Փաստ ինֆո

«Ես նախօրեին շատ կարճ գրառում արեցի, նշեցի, որ լավ է, որ վարչապետը հանդիպեց «Սասնա Ծռեր»-ի հետ, որ ես հույս ունեմ՝ անկեղծ խոսակցություն է գնացել միակ լուրջ հարցի շուրջ, որը կարելի է քննարկել եւ դա ապագաղութացումն է , մնացածը լուրջ չէ»,- «Փաստինֆո»-ի հետ զրույցում ասել է «Հայաստանի եվրոպական» կուսակցության համանախագահ Տիգրան Խզմալյանը՝ անդրադառնալով կառավարությունում վարչապետի եւ «Սասնա Ծռեր»-ի ներկայացուցիչների միջեւ տեղի ունեցած հանդիպմանը ։

Ըստ Խզմալյանի, մյուս հարցերը իմիտացիա են ։ «Մենք այնպիսի իրավիճակում ենք, երբ արմատական ընդդիմությունը, ժողովրդավարական ուժերը պետք է պահանջեն արեւմտյան ուժերին անդամակցելու ռազմավարություն։ Դա է միակ լուրջ թեման, որը «Հայաստանի եվրոպական կուսակցության» կարծիքով պետք է քննարկել, մնացածը իմիտացիա է, բայց, քանի որ տեղյակ չե, թե ինչ է քննարկվել, չեմ կարող գնահատականներ տալ»,-շարունակել է Խզմալյանը։

Նրա խոսքով, հնարավոր չէ իրականացնել, որեւէ բարեփոխում՝ ձեւացնելով, թե հիբրիդային պատերազմ չի տարվում, որը, ըստ Խզմալյանի Ռուսաստանը վարում է Հայաստանի դեմ։

Դիտարկմանը, արդյո՞ք այս հանդիպումը կարող է ընկալվել որպես Հայաստանի իշխանությունների մեսիջը՝ ուղղված Ռուսաստանին, հաշվի առնելով, որ հոկտեմբերին սպասվում է ՌԴ նախագահ Պուտինի այցը Հայաստան եւ, որ «Սասնա ծռեր»-ը հանդես են գալիս հակառուսական դիրքերից, Տիգրան Խզմալյանն արձագանքեց. « Բանն այն է, որ պաշտոնական հայտարարություններում «Սասնա ծռեր»-ը գոնե չեն արտահայտվել ռուսական ռազմաբազայի դուրսբերման օգտին։ Պուտինյան ռեժիմի դեմ կարելի է մի քանի արտահայտություններ հիշել, բայց ես, որքան էլ ուշադիր եմ հետեւում քաղաքական անցուդարձին, ես չեմ տեսնում «Սասնա ծռեր»-ից ընդգծված հակակրեմլյան հայտարարություններ։ Առանձին մարդկանց առանձին հայտարարությունները դեռևս կուսակցական դիրքորոշում չեն, եւ այս առումով, եզրակացություններ չէի անի»։

Խզմալյանը շեշտեց՝ ներկայացնում է կուսակցություն , որն իր ծրագրում ընդգրկել է ԵԱՏՄ-ից եւ ՀԱՊԿ-ից դուրս գալու, ռուսական զորքերը ՀՀ-ից դուրս բերելու,ԵՄ-ին եւ ՆԱՏՕ-ին միանալու գաղափարները. «Ինձ ծանոթ չեն այլ կուսակցություններ, որոնք ծրագրում ներառեն դա, այնպես, որ ես չեմ կարող մեկնաբանել այն, ինչ գոնե ինձ համար ակնհայտ չէ»։

Մեր մյուս հարցին, թե ինչպիսին կլինի հիշյալ հանդիպման հանրային արձագանքը՝ նկատի առնելով «Սասնա ծռեր»-ի անցյալը, որոնք զինված պայքարի կողմնակից էին եւ այն հանգամանքը, որ դա ոչ միանշանակ է ընդունվում հասարակության կողմից, Տիգրան Խզմալյանը պատասխանեց. «Ես էլ միանշանակ ընկալում չունեմ այդ հարցում։ Քանի որ նրանց հիմնադիրները իմ բարեկամներն են, ես ինքս եղել եմ «Սարդարապատ» շարժման, ապա «Նախախորհրդարան»-ի հիմնադիրներից մեկը եւ հեռացել եմ հենց այն պատճառով, որ մենք տարբեր մոտեցումներ հանդես բերեցինք այն գաղափարի շուրջը, որը հիմա մենք անվանում ենք ապագաղութացում ։ Բանն այն, է, որ միակ պայքարը հանուն երկրի ինքնիշխանության, ազատության եւ օտար լծից ազատության պետք է լինի։ Դա եւս մի շատ կարեւոր կետ է, որը մեզ բաժանում է, որքան էլ մարդկային առումով մենք մտերիմ ենք։ Զենք պետք է վերցնել ազգային ազատագրական պայքարի համար, միայն հանուն դրա, այլ ոչ թե գաղութի մեջ ներքին փոփոխություններ իրականացնելու համար, որը պահանջում էին «Ծռեր»-ը։ Կարծում եմ՝ դա սխալ էր, եւ դրանից հետո դուրս գալուց բանտից շատերը վերանայեցին իրենց մոտեցումները»։

Տիգրան Խզմալյանի խոսքով, այսպես կոչված թավշյա հեղափոխության սխալը նույնն է. «Փոփոխությունները փորձում են անել գաղութացված երկրի ներսում, բայց առանց մեր արտաքին քաղաքականության, տնտեսության, ռազմավարության եւ գաղափարախոսության փոփոխության ոչ մի զարգացում, ոչ մի ազատություն, զարգացում ու ինքնիշխանություն Հայաստանում չի լինի»։
Այսուհանդերձ,Տիգրան Խզմալյանը դրական է գնահատում Փաշինյան-«Սասնա ծռեր» հանդիպումը՝ որպես արտախորհրդարանական ուժի եւ կառավարության ղեկավարի հանդիպում։

«Քաղաքացիական հասարակությունը կառուցվում է երկխոսության միջոցով , եւ ինչպիսին էլ լինի արդյունքը, առիթը , ինչպես էլ մենք դա գնահատենք, երեւույթը, որ արտախորհրդարանական քաղաքական ուժը հանդիպում է իշխանության ղեկավարի հետ , արդեն իսկ դրական է»։
Ըստ Խզմալյանի, կարելի է ենթադրել, որ հանդիպման առիթը եղել այսպես կոչված «թեժ աշունը», որի մասին խոսում են բոլոր կողմերից ։

Աղբյուր` Փաստինֆո