Փաստ ինֆո

Վերջին շրջանում Վենետիկի հանձնաժողովի հետ հարաբերություններում իշխող ուժի գործելաոճը զավեշտի աստիճանի է հասել։ «Փաստինֆո»-ի հետ զրույցում այս մասին ասաց սահմանադրագետ Գոհար Մելոյանը՝ անդրադառնալով սահմանադրական փոփոխությունների նախագծին։

Նշենք, որ նախագիծը շրջանառության մեջ է դրվել նույն օրը, երբ հրապարակվել է Վենետիկի հանձնաժողովի խորհրդատվական կարծիքը։ Սահմանադրագետի խոսքով՝ այս ընթացքում իշխանության կողմից Վենետիկի հանձնաժողովին է ներկայացվել երեք նախագիծ և ունենք մի իրավիճակ, երբ նախքան խորհրդատվական կարծիքի հրապարակումը, երեք նախագծերն արդեն շրջանառության մեջ են դրվել. «Վենետիկի հանձնաժողովն իր խորհրդատվական կարծիքում հնարավորինս դիվանագիտական լեզվով նշում է, որ այնքան էլ ընդունելի չէ, որ նույն օրը, երբ հրապարակվել էր խորհրդատվական կարծիքը, հենց այդ նույն օրն են նախագիծը շրջանառության մեջ դրել։ Մեր պետության վարկանիշն ուղղակի անկում ապրեց Վենետիկի հանձնաժողովի և միջազգային մյուս կառույցներ աչքի առջև։ Նման կերպ գործընկերային հարաբերություններ չեն պահպանում»,-ասաց Գոհար Մելոյանը։

Վերջինս վստահ է՝ իշխող ոււժը գիտակցում է, որ նախագիծը հակասահմանադրական բնույթ ունի և ՍԴ դատավորների լիազորությունների նման կերպ դադարեցումը չի բխում ՄԻԵԴ-ի նախադեպային պրակտիկայից, խախտում է դատավորների անփոփոխելիության սկզբունքը, ինչպես նաև իրավական պետության հիմնարար տարրերը։ Գոհար Մելոյանի համար անհասկանալի է ՍԴ-ի հարցով իշխանությունների շտապողականությունը, հատկապես երբ այս գործընթացները քրեական օրենսգրքի տիրույթում են գտնվում. «Եթե այս ձևաչափով ընդունեն, նշանակում է քրեական օրենսգրքի տիրույթում գտնվող արարքներ են թույլ տալիս։ Սցենարը դեռ հստակ չէ, թե ինչպես կշրջանցեն ՍԴ-ն»,-ասաց Գոհար Մելոյանը։

Դիտարկմանը՝ արդյոք իշխանություններն այսկերպ հող են նախապատրաստում հետագայում սահմանադրական կարգի տապալման մեջ իրենց մեղադրելու համար, սահմանադրագետը նկատեց՝ հավանաբար իրենց ինչ-որ մեկը հուսադրել է, որ հետագայում այս քվեարկության համար օգտվելու են պատգամավորների անձեռնմխելիությունից. «Դա այդպես չէ։ Եթե նախորդիվ տեղի ունեցավ դատարանների շրջափակում և իշխող ուժը պատասխանատվությունն ամբողջությամբ փորձում էր ժողովրդի վրա դնել՝ խուսափելով որակումներից, այս պարագայում իրենք այդ հնարավորությունն էլ չունեն, որովհետև ուղղակիորեն այս քվեարկության արդյունքում է այդ ապօրինի փոփոխությունը կյանքի կոչվելու։ Այստեղ ևս կազուսային խնդիր է ծագելու։ Եթե այս նախագիծը հնարավոր է կյանքի կոչել ապօրինի ընթացակարգով, ինչո՞ւ պետք է ՍԴ դատավորը ենթարկվի այդ ապօրինի պահանջին, հակասահմանադրական օրենքի պահանջին և ինչ հիմքով պետք է արդարացված համարվի նրա լիազորության դադարեցումը»,-ասաց Գոհար Մելոյանը։

Վերջինս կարծում է՝ իշխող ուժի շտապողականությունը հնարավոր է՝ պայմանավորված է անկախ մարմնի գոյության նկատմամբ անհանդուրժողականությամբ և օր առաջ յուրային ու կառավարելի մարմին ձևավորելու խնդրով. «Եթե իրենց հաջողվի այս պրոցեսը կյանքի կոչել և այդ ՍԴ-ն ձևավորվի, պատմությունը ցույց կտա, թե ինչպիսի նախագծեր ունեինք աչքի տակ, ինչ էին նախատեսում ընդունել հետագայում, որոնց վերաբերյալ անհրաժեշտ է պարտադիր կերպով ՍԴ եզրակացությունը։ Դրանով է պայմանավորված այս շտապողականությունը»,-հավելեց սահմանադրագետը։

Հեղինակ՝ Հասմիկ Կոշկարյան

Աղբյուր` Փաստինֆո