Փաստ ինֆո

«Վրաստանի հետ համեմատությունը ՀՀ իշխանությունները շատ ծանր են տանում, որովհետեւ համեմատության դեպքում մենք տեսնում ենք, թե ինչ ահռելի տարբերություն կա, հաշվի առնելով նաեւ այն հանգամանքը, որ Վրաստանը իր բոլոր հարեւանների հետ ունի բաց սահմաններ, ունի մեծ տուրիզմ։ Որեւէ արդարացում ՀՀ իշխանությունները չունեն, ուստի փորձում են ինչ-ինչ բացատրություններ գտնել հասարակության համար, եւ այդ բացատրություններից մեկն էլ թվերը կասկածի տակ դնելն է, ինչը, բնականաբար, Վրաստանի հետ դիվանագիտական խնդիրներ է առաջացնում»,-«Փաստինֆո»-ի հետ զրույցում ասել է քաղաքագետ Ստեփան Դանիելյանը։

Հիշեցնենք, Վրաստանի Հիվանդությունների վերահսկման ու հանրային առողջության ազգային կենտրոնի ղեկավար Ամիրան Գամկրելիձեն «ոչ դիվանագիտական» է որակել Հայաստանի առողջապահության նախարար Արսեն Թորոսյանի այն հայտարարությունը, թե Վրաստանի հակահամաճարակային համակարգն ավելի թույլ է, իսկ Վրաստանում կորոնավիրուսի վարակակիրների ու մահացության դեպքերի ցածր թիվը թեստերի վատ որակով ու թեստավորման մեթոդաբանությամբ է պայմանավորված։ Գամկրելիձեն խոստովանել է, որ այս հայտարարություններն իրեն զարմացրել են: «Անձամբ գիտեմ Արսեն Թորոսյանին։ Զարմանում եմ, որ նման հայտարարություն է արվել։ Հիշեցնեմ, որ մենք շատ մտերիմ ժողովուրդներ ենք, հարևաններ, ունենք ընդհանուր մեծ պատմություն։ Զարմանալի է նրանից լսել նման ոչ դիվանագիտական հայտարարություններ»,-հայտարարել է նա:

«Սա Հայաստանի իշխանության ոչ պրոֆեսիոնալության դրսեւորումն է եւ ինչ էլ անեն, արդարացում գտնել չեն կարող»,-նշում է քաղաքագետը, հավելելով, որ չնայած նրան, որ Վրաստանում հասկանում են՝ այս հայտարարությունն ուղղված է հայ հասարակությանը, բայց այն կարող է հարցեր առաջացնել նաեւ իրենց հասարակության շրջանում, այն դեպքում, երբ Վրաստանի իշխանությունները շատ լավ են աշխատել:

Ուշագրավ է, որ սա առաջին դեպքը չէ, երբ պաշտոնական Երեւանից հնչող հայտարարությունները նմանատիպ արձագանք են գտնում հարեւան երկրում: Ավելի վաղ ՀՀ վարչապետ Նիկոլ Փաշինյանի հայտարարությունն էր սկանդալի առիթ դարձել: Փաշինյանը, հիշեցնենք, Ֆեյսբուքյան գրառմամբ հայտարարել էր, թե Հայաստանը մեկ շնչի ընկնող ՀՆԱ-ի ցուցանիշով 2019-ին առաջ է անցել Վրաստանից իսկ 2020-ին կանցնի նաեւ Ադրբեջանին: Սրան արձագանքել էր Վրաստանի Էկոնոմիկայի նախարար Նաթիա Թուրնավան ՝ նշելով, որ դա սխալ գնահատական է, քանի որ նրանում հաշվի առնված չեն տարրական մեթոդաբանական հարցեր:

Ստեփան Դանիելյանն ասում է՝ Վրաստանի իշխանությունները հասկանում են, թե ինչ վիճակում է ՀՀ կառավարությունը, որը արդարացումների համար ելքեր է փնտրում, բայց , ըստ քաղաքագետի, իրենց համար տհաճ է, որ այդ արդարացումները իրենց հաշվին են արվում:

«Բավականին մեղմ են պատասխանել՝ հիշեցնելով որ երկու պետությունները ունեն եղբայրական դարավոր հարաբերություններ, ամեն դեպքում սա տհաճ է եւ տհաճ է բոլորի համար: Ես չեմ կարծում, որ այդ արդարացումները կազդեն հանրային կարծիքի վրա, որովհետեւ այս վիճակն ավելի է խորանում եւ արդեն ոչ միայն քաղաքական դաշտում, այլեւ հանրության մեջ է քննարկվում , որ կառավարության փոփոխություն պետք է լինի»:

Ինչ վերաբերում է կորոնավիրուսով պայմանավորված իրավիճակին, Ստեփան Դանիելյանը շեշտում է՝ պատասխանատվությունը կառավարությանն է եւ եթե սխալները շատ ծանր են լինում, լուծումը մեկն է՝ կառավարությունը վայր է դնում լիազորությունները:

«Գնալով այդ հարցը շատ ավելի լուրջ պետք է քննարկվի: Սա իրենք մոտ լուրջ անհանգստություն է առաջացնում, առավել եւս, որ իրենք բազմաթիվ հակաօրինական գործողություններ են կատարել, Սահմանադրություն եւ օրենքներ են խախտել, ինչը շատ վատ է այն առումով, որ կառավարությունը չի կարող հանգիստ գնալ, փորձելու է մինչեւ վերջ մնալ, իսկ երբ Սահմանադրություն եւ օրենքներ են խախտվում, երկրում սկսում են ապակայունացնող իրավիճակներ, որովհետեւ կառավարությունը գիտի, որ պատասխանատվության է ենթարկվելու եւ մինչեւ վերջ փորձելու է կառչած մնալ իր իշխանությունից, ինչը երկրի համար ցնցումներ է առաջացնում : Այդ առումով շատ վատ վիճակ է»,-ասաց Ստեփան Դանիելյանը՝ հավելելով, որ հենց այդ ամենի գիտակցությունն էլ բերում է վերը քննարկված չհաշվարկված գնահատականներին, որը նաեւ դիվանագիտական խնդիրներ է առաջացնում հարեւան երկրների հետ:

Ըստ քաղաքագետի, այս պահին Հայաստանը նոր խորհրդարանական ընտրությունների գնալու պատրաստ չէ. «Գուցե աշնան վերջին զարգացումներ լինեն ե մենք դրան գնանք, բայց քաղաքական դաշտը քայքայված է եւ , բացի այդ, համավարակի, տնտեսության հետ կապված ծանր վիճակն է, Ադրբեջանի հետ հարաբերություններն են: Այս ամենի պատճառով կտրուկ քայլեր անելը վտանգավոր է, ուստի լուծումը գնում է դեռեւս այս խորհրդարանի շրջանակում, թեեւ խորհրդարանում եւս ճգնաժամ գոյություն ունի, որովհետեւ ֆրակցիաներից մեկը չի մասնակցում աշխատանքներին, խորհրդարանը չի ներկայացնում երկրում առկա քաղաքական ներկապնակը , խորհրդարանի անդամների մեծ մասը պատահական մարդիկ են, որոնք, երբ խոսում են ուղղակի ծիծաղ են առաջացնում, շատերը բառի ուղիղ իմաստով անգրագետ են: Դա նույնպես ճգնաժամի աղբյուր է, սակայն այդ ճգնաժամը ինչ-որ ձեւով կհաղթահարվի, եթե Նիկոլ Փաշինյանի անձը մի կողմ դնենք»:

Ճշտող հարցին, արդյո՞ք ասվածից կարելի է ենթադրել, որ այդուհանդերձ, խորհրդարանում կարող է պրոցես սկսվել, Ստեփան Դանիելյանն ասաց. «Կարող է թե չի կարող չգիտեմ, բայց պետք է »,մեզ հետ զրույցում եզրափակեց Ստեփան Դանիելյանը:

Աղբյուր` Փաստինֆո