Փաստ ինֆո

Հասարակության անդամները չպետք է իրենց վարքագիծը պայմանավորեն նրանով, թե ինչին են հավատում։ Հավատն իռացիոնալ երևույթ է և մենք չենք կարող մեր քայլերը պայմանավորել իռացիոնալ երևույթներով։ Այս մասին լրագրողների հետ զրույցում ասաց ԱԺ «Իմ քայլը» խմբակցության պատգամավոր Տիգրան Ուլիխանյանը՝ անդրադառնալով այն հարցին, որ մարդիկ վարակին պատշաճ ուշադրություն չեն դարձնում, քանի որ ասում են՝ չեն հավատում։

«Հասարակություն է կոչվում քաղաքացիների այն համախումբը, որտեղ շարժվում են կարգ ու կանոնով։ Դրանք գրված փաստաթղթեր են։ Մեր իրականության մեջ դրանք կոչվում են Սահմանադրություն, օրենքներ, իրավական ակտեր և դրանով պետք է շարժվենք, պայմանավորենք մեր քայլերը, այլ ոչ թե նրանով, թե ինչին ենք մենք հավատում։ Այսինքն օրենքներին պետք է հետևել, ոչ թե հավատին։ Մեծ հաշվով ինչին ես հավատում, որևէ նշանակություն չունի։ Ես էլ եմ շատ բանի հավատում, բայց չեմ կարող իմ գործողությունները դրանով պայմանավորել»,-ասաց Տիգրան Ուլիխանյանը։

Դիտարկմանը, որ քաղաքացիներն անլուրջ են վերաբերվում, քանի որ պաշտոնյաներն իրարամերժ հայտարարություններ են արել, պատգամավորն ասաց, որ հասկանում է, բայց նույնիսկ դա համարում է անկարևոր բան. «Որպեսզի այդ անկարևոր թեմաներն ընդհանրապես լռեցնեմ, կարող եմ ասել հետևյալը. Այն բոլոր քայլերը, որոնք կապված են քաղաքական իշխանության գործողությունների հետ, որևէ մեկի իրարամերժ հայտարարությունների հետ։ Եթե նրանց նպատակն է, որ մենք մեր քայլերի վերաբերյալ մեզ գնահատական տանք, ներողություն եմ խնդրում մեր բոլոր հայրենակիցներից մեր կատարած այն քայլերի համար, որոնք շփոթ են առաջացրել։ Ես ներողություն եմ խնդրում և դրանով եկեք փակենք այս անկարևոր, զրո կարևորություն ունեցող թեման»,-ասաց պատգամավորը։

Անդրադառնալով հարցին, որ ընդդիմադիրները մեղադրում են իրենց կեղծ օրակարգ բերելու մեջ, Տիգրան Ուլիխանյանն ասաց, որ դրանք ուղղակի մեղադրանքներ են և որևէ կերպ նպատակ չունեն հանրության զգոնությունը բարձրացնելու. «Ուղղակի ինքնանպատակ միավորներ հավաքելու համար են։

Հենց այդ հայտարարություններն էլ համարում եմ անկարևոր։ Ինչ վերաբերում է խորհրդարանի աշխատանքին, ինչպես ՀՀ ցանկացած քաղաքացու, ցանկացած կառույցի համար որևէ կերպ չենք պնդում, որ կյանքը կանգ է առել և պետք է դադարեցնենք ընդհանրապես մեր բոլոր գործողությունները։

Մենք ասում ենք, որ մեր բոլոր գործողությունները պետք է իրականացնենք՝ պահպանելով երեք տարրական կանոն»,-ասաց պատգամավորը։

Աղբյուր` Փաստինֆո