Փաստ ինֆո

ԱԺ պատգամավոր Տիգրան Ուրիխանյանը, դիմելով ՀՀ գլխավոր դատախազ Արթուր Դավթյանին, հետաքրքրվել, թե որտեղ են զինծառայողների սոցապահովության հիմնադրամի գումարները։ Վերջինս տեղեկացրեց, որ այդ խնդրով նախկինում ևս դիմել էր դատախազին։

Գլխավոր դատախազ Արթուր Դավթյանն արձագանքեց, որ դատախազության բոլոր հայտարարություններն են խրոխտ և դատախազության՝ Ուրիխանյանի հարցադրումներին ուղղված պատասխանը համաչափ է։ Նրա խոսքով՝ նյութերի նախապատրաստման և քրեական գործ հարուցելու համար անհրաժեշտ են առնվազն առերևույթ հանցագործության մասին տվյալներ։

«Դուք համադրել եք վարչապետի հայտարարության մեջ նշված համապատասխան թիվը և վերցել եք հինադրամի կայքից համապատասխան տվյալներ, դրանց մեջ տեսել եք հակասություն և այս հակասությունը ներկայացնում եք ու պահանջ եք ներկայացնում դրանով իրականացնելու քրեական վարույթ, բայց դա քրեական վարույթն իրականացնելու անհրաժեշտություն չուներ, առնվազն մեկ պատճառով՝ հիմնադրամի մուտքերը այդքան պարզ մեխանիկական հաշվարկով չեն»,- ասաց Դավթյանը։։ Նա ընդգծեց, որ իր համար անհասկանալի է պատգամավորի «գաղտի ծախսերի» մասին ձևակերպումը։ Նրա խոսքով՝ ուսումնասիրություններից պարզվել է, որ Ուրիխանյանի կողմից մատնանշված հաշվետվության և պարտադիր վճարներից գոյացած մուտքերի միջև տարբերությունը պայմանավորված է մի շարք օբյեկտիվ հանգամանքներով ։

«Առկա են գաղտնի և հրապարակման ոչ ենթակա որոշ տվյալներ, որոնք օրենքի ուժով չեն կարող արտացոլվել հաշվետվություններում։ Գաղտնի տվյալները բացառապես մուտքերին են վերաբերում, իսկ որ մուտքերում գաղտնի տվյալներ կային, կարծում եմ, որ Դուք շատ լավ պիտի իմանայիք», - ասաց Դավթյանը։

Դավթյանը նշեց, որ Ուրիխանյանը, որպես հոգաբարձուների խորհրդի անդամ, բոլոր հնարավորություններն ուներ ստանալու այդ պարզաբանումները։
Ուրիխանյանն էլ արձագանքեց և նշեց.«Հիմա ինձ պետք չէ հա ակնարկել՝ լիազորություններ ունեի, չունեի։ Դուք եք գլխավոր դատախազը, ուրեմն բարի եղեք կոռուպցիայի դեմ պայքարի առաջամարտության շրջանակներում պարզաբանումներ արեք։ Ձեր ձեռքն է իշխանությունը, ապարատը, ամեն ինչը։ Էլի եմ ասում՝ այս հիմնադրամը գաղտնիություն չպիտի ունենա»։

Աղբյուր` Փաստինֆո