Փաստ ինֆո

Մանկատան 219 շրջանավարտ 2019թ. հուլիս ամսվա դրությամբ ընդգրկված է բնակարանի կարիք ունեցող շրջանավարտների հերթացուցակում, սակայն վերջիններիս կացարանով ապահովելու համար կառավարությունն այս պահին չունի որևէ ստույգ ծրագիր։ «Փաստինֆո»-ի հարցմանն ի պատասխան՝ ՀՀ աշխատանքի և սոցիալական հարցերի նախարարության սոցիալական աջակցության վարչությունից նշեցին, որ անօթևան մնացած մանկատան սաներին կացարանով ապահովելու հարցն այժմ կառավարության գերխնդիրն է. «Նախարարության հետ համատեղ կառավարությունը խնդիրը լուծելու ուղղությամբ ծրագրեր է մշակում։ Դեռ հստակ որոշում չկա, բայց քննարկվում են հնարավոր տարբերակները, այդ թվում նաև արտոնյալ վարկերի միջոցով մանկատան սաներին բնակարան հատկացնելը»,-ասացին սոցապ նախարարությունից։

Նշենք, որ «Փաստինֆո»-ն գրավոր հարցմամբ դիմել էր նախարարություն՝ պարզելու թե 2019թ.-ի դրությամբ մանկատան քանի սան է հերթագրված բնակարան ստանալու համար և նրանցից քանիսն է ապահովվել կացարանով։ Նախարարության սոցիալական աջակցության վարչությունից տեղեկացնում են, որ բնակարանի կարիք ունեցող հաշվառված մանկատան շրջանավարտներից 161-ին մինչև 2013 թվականը հատկացրել են բնակարաններ։ Եվս 34 շրջանավարտի կացարաններ են հատկացվել սոցիալական բնակարանային ֆոնդ հանդիսացող շենքերից։

Նախարարությունն այժմ բնակելի տարածության կարիք ունեցող սոցիալապես անապահով և հատուկ խմբերին դասված անձանց համար  իրականացնում է սոցիալական բնակարանային ծրագիր։ Որպես սոցիալական բնակարանային ֆոնդ  Սոցապ նախարարության տնօրինությանն է հանձնվել Թբիլիսյան խճուղի 3/14 հասցեում գտնվող շենքը, որին ավելի վաղ անդրադարձել էինք։ Այստեղ կառավարության որոշմամբ անհատույց կարգով սոցիալական բնակարանով ապահովված բնակիչները բարձրաձայնում էին մի շարք խնդիրներ։ Նրանք պնդում էին, որ շենքում առկա 45 բնակարաններից մի քանիսը կա՛մ փակ են, կա՛մ վարձով են տրվել, մինչդեռ բազմաթիվ մանկատան սաներ շարունակում են սպասել բնակարան ստանալու իրենց հերթին։ «Փաստինֆո»-ի հետ զրույցում թիվ 1 տուն ինտերնատի տնօրենի տեղակալ Արամ Խաչատրյանը չէր հերքել բարձրաձայնված խնդիրների առկայությունը։ Բնակարանների փակ լինելու փաստը նա պայմանավորեց շահառուների սեզոնային աշխատանքի հետ, իսկ վարձակալության դեպքերի հետ կապված նկատեց՝ պայմանագրերն անմիջապես լուծելու և բնակարանն ուրիշ շահառուհի հանձնելու հստակ գործառույթ ունեն. «Դա չենք անում, քանի որ հաշվի ենք առնում, որ խոցելի սոցիալական խմբի հետ գործ ունենք, ուստի փորձում ենք բացատրել, որպեսզի իրենց գույքի նկատմամբ անբարեխիղճ չլինեն և այն վարձակալության չհանձնեն», - «Փաստինֆո»-ի հետ զրույցում նշել էր Արման Խաչատրյանը։

Անդրադարձել էինք նաև Թբիլիսյան խճուղի  3/2 հանրակացարանային շենքին։ Այն անմխիթար վիճակում է գտնվում և զուրկ է ապրելու համար նախատեսված տարրական պայմաններից, ուստի փորձեցինք տեղեկանալ, թե ում վրա է դրված շենքի պահպանման գործառույթը։ Այն սոցիալական բնակարանային ֆոնդ չի հանդիսանում, որի պատճառով դրա շահագործման ու բարեկարգման պարտականությունների վերաբերյալ Սոցապ նախարարությունից չկարողացանք տեղեկատվություն ստանալ։ Այլ խոսքով՝ շենքի սպասարկման համար պատասխանատու անձի ով լինելը մշուշոտ է, որի հետեւանքով մի շարք սոցիալապես անապահով ընտանիքներ ապրում են վթարային, անմխիթար եւ տարաբնույթ հիվանդություններիի բուն հանդիսացող պայմաններում։

Ի դեպ՝  սոցիալական բնակարանային ֆոնդի կառուցման կամ ձեռքբերման նպատակով պետբյուջեով ֆինանսական միջոցներ չեն նախատեսվում արդեն 10 տարի՝ 2009 թվականից։ Դա պայմանավորված է  2008-ին բացահայտված միլիոնավոր դրամների չարաշահումների գործով։

Նշենք, որ տարիներ առաջ՝ ՀՀ կառավարությունը գումարներ էր հատկացրել մանկատան երեխաների բնակարանային խնդիրը կարգավորելու համար եւ դեռես 2003 թվականի «Առանց ծնողական խնամքի մնացած երեխաներին բնակարան տրամադրելու կարգը հաստատելու մասին» թիվ 983-Ն որոշմամբ բնակարանները գնելու նպատակով Սոցապ նախարարության, «Սոկոլ Գրուպ» ՍՊԸ և ՀՀ կառավարությանն առընթեր պետգույքի կառավարման վարչության միջև կնքվել էր եռակողմ պայմանագիր։ Դրա համաձայն՝  «Սոկոլ Գրուպ» ՍՊ ընկերությունը պարտավորվել էր պայմանագրերով նախատեսված գումարով ձեռք բերել և նախարարությանն ու վարչությանը հանձնել 132 բնակարան։ Նշված բնակարանները նախատեսված էին մանկատան շրջանավարտների և առանց ծնողական խնամքի մնացած երեխաների համար։ «Սոկոլ Գրուպ» ընկերության տնօրենը, սակայն, առանց հատուկ թույլտվության, զբաղվել է լիցենզավորման ենթակա ձեռնարկատիրական գործունեությամբ, իսկ պայմանագրերով նախատեսված բնակարանները վաճառել է շուկայականից բարձր գներով։  Պետությանը միջոցները վատնվել էին, իսկ պատճառված վնասը կազմել էր մի քանի հարյուր միլիոն դրամ։

Դեպքից հետո մանկատան մի քանի տասնյակ սաներ շարունակում են մնալ առանց բնակարան, իսկ  կառավարությունն արդեն մի քանի տարի է, ինչ գումար չի գտնում մանկատան սաներին բնակարանով ապահովելու համար։

Հեղինակ` Հասմիկ Կոշկարյան