Փաստ ինֆո

Այս տարվա առաջին կիսամյակում նկատվել է հանցագործությունների աճ։ ՀՀ ոստիկանության շտաբի պետ, գնդապետ Արմեն Ղուկասյանի տեղեկացմամբ՝ հանցագործությունների թիվն ավելացել է 9 տոկոսով կամ 1007 դեպքով:

Այսօր հրավիրված ասուլիսում նրա հրապարակած վիճակագրական տվյալների համաձայն՝ 2018թ-ի 6 ամսվա ընթացքում հանցագործությունների թիվը եղել է 11.243, իսկ 2019թ-ի 6 ամսում՝ 12.250: Ղուկասյանը նաև նշեց, որ 1200 դեպքով ավելացել են գողությունները, հատկապես մեծ է ոչ մեծ ծանրությամբ գողությունների թիվը՝ 984:

‹‹Համադրելով 984 և 1007 թվերը, տեսնում ենք ՝ աճի մոտ 95 տոկոսը բաժին է ընկնում ‹‹Քրեական դատավարության›› օրենսգրքի 173-րդ հոդվածով նախատեսված մասնավոր գանգատի դեպքերի շարքին դասվող գողություններին: Այսինքն` ոչ մեծ ծանրության գողություններին››,-ասաց Ղուկասյանը:

Նա ընդգծեց, որ դեռևս նախորդ տարվանից՝ կապված իրավիճակի փոփոխության հետ բարձրացել է ՀՀ քաղաքացիների վստահությունը Ոստիկանության նկատմամբ և վերջիններս չեն խուսափում դիմել Ոստիկանությանը:

‹‹Եթե 2018թ-ի 6 ամիսների ընթացքում Ոստիկանության ստորաբաժանումներ ստացվել է 93.874 առերևույթ հանցագործության մասին հաղորդում, ապա 2019թ-ի 6 ամիսների ընթացքում դրանց թիվն աճել է՝  15. 213-ով››,-ասաց Ոստիկանության շտաբի պետն ու ավելացրեց, որ պատմության մեջ առաջին դեպքն է, որ այդ թիվն անցել է 100.000-ի սահմանը:

Հեղինակ` Սոնա Գեւորգյան