Փաստ ինֆո

«Սասնա ծռեր-1»-ի գործով այսօրվա դատական նիստում ամբաստանյալները հայտարարեցին, որ քանի դեռ լուծված չէ Արմեն Բիլյանի ու Սմբատ Բարսեղյանի «Արմավիր» քրեակատարողական հիմնարկ տեղափոխելու հարցը, իրենք հրաժարվում են իրենց պաշտպաններից ու  դատական նիստերին մասնակցելուց:

Մարդկանց կյանքի հարցն է դրված, հարցին լուծում չտալու պայմաններում իր կողմից որևէ գործողության մասնակցելն  անբարոյականություն կլինի, հայտարարեց Գագիկ Եղիազարյանը:  Պավել Մանուկյանն իր հերթին հայտարարեց. «Իմ ընկերները ենթարկվում են տառապյալ մահվան: Մեզ կարող եք ազատազրկել, բայց չեք կարող դատել»:

Բոլոր ամբաստանյալները հայտարարեցին, որ հրաժարվում են իրենց պաշտպաններից, միայն Արմեն Բիլյանը հայտարարեց, որ չի հրաժարվում իր պաշտպանից ու շարունակում է հացադուլը,   «մինչև մահ գնալու եմ»՝ նա և Սմբատ Բարսեղյանը քսան օրից ավելի գտնվում են հացադուլի մեջ:

Դատարանի ճշտող հարցին՝ հրաժարվո՞ւմ եք Ձեր պաշտպանից, Սմբատ Բարսեղյանը հայտարարեց, որ ինքն իր պաշտպանից հրաժարվել է դեռևս անցյալ տարվա դեկտեմբերի 20-ին: 

Պաշտպան Ինեսսա Պետրոսյանը հայտարարեց, որ իրենց պաշտպանյալները իրենց ընկերների հացադուլի դիմելուց հետո հարկադրված դիմում են հաջորդ ծայրահեղ քայլին՝ պաշտպաններից հրաժարվելուն, որովհետև այլ ելք չեն տեսնում. Սմբատ Բարսեղյանն ու Արմեն Բիլյանը չեն տեղափոխվում «Արմավիր» ՔԿՀ, ինչը րոպեների ընթացքում լուծվելիք հարց է:

Դատարանը ընդունեց ամբաստանյալների՝ պաշտպաններից հրաժարումը:  Եվ քանի որ Գագիկ Եղիազարյանը , Էդվարդ Գրիգորյանը, Արեգ Կյուրեղյանն ու Սմբատ Բարսեղյանը հայտարարեցին, որ լքում են նիստերի դահլիճը, նրանց նկատմամբ  դատարանը կիրառեց երկու ժամով  դատական նիստերի դահլիճից հեռացնելու սանկցիան, իսկ նման պայմաններում փաստաբանի մասնակցությունը պարտադիր է, ուստի դատարանը որոշեց դիմել  Հանրային պաշտպանի գրասենյակ՝  հաջորդ դատական նիստին  հանրային պաշպաններ հրավիրելու համար: 

Մինչ  այդ դատարանում քննության առարկա դարձան  Բիլյանին ու Բարսեղյանին «Արմավիր» ՔԿՀ տեղափոխելու հարցի շուրջ Քրեակատարողական վարչության պետի երկու տեղակալների իրարամերժ գրությունները՝ մի դեպքում Արմեն Բիլյանի պաշտպան Արմինե Ֆանյանին ՔԿՎ պետի տեղակալը պատասխանել  էր, որ տեղափոխման համար անհրաժեշտ է վարույթն իրականացնող մարմնի, տվյալ դեպքում՝ դատարանի,  համաձայնությունը, մյուս դեպքում դատարանին ուղղած դիմումում ՔԿՎ պետի մեկ այլ տեղակալ հայտնել է, որ այլ քրեակատարողական հիմնարկ տեղափոխելու անհրաժեշտություն չկա և որ բուժօգնության ու հետազոտության  առումով պայմանները «Նուբարաշենում» և «Արմավիրում» համանման են:

Արմինե Ֆանյանը հայտարարեց, որ «Նուբարաշեն» ՔԿՀ-ում իր պաշտպանյալի պահման պայմանները համատեղելի չեն նրա առողջական վիճակի հետ և որ իր պաշտպանյալը կյանքը վտանգի տակ է: Պաշտպանը պնդեց, որպեսզի իր պաշտպանյալը տեղափոխվի «Արմավիր» ՔԿՀ մենախուց՝  առավել ևս որ «Սասնա ծռերի» գործերով կալանավորվածները այնտեղ մենախցերում են պահվում:

Պավել Մանուկյանն իր հերթին  հիշեցրեց Արթուր Սարգսյանի՝ Հաց բերողի, օրինակը,  ով վախճանվեց ու ոչ ոք պատասխանատվության չենթարկվեց դրա համար:

Դատարանն արձանագրեց, որ կյանքի և այլ իրավունքներ երաշխավորված են  Սահմանադրությամբ, սակայն միաժամանակ Սահմանադրության վեցերորդ  հոդվածով ամրագրված է, որ պետական ու տեղական ինքնակառավարման մարմիններն ու պաշտոնատար անձինք իրավասու են կատարելու այնպիսի գործողություններ, որոնց համար լիազորված են Սահմանադրությամբ  և օրենքներով: Տվյալ դեպքում դատարանը լիազորություն չունի պարտադրել ՔԿՎ-ին տեղափոխել անձանց այլ ՔԿՀ, ուստի դատարանին ոչինչ չի մնում, քան մերժել պաշտպանի միջնորդությունը՝ հավելելով, որ չի առարկում Բիլյանի  տեղափոխման դեմ:   

Դատական նիստում մինչև ամբաստանյալների՝ պաշտպաններից հրաժարումը փաստաբան Հայկ Ալումյանը բարձրացրեց  իրեն նորից որպես Սմբատ Բարսեղյանի պաշտպան ներգրավելու հարցը: Դատարանն ի պատասխան հայտարարեց, որ պաշտպանը հեռացված չէ վարույթից, ուստի նորից ներգրավելու հարց չկա՝ ըստ դատարանի, ինքը չի ընդունել դեկտեմբերի 20-ին Սմբատ Բարսեղյանի հրաժարումն իր պաշտպանից՝ Ս.Բարսեղյանն, ըստ դատարանի,  հրաժարվել  է իր պաշտպանից  «քանի ես ստեղ չեմ» ձևակերպմամբ, այսինքն՝ քանի  Սմբատ Բարսեղյանը հեռացված է դատական նիստերի դահլիճից:  Սմբատ Բարսեղյանը  նախապայմաններով պաշտպանությունից  հրաժարվելու իրավունք չունի, հայտարարեց դատարանը: Փաստաբան Հայկ Ալումյանը հակադարձեց՝ բառախաղ պետք չէ անել: Ըստ փաստաբանի, պաշտպանից հրաժարումը եղել է կամավոր և իր ներկայությամբ, այսինքն՝ պահպանվել են օրենքով նախատեսված պայմանները: Դատարանն իրավունք չունի մտնել իր և պաշտպանյալի հարաբերությունների մեջ, հավելեց  Հայկ  Ալումյանը:    

Լրագրողների հետ զրույցում Հայկ Ալումյանը նշեց, որ  դեկտեմբերի 24-ին Սմբատ Բարսեղյանը դիմում է գրել նախագահող դատավորին, որում բառացիորեն հայտնել է հետևյալը.

«Նկատի ունենալով, որ 20.12.2017թ.  ինձ նիստերի դահլիճից հեռացնելու ժամանակ արածս հայտարարությունը Ձեր կողմից սխալ է ընկալվել և մեկնաբանվել, ուստի կրկնում եմ և Ձեզ համար պարզաբանում եմ, որ ես հրաժարվել եմ իմ պաշտպանից հենց այն նույն պահին, երբ որոշեցիք ինձ հեռացնել  դահլիճից: Սկսած այդ պահից՝ ո՛չ պրն. Հայկ Ալումյանը, ո՛չ էլ որևէ այլ փաստաբան իրավասու չի համարվելու իմ պաշտպանը:  Ձեր կիրառած սանկցիայի ժամկետը լրանալուց հետո ես ինձ իրավունք եմ վերապահում կրկին օգտվելու պաշտպան ունենալու իրավունքից, որի մասին կհայտնեմ լրացուցիչ»:

Աղբյուր` Փաստինֆո