Փաստ ինֆո

ԱԺ նախկին նախագահ Գալուստ Սահակյանի որդու՝ Տիգրան Սահակյանի վերաբերյալ քրեական գործով մեղադրանք է առաջադրվել նաև փաստաբան Կարեն Սարդարյանին, ով 29.01.2004-09.04.2004թթ. ժամանակավորապես կատարել է Երևանի քաղաքապետարանի աշխատակազմի իրավաբանական վարչության պետի լիազորությունները։ Փաստաբան Կարեն Սարդարյանը «Փաստինֆո»-ի հետ զրույցում ասաց, որ առաջադրված մեղադրանքը չի ընդունում։ Ավելին, քրեական գործը ենթակա է կարճման՝ վաղեմության հիմքով, սակայն Սարդարյանն անհամաձայնություն է հայտնել՝ գործը վաղեմության հիմքով կարճելու վերաբերյալ, քանի որ արդարացում է պահանջում, ինչն իր համար սկզբունքային հարց է։ Փաստաբանի խոսքով՝ գործել է օրինական, ինչի համար իրեն մեղադրանք է առաջադրվել և վաղեմության հիմքով գործի կարճելուն համաձայնելն արդարադատության դեմ ուղղված քայլ կլիներ։

«Որևէ առնչություն որևէ հանցագործության չեմ ունեցել։ Ավելին, բացի նրանից, որ որևէ առնչություն որևէ հանցագործության դեմ ունեցել, նաեւ իմ գործողությունները, որոնք ես կատարել եմ որպես պաշտոնյա, բխել են օրենքից»,- ասաց Սարդարյանը՝ ընդգծելով, որ իր գործողություններում որևէ խախտում չկա և իր համոզմամբ որևէ խախտում չկա նաև իր կոլեգաների գործողություններում։ Սարդարյանը վստահեցրեց, որ ոչ ինքը, ոչ էլ վարչության մյուս աշխատակիցները չեն իմացել որևէ կեղծիքի մասին և մեղադրանքն աբսուրդ համարեց՝ նշելով, որ նախաքննական մարմինն իրենց չի էլ մեղադրում կեղծիքի մասին իմանալու մեջ, սակայն մեղադրանք են առաջադրել պաշտոնեական դիրքի չարաշահման մեջ։ Թեև պաշտպանական կողմը պնդում է, որ կեղծիքի մասին չի իմացել, ուստի՝ չարաշահման մասին խոսք գնալ չէր կարող, մինչդեռ, վարույթն իրականացնող մարմինը որպես չարաշահում համարել է դատարան չգնալը։ Փաստաբան Արսեն Սարդարյանը պատմեց, որ այդ ժամանակահատվածում քաղաքապետարանում մեծածավալ գործեր են եղել և ֆիզիկապես հնարավոր չէր բոլոր գործերով ապահովել մասնակցությունը դատական նիստերին, այդ պատճառով էլ գրավոր էին պատասխանում և չէին գնում դատարան, ինչն ընդունված գործելաոճ է նաև այսօր։

«Այսօր էլ Երևանի քաղաքապետարանի իրավաբանական վարչությունը որոշ գործերով չի ներկայանում դատարան՝ կամ գրավոր պատասխաններ ներկայացնելով, կամ որևէ բան չներկայացնելով։ Ես հիմա որպես փաստաբան ունեմ մի շարք գործեր, երբ քաղաքապետարանի ներկայացուցիչը ոչ միայն չի ներկայանում դատական նիստերին, այլև՝ գրավոր որևէ բան չի ներկայացնում։ Ինչու՞ քրեական գործ չեն ներկայացրել»,- ասաց Սարդարյանը՝ նշելով, որ ինքն անգամ դատարան գնալու պարտականություն չի ունեցել, դա աշխատակցի պարտականությունն էր, սակայն, ծանրաբեռնվածությունից ելնելով, միասին որոշել են, որ կարող է չգնալ դատարան։ Սարդարյանն ընդգծեց, որ նմանատիպ գործերով դատարան չեն գնացել սովորաբար, քանի որ այդ գործերով քաղաքապետարանը «մեղավոր» էր և պետք է ընդուներ հայցը, նմանատիպ գործերը, փաստաբանի փոխանցմամբ հարյուրավոր են եղել։

«Այլ հարց է, որ իմանայինք, որ դատավորը կեղծիք պետք է իրականացներ, կգնայինք միանշանակ»,- ասաց Սարդարյանը՝ վստահեցնելով, որ առ այսօր չի իմանում՝ կեղծիք եղել է, թե ոչ։

Արձանագրենք, որ մեղադրանք է առաջադրվել չորս անձի, սակայն դատավորին մեղադրանք առաջադրված չէ, ինչի վերաբերյալ Սարդարյանը նշեց, որ, եթե դատավորը կեղծիք է արել, ինչու նրան մեղադրանք չի առաջադրվել, իսկ, եթե կեղծիք չի եղել, ինչու են այդ դեպքում իրենց մեղադրանք առաջադրել։

Ավելին՝ Սարդարյանը նշեց, որ ոչ միայն որևէ առնչություն չի ունեցել գործին, այլև՝ չի իմացել, թե ում վերաբերյալ էր գործը, չի իմացել, որ Տիգրան Սահակյանը Արման Սահակյանի եղբայրն է, իսկ վերջինս եղել է մշակույթի վարչության պետը։

«Ես չեմ հետաքրքրվել՝ ով ում բարեկամն է։ Հարյուրավոր, հազարավոր գործեր են եղել։ Մի քանի հազար գործ տարեկան անցել է մեր վարչությունով»,- ասաց նա՝ հավելելով, որ միայն իր վարչություն եղել է օրական 4-6 գործ։ Բացի դա՝ իրավաբանական վարչությունը մշակույթի վարչության հետ որևէ առնչություն չի եղել։

«Եթե ես որևէ մեկի համար հանցագործություն չեմ անի, ինչու պետք է անեմ մի մարդու համար, ում հետ առհասարակ որևէ առնչություն չունեմ, որևէ ազդեցություն ինձ վրա չունի, ինչու՞ պետք է հանցագործություն անեմ։ Անհասկանալի մեղադրանք է, որ ձեռքի հետ մեզ էլ են մեղադրանք առաջադրել, երևի ինչ-որ ցուցանիշ պետք է ցույց տան։ Ինձ համար անհասկանալի է մեղադրանքը, այսօր մոդայիկ է, կարծես թե, կոռուպցիոն գործեր դատարան ուղարկելը, մենք էլ ինչ-որ մոդայի զոհ ենք եղել»,- նշեց Սարդարյանը։

Իսկ թե եղել են արդյո՞ք անձինք, ովքեր համաձայնել են վաղեմության հիմքով գործի կարճմանը, Սարդարյանը նշեց, որ որքանով իրեն է հայտնի՝ իրավաբանական վարչության աշխատակիցները և պետը վաղեմության չեն համաձայնել, եղել են համաձայնողներ՝ այլ վարչությունից, սակայն նրանք առնչություն չեն ունեցել իրավաբանական վարչության աշխատակիցների հետ։ Փաստաբանը միևնույն ժամանակ արձանագրեց, որ վաղեմության կիրառմանը համաձայնելը դեռևս մեղավորության մասին չի խոսում, ընդամենը դա նշանակում է, որ ինքը չի կարող ասել, որ անմեղ է, բայց որևէ մեկը չի կարող ասել, որ ինքը մեղավոր է, այսինքն՝ մեղավորության հարցը մնում է օդում։ Նրա խոսքով՝ վաղեմության հիմքով գործի կարճմանը հաճախ համաձայնում են քաշքշուկից խուսափելու համար։ Ընդ որում՝ սույն գործով նյութական պատասխանատվության խնդիր էլ չկա, քանի որ քրեական գործով վեճի առարկա դարձած հողատարածքն առկա է և գույքի վրա կալանք է դրված։ Ինչ վերաբերում է փաստաբանական գործունեության վրա քրեական գործի ազդեցությանը, Սարդարյանը հայտնեց, որ որևէ ազդեցություն ունենալ չի կարող։

Ավելի վաղ հայտնել ենք, որ Տիգրան Սահակյանին մեղադրանք է առաջադրվել՝ ՀՀ քրեական օրենսգրքի 184-րդ հոդվածի (գույքային վնաս պատճառելը խաբեության կամ վստահությունը չարաշահելու եղանակով) 2-րդ մասի 1-ին կետով և 349-րդ հոդվածի (ապացույցները կեղծելը) 1-ին մասով: Երևանի քաղաքապետարանի աշխատակազմի իրավաբանական վարչության պետին և նրա տեղակալին մեղադրանք է առաջադրվել՝ ՀՀ քրեական օրենսգրքի 308-րդ հոդվածի (պաշտոնեական լիազորությունները չարաշահելը) 2-րդ մասով, իսկ նույն վարչության աշխատակցին՝ ՀՀ քրեական օրենսգրքի 38-308-րդ հոդվածի 2-րդ մասով: Նրանց նկատմամբ որպես խափանման միջոց է ընտրվել ստորագրություն չհեռանալու մասին:

Ըստ նախաքննական մարմնի՝ 2003թ. ՀՀ պետական գույքի կառավարման նախարարը /վարչության պետ/ պաշտոնեական դիրքն օգտագործելով ծառայության շահերին հակառակ, Երևան քաղաքի Աբելյան փողոցում գտնվող «Աջափնյակ» ունիվերսամի շենքը գնահատված արժեքից էականորեն ցածր՝ ընդամենը 22.500.000 ՀՀ դրամով ուղղակի վաճառքի ձևով մասնավորեցրել է նախօրոք հայտնի գնորդ Տիգրան Սահակյանի օգտին, որից հետո վերջինս, վճարելով նշված գումարը, ձեռք է բերել նշված գույքի նկատմամբ սեփականության իրավունքը:

Հեղինակ՝ Իզաբել Սահակյան

Աղբյուր` Փաստինֆո