Փաստ ինֆո

Շինարարության աճի տեմպը տարեսկզբի համեմատ գրեթե 5 անգամ նստել է։ Յոթ ամիսների տվյալներով` այն կազմել է ընդամենը 4,5 տոկոս։ Եվ սա այն դեպքում, երբ հունվար-փետրվարին հասնում էր 20-21 տոկոսի։ Մի բան, ինչը հիմք տվեց Նիկոլ Փաշինյանին հայտարարելու, որ Հայաստանը գտնվում է շինարարության բումի նախաշեմին։ 

Բայց վարչապետի այդ հայտարարությունը ծանր նստեց շինարարության վրա։ Դրան հաջորդող շրջանում ոլորտում աճի տեմպերը ամսե-ամիս նահանջեցին. մարտին արձանագրվեց 0,5 տոկոս, ապրիլին` 1,5 տոկոս, մայիսին` 2 տոկոս, հունիսին` 0,6 տոկոս աճ։ Հուլիսին աճը մի փոքր ակտիվացավ, բայց շարունակեց էապես զիջել տարեսկզբի մակարդակը։ Այդ ամսին շինարարության ծավալների ավելացումը կազմեց 5,9 տոկոս։

Անկումը պահպանվում է հատկապես պետական բյուջեի հաշվին իրականացվող շինարարության գծով։ Նվազել են նաև օտարերկրյա ներդրողների հետաքրքրությունները։ Արտաքին ներդրումային կապիտալը ոլորտում կրճատվել է գրեթե 20 տոկոսով։

Փոխարենը` ակտիվ է բնակչությունը։ Ավելացել են նաև վարկային միջոցներով կատարվող շինարարական աշխատանքները։ Մասնավորապես վերակառուցման և զարգացման Եվրոպական բանկի կողմից ֆինանսավորված ծրագրերը այս տարի աճել են 6,9 անգամ։ Ակտիվությունը պակաս բարձր չէ նաև ՌԴ վարկերի հաշվին իրականացվող շինարարական աշխատանքների դեպքում։ Նախորդ տարվա համեմատ դրանք ավելացել են 3,4 անգամ։

Աղբյուր` Փաստինֆո