Փաստ ինֆո

Կորոնավիրուսի իրավիճակի սրում ունենք։ Այս մասին այսօր կառավարության նիստի մեկնարկին ասաց ՀՀ վարչապետ Նիկոլ Փաշինյանը։

Վարչապետը նշեց, որ կորոնավիրուսի դեպքերի աճը կապված է մարդկանց շարժունակության ավելացման հետ. «Մեր դիրքորոշումը շարունակում է մնալ նույնը, որ պետք է ապրենք կորոնավիրուսի հետ զուգահեռ և այստեղ շատ բան կախված է մեզանից յուրաքանչյուրի անհատական պատասխանատվությունից։ Իհարկե նաև վարչական մեթոդներ պետք է շատ խստորեն կիրառեն և պայմանավորվել ենք, որ տեսչական մարմինները և ոստիկանությունը կուժեղացնեն հսկողությունը կանոնների պահպանման նկատմամբ։ Պետք է հասկանանք, որ ունենք կարմիր գծեր, դա այն է, երբ մեր հիվանդանոցային կարողությունները կսպառվեն։ Այդ ժամանակ պետք է փորձենք այլ որոշումներ կայացնել»,-ասաց Նիկոլ Փաշինյանը։

Վերջինս նշեց, որ հուլիսին ծավալել էին մեծ հիվանդանոցային կարողությունները, հիմա այդ կարողությունների մեծ մասն արդեն վերադարձել են իրենց նախկին բնականոն վիճակին, բայց ցանկացած պահի պատրաստ են հետ վերադառնալ կորոնավիրուսի սպասարկմանը։

Վարչապետը ՀՀ առողջապահության նախարար Արսեն Թորոսյանից հետաքրքրվեց` արդյոք այս պահի դրությամբ նոր ծավալման կարիք ունենք, թե ոչ։

Արսեն Թորոսյանը նշեց, որ այս պահի դրությամբ ունենք ծավալած 1230 սովորական մահճակալ և 170 վերակենդանացման մահճակալ, որոնց 30 տոկոսը դեռևս ազատ է մնում. «Մոտ 20 բժշկական հաստատություններից այս պահին կորոնավիրուսային հիվանդությամբ զբաղվում է 5 հիվանդանոց և ևս երեքը նեղ մասնագիտացված փոքր թվերով երեխաների, նորածինների և հղի որի համար»,-ասաց Արսեն Թորոսյանը։

Աղբյուր` Փաստինֆո