Փաստ ինֆո

Կարծում եմ՝ սխալ է, որ հայկական լրատվամիջոցները լուսաբանել են Բաքվում կայացած ցուցահանդեսը, քանի որ այդ ցուցահանդեսի նպատակներից մեկն էր այդ իրադարձությունը բերել հայկական տեղեկատվական դաշտ, - այս մասին «Փաստինֆո»-ի հետ զրույցում ասաց մեդիափորձագետ Տիգրան Քոչարյանը:

Նշենք, որ այսօր Բաքվում բացվել է Ղարաբաղյան պատերազմի ռազմավարների պուրակ, որտեղ ցուցադրվում է մարտական գործողությունների վայրից առգրավված ռազմական ավարը՝ հայկական արտադրության պահածոներ, սնունդ, զինատեսակներ, զինվորների մանեկեններ:

Քոչարյանը նկատեց, որ նպատակներից մեկն էր` զոհվածների և գերեվարվածների ընտանիքներին ևս մեկ անգամ ցավ պատճառելը, հետեւապես հայկական կողմը ճիշտ կլիներ ընդհանրապես չլուսաբաներ այդ ցուցահանդեսը:

Այդուհանդերձ, փաստ է պուրակի գոյությունը, որտեղ մանեկեններով փորձ է արվել արժեզրկել հայ զինվորի կերպարը, հայի նկարագիրը եւ այս համատեքստում Հայաստանի իշխանությունները խոսում են Ադրբեջանի և Թուրքիայի հետ հարաբերությունները լավացնելու մասին։

«Ես պահանջում եմ, որ իշխանությունը օր առաջ հեռանա, քանի որ այս ղեկավարությունն ունի պարտվածի հոգեբանություն: Նրանք պարտվել են և ջախջախվել են, մենք ունենք խայտառակ պարտություն այս իշխանությունների վարած քաղաքականության պատճառով: Այս իշխանությունը հիմա չի կարող բանակցել, չի կարող ինքնուրույն քաղաքականություն վարել, քանի որ իր մեջ մտած է պարտվողի հոգեբանությունը: Իսկ Ադրբեջանը և մյուս երկրները այս իշխանությունները վերաբերում են որպես պարտվածների: Եվ երբ այս Հայաստանի ղեկավարությունը խոսում է Ադրբեջանի և Թուրքիայի հետ հարաբերությունները վերանայելու մասին, դա պարտվողական քաղաքականության շարունակությունն է:

Ադրբեջանա-թուրքական մենթալիտետ ունեցող երկրներում դա ընկալվում է ոչ թե որպես դրական քայլ, այլ որպես ինքնանվաստացում այդ երկրի կողմից: Նրանք համարում են, որ կարելի է այլ պայմաններ բարդել այդ երկրի վրա: Եթե Հայաստանում մտածում են, որ այդպես մենք խաղաղություն ենք ձեռք բերելու, ապա ասեմ, որ դա սխալ է: Իրականում նման հայտարարություններով Հայաստանը ավելի է խրվում պարտվածի դերի մեջ»,- նշեց Քոչարյանը:

Անի Մշեցյան

Աղբյուր` Փաստինֆո