Փաստ ինֆո

«Առաջին հերթին՝ մեր երկիրն այս իրավիճակում հայտնվեց դավաճանության հետևանքով՝ այլ կերպ ասած, տեղի է ունեցել պետական դավաճանություն: Դրանից հետո, կազմալուծված պետական համակարգի պայմաններում, բնական է, որ հասարակության մեջ առկա մեծաթիվ և, հիմնականում, ցավոտ հարցեր պատասխաններ չեն ստանում, ինչն էլ պետք է հանգեցներ այս իրավիճակին, ինչի ականատեսն ենք մենք հիմա,- ասում է ռազմական փորձագետ Տիգրան Աբրահամյանը, «Փաստինֆո»-ի հետ զրույցում անդրադառնալով այս պահին Պաշտպանության նախարարության դիմաց անհետ կորած զինծառայողների ծնողների ակցիային, որ անցնում է խիստ լարված մթնոլորտում, - օրեր շարունակ որեւէ պատկան մարմին չկարողացավ հստակ և սպառիչ պատասխաններ տալ անհետ կորածների ծնողներին, թե որտե՞ղ են իրենց զավակները և ի՞նչ պայմաններում: Հիմա, երբ նրանք արդեն Պաշտպանության նախարարության դիմաց են և փորձում են լարված մթնոլորտի պայմաններում ստանալ այդ պատասխանները, ինձ համար սա անսպասելի չէր»:

Անդրադառնալով Կապանի ուղղությամբ այս պահին Զանգիլանի տարածքների հանձնման մասին լուրերին, ռազմական փորձագետը պատասխանում է՝ տեղի են ունենում նոյեմբերի 9-ին ստորագրված ողբերգական և նվաստացուցիչ համաձայնագրի երկրորդ փուլի իրականացման աշխատանքները. «Այսօրինակ գործողություններ մենք տեսնում ենք ոչ միայն Սյունիքի հարակից սահմանների տարածքներում, այլ տեսանք նաև Հադրութի շրջանի երկու գյուղերի պարագայում, ինչպես նաև՝ Շուշիի ձորակի գյուղերում: Այս ողբերգական կորուստները կշարունակվեն այնքան ժամանակ, քանի դեռ իշխանության ղեկին երկիրն ու պետությունը դավաճանած իշխանություններն են: Հակված եմ հավատալու, որ բացի մեզ արդեն հայտնի համաձայնագրից, Ալիևի և Փաշինյանի միջև գոյություն ունի նաև համաձայնագրի գաղտնի հավելված, որի շրջանակներում թշնամին իրեն թույլ է տալիս այս կամայականությունները»:

Անդրադառնալով համացանցում երեկվանից շրջանառվող լուրերին, թե Արցախի՝ Հին Թաղեր և Խծաբերդ գյուղերի տարածքում գտնվող զինծառայողներին նախօրեից զինաթափել են, իսկ արդեն երեկվանից նրանք հայտնվել են ադրբեջանական կողմի շրջափակման, այնուհետև նաև գերության մեջ, Տիգրան Աբրահամյանն ասում է՝ նկատենք, որ հայկական կողմը մինչ այս պահը չի հրապարակել պաշտոնական տեղեկատվություն այն մասին, թե քանի՞ զոհված, վիրավոր և անհետ կորած զինծառայող և հայրենիքից ունենք մենք պատերազմական գործողություններից հետո.«Այդ թվերին, որոշակիորեն տիրապետում է «Կարմիր խաչ»-ի միջազգային կոմիտեն: Իսկ թե ինչո՞ւ դրանք հասանելի չեն դառնում նաև հայ հասարակությանը, չեմ կարող հստակ պատասխանել: Ակնհայտ է մի բան՝ իրավիճակի առումով առաջիկայում փոփոխություն սպասելն անիմաստ է, որովհետև օրվա իշխանությունն, ինչպես տեսնում ենք, հակված չէ որևէ ձվով հարցի շուրջ պարզաբանում մտցնել: Սա ակնհայտ կերպով չի բխում իր շահից, իսկ իր շահն, այս պահի դրությամբ, ամեն կերպ և ամեն գնով իշխանությունը ևս մի որոշ ժամանակ իր ձեռքում պահելու գերխնդիրն է: Ուրիշ ոչնչով, ըստ էության, այս իշխանությունն արդեն երկար ժամանակ ուղղակի չի զբաղվում»:

Պարտված երկրի ղեկավարն այլևս որևէ ասելիք կամ անելիք չունի, նա պետք է հեռանա: Այս մասին՝ արդեն ավելի քանի մեկ ամիս բարձրաձայնում է հանրությունն ու այդ հանրության ամենատարբեր շերտերը, ասում է Տիգրան Աբրահամյանն ու հավելում . «Նիկոլ Փաշինյանը համառորեն չի ցանկանում հասկանալ, որ ժողովուրդն իրենց այլևս չի վստահում և չի ցանկանում տեսնել իշխանության ղեկին: Արդյունքում, այս մարդն իր մեջ է կուտակում ներսի ողջ բացասական էներգիան, և արտաքին ուժերի դեմ օգտագործելու փոխարեն, ուղղում այն սեփական հանրության վրա, այն հանրության, ով անմիջականորեն իր վրա է կրում ապաշնորհ ղեկավարի վարած քաղաքականության բոլոր պտուղներն, այդ թվում նաև՝ պատերազմի խայտառակ պարտության բեռն ու ամոթը»:

Ի վերջո, ինչո՞ւ չի հեռանում պարտված Փաշինյանը: Տիգրան Աբրահամյանը դժվարանում է պատասխանել հարցին. «Բոլոր տեսակի տրամաբանությամբ, գրված և չգրված օրենքներով, նա նոյեմբերի 9-ին պետք է վայր դներ իր լիազորությունները: Ակնհայտ է, որ նրա իշխանության ամեն ժամը մեզ նոր ու անդառնալի կորուստների առաջ է կանգնեցնում բոլոր առումներով՝ և´ տարածքային, և´ ներքաղաքական, և´ բարոյական առումներով»:

Հեղինակ՝ Նվարդ Մանվելյան

Աղբյուր` Փաստինֆո