Փաստ ինֆո

Արդեն գրեթե մեկ տարի ՀՀ Ոստիկանության զորքերը մարտական հերթապահություն են իրականացնում հայ-ադրբեջանական սահմանին` պահպանելով ՀՀ քաղաքացիների անդորրն ու անվտանգությունը։ Այս մասին այսօր Ոստիկանության զորքերին նվիրված միջոցառման ժամանակ Ոստիկանության զորքերի գլխավոր վարչությունում ասաց ՀՀ վարչապետ Նիկոլ Փաշինյանը։

Նա շնորհակալություն հայտնեց Ոստիկանության զորքերի այն ծառայողներին, ովքեր կամավոր հիմունքներով նվիրվել են Հայաստանի սահմանների պաշտպանությանը. «Ես ուզում եմ շնորհակալություն հայտնել նաև այդ զինծառայողների ընտանիքների անդամներին, ովքեր սատար են կանգնել նրանց»,-ասաց ՀՀ վարչապետ Նիկոլ Փաշինյանը։

Նրա խոսքով` Ոստիկանության զորքերը կոչված են ՀՀ-ի ներսում բռնության որևէ դրսևորում կանխարգելելու համար. «Ոստիկանության զորքերը ուղարկելով հայրենիքի սահմանները պաշտապնելու՝ մենք արտահայտում ենք մեր պատկերացումը ՀՀ ներքին հարաբերությունների մասին, որ ՀՀ-ն պետք է լինի բռնությունից զերծ»,-ասաց Փաշինյանը։

Նա ընդգծեց, որ Հայաստանում պետք է լինի այնպիսի հանրություն, որտեղ տեղ չունի բռնությունով հարցեր լուծելու մտայնությունը։

Վարչապետը նշեց, որ սիրո ու համերաշխության մթնոլորտ ձևավորելու անմնացորդ ձգտումը ոմանք փորձ են անում մեկնաբանել որպես թուլություն. «Այսօր այստեղ ուզում եմ հստակ հայտարարել, որ որևէ մեկի մոտ կասկած չառաջան որ կառավարությունը երկչոտության որևէ դրսևորում և կամքի պակաս կունենա ՀՀ-ում սահմանադրական կարգը, քաղաքացիների իրավունքը, ՀՀ քաղաքացիների ազատությունն ու ժողովրդավարությունը պաշտպանելու գործում»,-ասաց ՀՀ վարչապետը։

Հեղինակ` Սոնա Գեւորգյան