չի վերահսկվելու ադրբեջանացիների կողմից, իսկ որպեսզի հակառակորդը որևէ երաշխիք ունենա, որ ճանապարհն անվտանգ է, փորձում են Երևան-Գորիս ճանապարհի վերահսկողությունը վերցնել իրենց տիրապետության տակ։ 

Քոչարյանի կանխատեսումներով, հնարավոր է Փաշինյանին, հաշվի առնելով այն, թե նա ինչքան բան է տալիս, վերադարձնեն գերիներին և Արծվաշեն գյուղը: Սակայն մեդիափորձագետը կարծում է, որ Արծվաշենը անհնար է պահել, քանի որ այդ գյուղը շրջապատված է ադրբեջանական գյուղերով:

«Մենք հիմա չենք կրակում ադրբեջանցիների վրա, ուզում ենք, որ ռուսները գան ու կրակեն: Իսկ եթե դա տեղի կունենա, ապա Ալիևը միանգամից կպահանջի, որպեսզի ռուս խաղաղապահները հեռանան Արցախից: ՉԷ որ Փաշինյանը Արցախը ամբողջությամբ չի հանձնել, ադրբեջանցիները կհեռանան ՀՀ տարածքից, բայց պատասխանը շատ կոշտ է լինելու»,- ասաց մեդիափորձագետը:

Աղբյուր` Փաստինֆո