Փաստ ինֆո

Այն, ինչ երեկ մամուլի ասուլիսի ժամանակ հայտարարել եմ, միշտ եմ ասել։ Ինչու՞ է Գլխավոր դատախազը կամ ՀՔԾ-ն ուշ արձագանքում։ «Փաստինֆո»-ի հետ զրույցում այս մասին ասաց «Ազգային անվտանգություն» կուսակցության նախագահ Գառնիկ Իսագուլյանը։

Նշենք, որ Գառնիկ Իսագուլյանը նախօրեին տեղի ունեցած ասուլիսում մի շարք աղմկահարույց հայտարարություններով էր հանդես եկել, որոնց համաձայն՝ հակառակորդի 400 հոգանոց խումբը Հադրութ քաղաք է մտել թիկունքից՝ Նախիջևանից Քաջարանով անցել է Արցախ և առանց խոչընդոտ գնացել են մինչև Հադրութի թիկունք, որ ԱԱԾ այն ժամանակվա տնօրեն Արգիշտի Քյարամյանը և անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների։ Բացի այդ նշել էր, որ Շուշիում հայերը կրակել են միմյանց վրա՝ առանց այդ մասին իմանալու։

Այսօր դատախազությունը հայտարարեց, որ ասուլիսի վերաբերյալ հրապարակումները ՀՀ գլխավոր դատախազությունը ՀՔԾ է ուղարկել։ «Փաստինֆո»-ի հետ զրույցում Գագիկ Իսագուլյանը նշեց, որ իրեն որևէ բանի մասին տեղյակ չեն պահել։

Հարցին՝ արդյոք հրավիրվե՞լ է բացատրություն տալու, Գառնիկ Իսագուլյանն արձագանքեց. «Ինչի՞ համար պետք է բացատրության հրավիրեն։ Այդ հայտարարությունները հիմա բոլորն են անում։ Այն, ինչ ես երեկ ընդհանրացրել եմ, այդ ամենի մասին արդեն 2.5 տարի ասում եմ։ Չեմ կարծում՝ ինչ-որ բան կա, որ նոր եմ ասել և հանկարծ իրենք ուշքի են եկել։ Դրանք ասվել են միշտ, ինչու՞ է դատախազը կամ ՀՔԾ-ն ուշ արձագանքել կամ երկրի թիվ մեկ դավաճանը չի հանձնարարել դա անել։ Սա մի նպատակ ունի՝ փրկել իրենց»,-ասաց Գառնիկ Իսագուլյանը՝ հավելելով, որ չի պատրաստվում ո՛չ ՀՔԾ-ին, ո՛չ դատախազությանը բացատրություն տալ, քանի որ կարծում է՝ նրանք Նիկոլ Փաշինյանի կամակատարներն են։

Գառնիկ Իսագուլյանը բացառում է օբյեկտիվ քննություն իրականացվելու հավանականությունը։ «Հիմա բոլորը Հայաստանի թիվ մեկ դավաճան Նիկոլ Փաշինյանի շնիկներն են, ի՞նչ եք կարծում այդ շնիկներին ես պետք է բացատրություն տա՞մ։ Իրենք չե՞ն տեսել այդ ամեն ինչը։ Քանի դեռ երկրի թիվ մեկ ղեկավարը՝ հայրենիքի դավաճան Նիկոլ Փաշինյանն է, իսկ իրավապահ մարմինները նրա կատարածուները, կամակատարներն են, որևէ մեկին որևէ բան ասելու կամ բացատրելու խնդիր նույնպես չունեմ»,-նշեց Գառնիկ Իսագուլյանը։

Վերջինս նկատեց՝ եթե իրավապահ համակարգն այդ հայտարարությունների հետևից գնա, ապա մեկ նպատակ են ունենալու՝ վարկաբեկել այդ հայտարարությունների հեղինակներին. «Հայրենիքի թիվ մեկ դավաճանը հիմա ինչ-որ խնդիրներ է ուզում լուծել իր համակարգի, իր շնիկների միջոցով, բայց չի ստացվելու։ Իրավապահ մարմինները պարտավոր են Նիկոլ Փաշինյանին կալանավորել, մեկուսացնել հանրությունից։ Քանի դա դեռ չեն անում, այդ մարմիններին բացատրություն տալն անիմաստ է։ Հավատ չկա այդ մարմինների նկատմամբ։ Քանի դեռ իշխանափոխություն չի եղել, անհնար է, որ այդ գործերը բացահայտվեն։ Նրանք ամեն կերպ թաքցնելու են, որովհետև իրենց հանցանքն է»,-հավելեց Գառնիկ Իսագուլյանը։

Հիշեցնենք, որ նոյեմբերի 23-ին Գառնիկ Իսագուլյանը հրավիրված մամուլի ասուլիսի ընթացքում մի շարք աղմկահարույց հայտարարություններ էր կատարել, մասնավորապես նշել էր, որ հակառակորդի 400 հոգանոց խումբ Հադրութ քաղաք է մտել թիկունքից՝ Նախիջևանից Քաջարանով անցել է Արցախ և առանց խոչընդոտ գնացել են մինչև Հադրութի թիկունք և դա ապահովել է ԱԱԾ այն ժամանակվա տնօրեն Արգիշտի Քյարամյանը և անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների։

Գառնիկ Իսագուլյանի ասուլիսի վերաբերյալ հրապարակումները ՀՀ գլխավոր դատախազությունն ուղարկել է ՀՔԾ՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու, ասուլիսի ընթացքում նրա կողմից ներկայացված հանգամանքները քրեադատավարական ընթացակարգով ստուգելու եւ իրավական գնահատական տալու հանձնարարությամբ։

Աղբյուր` Փաստինֆո