Փաստ ինֆո

ԱԺ փոխնախագահ Ալեն Սիմոնյանի եւ «Ադեկվադ» միաբանության համահիմնադիր Արթուր Դանիելյանի մասնակցությամբ միջադեպի առթիվ Ոստիկանությունում նախապատրաստված նյութերն ուղարկվել են դատախազություն։ Այս մասին «Փաստինֆո»-ին հայտնեցին Ոստիկանությունից:

Ավեի վաղ հայտնել ենք, որ երեկ Ալեն Սիմոնյանը երեկ բռնություն է գործադրել Արթուր Դանիելյանի նկատմամբ, որի հետեւանքով վերջինս ստացել է քթի կոտրվածք ու տեղափոխվել բժշկական կենտրոն։

Կատարվածը չի հերքել նաեւ Ալեն Սիմոնյանը՝ նշելով, թե տուն գնալիս տեսել է Արթուր Դանիելյանին, բարեւել է, ինչին ի պատասխան վերջինս հայհոյել է եւ ինքը պատասխանել է հայհոյանքին ու գլխով հարվածել քթին։ Դրանից հետո արդեն սկսվել է քաշքշուկ։

Դեպքի վերաբերյալ ոստիկանություն առաջինն ահազանգել է հենց Ալեն Սիմոնյանը, ապա նաեւ հանցագործության մասին հաղորդում է ներկայացրել Արթուր Դանիելյանը։

«Հույս ունենք, որ տեղի կունենա օբյեկտիվ քննություն, գլխավոր դատախազը կպահանջի՝ զրկել Ալեն Սիմոնյանին պատգամավորական անձեռնմխելիությունից և նա կենթարկվի քրեական պատասխանատվության»,- ասել է փաստաբան Տիգրան Աթանեսյանը:

Փաստաբանական թիմի անդամ Ռուբեն Մելիքյանը տեղեկացրել է, որ Երևանի կենտրոնում Ալեն Սիմոնյանի և Արթուր Դանիելյանի միջև տեղի ունեցած միջադեպը տեսագրվել է մասնավոր կազմակերպության պատկանող անվտանգության տեսախցիկներով։ «Մեր փաստաբանական հարցմանն ի պատասխան՝ մեզ տեղեկացրել են, որ տեսագրություններն առգրավվել են իրավապահ մարմինների կողմից», - նշել է փաստաբանն ու կոչ արել իրավապահներին հրապարակել տեսագրությունն ամբողջությամբ՝ հաշվի առնելով միջադեպի բնույթը և մեծ հանրային հնչեղությունը։

Իրավապահ մարմինները դժվարին խնդրի առաջ են կանգնել` կամ պետք է քրեական գործ հարուցեն ԱԺ փոխնախագահ Ալեն Սիմոնյանի նկատմամբ` հանրային վայրում բռնություն գործադրելու համար, կամ պետք է ապացույցներ կեղծեն, այն է՝ տեսագրությունը: Վերջինի դեպքում` իրենք կդառնան հանցագործության կատարողներ ու վաղը դատվելու վտանգի առաջ կկանգնեն, իսկ օրենքով առաջնորդվելու դեպքում կարժանան Նիկոլ Փաշինյանի զայրույթին:

Աղբյուր` Փաստինֆո