Փաստ ինֆո

Ռուսաստանը միակ երկիրն է, որն ունի մեխանիզմներ գերիների վերադարձին աջակցելու, իսկ Հայաստանում տարվող հակառուսական քարոզչությունը կարող է ինչ-որ պահի ազդել գերիների վերադարձի վրա և խնդրահարույց դառնալ Ռուսաստանի հետ հարաբերություններում: Այս մասին «Փաստինֆո»-ի հետ զրույցում ասաց քաղաքագետ Հրանտ-Մելիք Շահնազարյանը:

Հիշեցնենք, որ երեկ Հայ գերիների ու տեղահանված անձանց հարցի քննարկումը ներառվեց ԵԽԽՎ լիագումար նիստի օրակարգ: Հարցը օրակարգ ներառելուն դեմ էին քվեարկել Ադրբեջանի ու Թուրքիայի պատվիրակները, նաև Ռուսաստանի 5 պատգամավորներ, իսկ 7 պատգամավոր էլ ձեռնպահ է քվեարկել:

Նկատենք, որ քվեարկությունը վերաբերվել է ոչ թե առանձին գերիների հարցին, այլ ընդհանուր օրակարգային փաթեթին, որտեղ ընդգրկված է եղել նաեւ Ռուսաստանի դեմ երկու հարց, այդ թվում՝ Նավալնուն վերաբերող, ինչին էլ Ռուսաստանը դեմ է քվեարկել։
ԵԽԽՎ-ում Ռուսաստանի պատվիրակության քվեարկությունը Հայաստանում տարբեր քննարկումների առիթ է դարձել՝ ներկայացնելով, թե Ռուսաստանը դեմ է քվեարկել հայերի համար այդքան կարեւոր հարցին՝ չմանրամասնելով, որ փաթեթի մեջ եղել են նաեւ հակառուսական հարցեր։

Քաղաքագետ Հրանտ-Մելիք Շահնազարյանը մեզ հետ զրույցում նկատեց, որ մերձիշխանական տարբեր շրջանակներ այս հարցը դարձրել են շահարկումների առիթ և հակառուսական քարոզչություն են իրականացնում.

«Տարբեր շրջանակներ շահարկում են ԵԽԽՎ-ում ռուս պատվիրակության քվեարկությունը: Այն, որ Հայաստանում կան հակառուսական գործող ուժեր, դա փաստ է, և նրանք տարիներ շարունակ ծավալել են այդ գործունեությունը: ԵԽԽՎ օրակարգում ռազմագերիների հարցին զուգահեռ ընդգրկված էր նաև Նավալնու հարցը, ինչպես նաև Ռուսաստանից բխող սպառնալիքներ Եվրոպայի համար ձևակերպմամբ հարց, բնական է, որ ռուսներն ընդհանուր օրակարգին դեմ էին քվեարկելու, ինչպես նաև բնական է, որ հայկական պատվիրակությունը կողմ է քվեարկել ռազմագերիների հարցին: Եթե մտնենք շահարկումների դաշտ, Ռուսաստանն էլ կարող է բողոքել, որ Հայաստանը կողմ է քվեարկում Ռուսաստանին ագրեսոր կոչելու օրակարգին, բայց տրամաբանող մարդիկ բոլորը հասկանում են, որ վերահսկվել է ոչ թե օրակարգի առանձին հարցին, այլ ՝ ամբողջ օրակարգը միասին վերցված: Ամեն պետություն իր երկրի շահերից բխող քվեարկություն է կատարել, այլ հարց է, որ քվեարկությունից հետո կլինեն քննարկումներ, այնտեղ պետք է հետևել, թե որ երկիր, իրեն ինչպես է պահում»,-ասաց Շահնազարյանը, համոզմունք հայտնելով, որ Ռուսաստանի դիրքորոշումն այս հարցով լինելուն է հումանիտար և պրոհայկական:

« Ինչ վերաբերվում է ներքին շահարկումներին, սա նույն այն շրջանակն է, ինչը երկիրը հասցրեց պատերազմի, փչացրեց հարաբերություները դաշնակցի հետ, ինչի արդյունքում էլ ունեցանք ողբերգական արդյունքով պատերազմ: Նրանք ժամանակին ՌԴ դեսպանատան մոտ էին ցույցեր անում, ռազմաբազաների դիմաց էին ցույցեր անում, վիրավորական արտահայտություններ էին անում ռուսների հասցեին, այդ նույն շրջանակները հիմա էլ նման տեղեկություններ են տարածում»,-ասաց զրուցակիցը:

Քաղաքագետի կարծիքով՝եթե հակառուսական քարոզչությունը դառնա օրակարգային Հայաստանում, ապա դա ազդելու է ոչ միայն հայ-ռուսական հարաբերությունների վրա, նաև խոչընդոտելու է ռազմագերիների վերադարձի գործընթացին.

«Ռուսաստանը միակ երկիրն է, որն ունի մեխանիզմներ գերիների վերադարձին աջակցելու, իսկ Հայաստանում տարվող հակառուսական քարոզչությունը կարող է ինչ-որ պահի ազդել գերիների վերադարձի վրա և խնդրահարույց դառնալ Ռուսաստանի հետ հարաբերություններում: Ռուսաստանը կարող է պատասխան պահանջել հակառուսական դիրքորոշումների համար, հատկապես, որ քննադատողները մերձիշխանական շրջանակներն են, եթե նրանք կարողանան հակառուսական օրակարգը գերակայող դարձնել Հայաստանում, մենք կկորցնենք Ռուսաստանին՝ որպես դաշնակից՝ դրանից բխող անվտանգային, տնտեսական հետևանքներով»,-ասաց Շահնազարյանը:

Հարցին՝ թե իր գնահատմամբ ու՞մ կողմից է ուղղորդվում քարոզչությունը, քաղաքագետն արձագանքեց.

«Չգիտեմ՝ ում կողմից է ուղղորդվում՝ Թուրքիայի, Ադրբեջանի Սորոսի, Արևմուտքի: Այս իշխանությունները պատրաստ են բոլորի հետ համագործակցել՝ ի հակառակ Հայաստանի և հայ ժողովրդի շահերի: Թուրքիայի խնդիրն է Ռուսաստանին տարածաշրջանից դուրս մղելը:

Թուրքիան, Ադրբեջանի հետ համագործակցելով, արդեն կարողացել է լուրջ հաջողության հասնել Արցախում, Կովկասում դարձել է ոչ միայն քաղաքական, նաև՝ ռազմական գործոն, փորձելու են զարգացնել այդ հաջողությունը և էլ ավելի մեծացնել իրենց դիրքերը, այս ամենը միանշանակ արվելու է Ռուսաստանի հաշվին»-ասաց Շահնազարյանը:

Աղբյուր` Փաստինֆո