Փաստ ինֆո

ԱԺ «Իմ քայլը» խմբակցությունում կան կորոնավիրուսով վարակված պատգամավորներ։ Այս մասին լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ չնշելով վարակակիրների անունները։

Հարցին՝ հնարավոր է արդյոք խորհրդարանի աշխատանքի ձևի մեջ փոփոխություն կատարվի, Լիլիթ Մակունցն ասաց, որ անում են առավելագույնը, որպեսզի խորհրդարանի աշխատանքները որևէ կերպ չխոչընդոտվեն. «Այս պահին իմ ունեցած տվյալներով կա մեկ հաստատված դեպք, մյուսները դեռ չեն հաստատվել։ Չգիտեմ կհաստատվեն, թե ոչ, բայց հիպոթետիկ, եթե ընդունենք, որ այդպես կլինի, որևէ կերպ այս պահին չի խանգարի խորհրդարանի աշխատանքներին»,-ասաց Լիլիթ Մակունցը։

Ինչ վերաբերում է խմբակցության մյուս պատգամավորների թեստավորմանը, ապա Լիլիթ Մակունցն ասաց, որ թեստեր հանձնում են միայն այն անձինք, որոնց մոտ հնարավոր է նշաններ լինեն կամ հնարավոր կոնտակտավոր են։ Դիտարկմանը, որ իրենք ևս կոնտակտավոր են, Մակունցն արձագանքեց. «Պատգամավորներից մեկը, ով հանրային կերպով հայտարարել է, որ իր մոտ հաստատվել է և վարակվել է, դուք նույնպես իր հետ շփվել եք, եթե այդ տրամաբանությամբ շարունակենք։ Այսինքն բոլորս պետք է անենք առավելագույնը, որ զգույշ լինենք թե՛ մեր, թե՛ մեր մտերիմների նկատմամբ»,-ասաց Մակունցը։

Նշենք, «Իմ քայլը» խմբկցության երկու պատգամավոր՝ Վիկտոր Ենգիբարյանն ու Քրիստինե Պողոսյանը, Աժ փոխնախագահ, ԲՀԿ անդամ Վահե Էնֆիաջյանը հաստատել են, որ իրենց մոտ հաստատվել է կորոնավիրուս։

Աղբյուր` Փաստինֆո