Փաստ ինֆո

Կորոնավիրուսի տարածումը Հայաստանի տնտեսության վրա կարող է ունենալ ուղղակի եւ անուղղակի ազդեցություն:

«Կորոնավիրուսով պայմանավորված տնտեսական ռիսկերը ամբողջ աշխարհում չափազանց մեծ են եւ եթե ուսումնասիրենք միջազգային շուկաները, ապա այնտեղ փլվում են այն արդյունքները, որոնք առկա էին մինչեւ կորոնավիրուսի տարածումը: Այդ զարգացումները չեն կարող շրջանցել նաեւ մեր առեւտրային գործընկերներին, հետեւաբար եւ անուղղակի ազդեցություն ունենալ մեր տնտեսության վրա»,-ասաց տնտեսագետ, ԱԺ ֆինանսաբյուջետային հանձնաժողովի նախկին նախագահ Գագիկ Մինասյանը:

Ըստ մասնագետի՝ ՀՀ տնտեսությունը կարող է կրել նաեւ կորոնավիրուսի վարակի առաջացրած ուղղակի ազդեցությունը, որ առաջին հերթին կդրսեւորվի տուրիզմի ոլորտում: «Դա ուղղակիորեն կազդի զբոսաշրջության վրա, որը էական նշանակություն ունի մեր տնտեսության համար: Արդեն մենք տեսնում ենք, որ մեր իշխանությունը, կարծես թե, կատարում է ճիշտ հակառակ քայլերը, որոնք , նման պայմաններում կատարում են այլ երկրների իշխանությունները»,-կարծում է Մինասյանը:

Խոսքը իշխանության անտրամաբանական որոշման մասին է՝ Ծաղկաձորում կազմակերպել կորոնավիրուսով պոտենցիալ հիվանդների կարանտինը: «Արդեն իսկ առկա են տեղեկություններ, որ Ծաղկաձորից զբոսաշրջիկների զանգվածային արտահոսք է տեղի ունենում: Բնական է, այս մասին գիտեն նաեւ տուր օպերատորները, որոնք ուղղակի իրենց համբավի հետ կապված ռիսկի չեն դիմի եւ կսահմանափակեն կամ նույնիսկ կդադարեցնեն այցելությունները դեպի Ծաղկաձոր: Ազդեցությունը մեր տնտեսության վրա ես գնահատում եմ բավականին մեծ»:

Գագիկ Մինասյանի խոսքով, իշխանությունը պետք է վերագնահատի այն վերաբերմունքը, որը նա դրսեւորեց վիրուսի տարածման հետ կապված ահազանգերից հետո: Նշենք, որ այն բանից հետո, երբ Իրանում արձանագրվեց կորոնավիրուսի առաջին դեպքը, մասնագետները ՀՀ իշխանություններին հորդորեցին համապատասխան միջոցառումներ ձեռնարկել՝ ընդհուպ ժամանակավորապես փակելով Իրանի հետ սահմանը: Իշխանության շատ ներկայացուցիչներ ոչ միայն լուրջ չվերաբերեցին այդ կոչերին այլեւ հեգնեցին ահազանգողներին:

Արդյունքում միայն փետրվարի 23-ին վարչապետը հայտնեց, որ կորոնավիրուսի տարածումը կանխարգելելու նպատակով Հայաստանը 2 շաբաթով կդադարեցնի Իրանի հետ հաղորդակցությունը: Նշենք, որ այսօր վարչապետ Նիկոլ Փաշինյանը հայտնել է, որ հաշվի առնելով տարածաշրջանում համաճարակային իրավիճակը՝ որոշում կայացրեցինք երկարացնել և խստացնել հայ-իրանական սահմանով հաղորդակցության ուղղությամբ սահմանափակումները։ Կորոնավիրուսի տարածումը կանխարգելող աշխատանքները համակարգող հանձնաժողովի ընդլայնված նիստի ժամանակ վարչապետը նաեւ կոչն է արել քաղաքացիներին հնարավորինս սահմանափակել ուղևորությունները դեպի Իտալիա, Թուրքիա։

«Մեր 4 հարեւաններից 2-ի հետ մենք չունենք բաց սահմաններ, մյուս 2-ում արդեն առկա են կորոնավիրուսի դեպքերը: Ավելի լայնածավալ տարածվածություն է նկատվում ԻԻՀ-ում, որտեղից ամեն տարի Նովրուզին մենք ունենում էին բավականին մեծաքանակ զբոսաշրջիկներ, որոնք էապես խթանում եին մեր տնտեսական աճին: Սա իսկապես մեծ բացասական ազդեցություն կթողնի տնտեսության վրա, բայց մյուս կողմից, իհարկե, պետք է բնակչությանը զերծ պահել գոնե հարավային սահմանից եկող վիրուսի վտանգներից: Կարծում եմ, որ կորուստներ կունենան նաեւ մեր այն քաղաքացիները, որոնք մեկնում էին Թուրքիա եւ տարբեր առևտրային կապերի միջոցով այստեղ թուրքական արտադրության ապրանքներ էին իրացնում ՝ հոգալով իրենց տնտեսական կարիքները: Նրանց այցելությունների սահմանափակումը եւս լրացուցիչ ռիսկեր է առաջացնում ոչ միայն այդ ընտանիքների տնտեսական բարեկեցության, այլեւ մեր տնտեսության համար»,-ասում է Գագիկ Մինասյանը:

Ըստ մասնագետի, ստեղծված իրավիճակը իշխանությունից սթափ ու ճշգրիտ քայլեր է պահանջում, ինչը սակայն, ըստ Մինասյանի գոնե վերջին մի քանի օրերին տեսանելի չէ:

Մասնագետը կարեւորում է նաեւ պարենային անվտանգության խնդիրը: Իշխանությունը պետք է քայլեր ձեռնարկի, որպեսզի սուպերմարկետներն ու խանութները խիստ վերահսկելի լինեն:

«Այստեղ կարծում եմ, որ մոտեցումները պետք է շատ խիստ լինեն: Տեսեք, նույն դիմակների օրինակը վերցնենք, տարբեր երկրներ խրախուսում են դրանց օգտագործումը, Հայաստանի իշխանությունները կարծես թե հակառակն են քարոզում, ասում են, որ դիմակները էական նշանակություն չունեն, այն պարագայում, որ կան հատուկ տեսակի դիմակներ, որոնք օգտագործելով, հնարավոր է պաշտպանվել վիրուսի ազդեցությունից, բայց այդ դիմակներից նույնիսկ պոլիկլինիկաների բժիշկները չունենք, որոնք գտնվելով այսպես ասած, պայքարի առաջին գծում, իրենք էլ պաշտպանված չեն»,-նկատեց Գագիկ Մինասյանը:

Աղբյուր` Փաստինֆո