Փաստ ինֆո

«Ռեկտորի պաշտոնակատարն այսօր անկեղծ իր մտահոգություններն ու կարծիքն արտահայտեց, որի հիմնական մասն, իհարկե, ընդունելի էր, այն իմաստով, որ դեմ չէ առարկաների դասավանդմանը»,-այս մասին այսօր լրագրողների հետ ճեպազրույցում ասաց ԵՊՀ պատմության ֆակուլտետի դեկան Էդիկ Մինասյանը։

Վերջինիս փոխանցմամբ՝ ռեկտորը կարծում է, որ հայոց լեզուն պետք է ուսանել առաջին կուրսում, իսկ հայոց պատմությունն ավելի հասուն տարիքում, եւ նշել, որ իբրև ռեկտորի պաշտոնկատար ամեն ինչ կանի այս խնդրին դրական լուծում տալու համար։

Դեկանի կարծիքով՝ հայագիտական առարկաների դասավանդումը խիստ անհրաժեշտ է բոլոր առումներով՝ ցանկացած հասունության աստիճանի մարդու համար։

«Հայրենասեր անհատ դաստիարակելու առումով անհրաժեշտ է այս առարկաների դասավանդումը։ Մենք ինքներս էլ մեր կողմից, իհարկե, աշխատում ենք առարկայի վրա, ճիշտ կլիներ քննարկումներ ունենալ այդ ֆակուլտետների դեկանների, խորհրդի անդամների հետ։ Ես գտնում եմ, որ բովանդակային իմաստով քննարկումներ պետք են տվյալ ֆակուլտետների հետ»,-ասաց դեկանն ու հավելեց, որ հաճախ շփոթ է առաջանում, թե նույն հայոց պատմությունը դասավանդվում է և՛ բուհում, և՛ դպրոցում, սակայն բուհում անցնում են հայոց պատմության հիմնահարցեր առարկան, որը տարբերվում է դպրոցական նյութից։
Խոսելով ուսանողների դասադուլի մասին՝ Մինասյանն ասաց.

«Ուսանողությունն իր հիմնական նպատակը համարում էր խոսքը տեղ հասցնելը։ Դասադուլը նրանց որոշումն էր և, բնական է, որևէ մեկը չի կարող պարտադրել նրանց։ Ուսանողի առաջնահերթ խնդիրը դասին մասնակցելն է, բայց եթե պայքարի ձևը դա է ընտրվել..այսօր ուսանողների մեծ մասի հաճախումները նորմալ են մեծամասամբ։ Կարծում եմ՝ դա նրանց բողոքի արտահայտման ձևն էր, դրա համար պետք չէ դատապարտել, քարկոծել։ Ուսանողն ազատ է իր ընտրության մեջ և այս տեսակետից էլ ես գոհ եմ, որովհետև ռեկտորը երբեք արգելանք չի ստեղծել այդ հարցերի հետ կապված»։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո