Փաստ ինֆո

Այսօր կառավարությունը որոշեց 14 հազար եվրո հատկացնել Արդարադատության նախարարությանը՝«Մաշինյանը և Ռամազյանն ընդդեմ Հայաստանի» գործով վճռի պահանջները կատարելու նպատակով։

Մարդու իրավունքների եվրոպական դատարանը սույն գործով վճիռը կայացրել էր  2019 թվականի փետրվարի 14-ին՝ արձանագրելով, որ խախտվել է Կոնվենցիային կից թիվ 1 արձանագրության 1-ին հոդվածը։  

Գանգատը ներկայացվել էր  «Մարդու իրավունքների և հիմնարար ազատությունների պաշտպանության մասին» կոնվենցիայի 34-րդ հոդվածի համաձայ՝ն ՀՀ  քաղաքացիներ Ռուսայել, Ժենիկ, Շաքար, Վարազդատ Մաշինյանների և Լիանա Ռամազյանի կողմից։ Վերջիններս Շնող գյուղի բնակիչներ են, նախկինում եղել վարելահողերի սեփականատերեր, սակայն նրանց հողերը հասարակության և պետության կարիքների համար օտարվել են հանքարդյունաբերության կազմակերպումն իրականացնելու նպատակով։

Մասնավորապես՝ 2007 թվականին Կառավարությունն ընդունել է «ՀՀ Լոռու մարզի Շնողի և Թեղուտի գյուղական համայնքների վարչական սահմաններում որոշ տարածքներում բացառիկ՝ գերակա հանրային շահ ճանաչելու և հողերի նպատակային նշանակությունը փոփոխելու մասին» թիվ 1279-Ն որոշումը։ Որոշման համաձայն հողատարածքների ձեռք բերող է համարվում «Թեղուտ» ՓԲԸ-ն։ Դիմումատուներին պատկանող 1.622 հա վարելահողը նույնպես թվարկված հողատարածքների շարքում է եղել։ Դիմումատուներին տրվել է շուկայական գինն արտահայտող փոխհատուցում՝ օրենքով սահմանված լրացուցիչ տոկոսի ավելացմամբ։ Վերջիններս, սակայն, պնդել են, որ օտարվող հողատարածքը հանդիսացել է իրենց եկամտի միակ աղբյուրը, և օտարվող սեփականության դիմաց սահմանված փոխհատուցման գումարը շատ ցածր համարել։

Եվրոպական դատարանը համարել է, որ կարող են լինել  իրավիճակներ, երբ տվյալ անշարժ գույքի շուկայական գինն արտահայտող փոխհատուցումը՝ նույնիսկ օրենքով սահմանված լրացուցիչ տոկոսի ավելացմամբ, գույքից զրկելու դիմաց կարող է բավարար փոխհատուցում չհամարվել։ Նման իրավիճակ կարող է առաջանալ այն դեպքում, երբ անձը զրկվում է իր եկամտի հիմնական, եթե ոչ միակ աղբյուրից, և առաջարկվող փոխհատուցումը չի համապատասխանում այդ կորստին։ Եվրոպական դատարանը գտել է, որ դիմումատուները ստիպված են եղել առանձին ավելորդ բեռ կրել։ Հետևաբար, վիճարկվող օտարումներն իրականացվել են Կոնվենցիային կից թիվ 1 արձանագրության 1-ին հոդվածի խախտմամբ։ Գործերի քննության արդյունքում Եվրոպական դատարանը Հայաստանի Հանրապետությանը պարտավորեցրել է «Մաշինյանը և Ռամազյանն ընդդեմ Հայաստանի» գործով դիմումատուներին վճարել 14000 եվրո։ Վճռով սահմանված հատուցման գումարի վճարման վերջնաժամկետը 2019 թվականի մայիսի 14-ն է։

Հեղինակ` Հասմիկ Կոշկարյան