Փաստ ինֆո

Կալանքի տակ գտնվող ՀՀ Գեղարքունիքի մարզի ընդհանուր իրավասության դատարանի նախագահ Աղվան Պետրոսյանը կալանավայրի պայմաններից «դժգոհ է». «Ընենց չի որ ընդեղ լեն ու բոլ պայմաններ են»:

Ամբաստանյալի աթոռին հայտնված դատարանի նախագահը դժգոհություն հայտնեց այն բանից հետո, երբ վերջինս պաշտպան Արմեն Մելքոնյանը միջնորդեց այսօրվա գործով դատական նիստը հետաձգել և իր պաշտպանյալին տրամադրել քրեական գործի նյութերը, ինչպես նաև՝ 275 տեսաերիզները և կալանավայրում տեխնիկական պայմանների ապահովմամբ հնարավորություն ընձեռել՝ գործի ողջ նյութերին ծանոթանալու համար:

Պաշտպանը նշեց, որ դեռևս 3 նիստ առաջ է միջնորդել, սակայն մինչ այսօր չեն տրամադրվել, որին ի պատասխան՝ նախագահողը հայտնեց, որ այդ միջնորդությունը բավարարվել է մասնակի և գործի նյութերը պատճենահանվում են և ողջ ծավալով կտրամադրվի կողմին, ապա բավարարեց նիստը հետաձգելու վերաբերյալ պաշտպանի միջնորդությունը:

Սակայն մինչև այդ այսօր մեղադրող դատախազ Դավիթ Կարապետյանը հրապարակեց 13 ամբաստանյալներից ութի մեղադրական եզրակացության եզրափակիչ մասը: Նախորդ դատական նիստում հրապարակվել էր հինգի մասով մեղադրական եզրակացության եզրափակիչ մասը:

Այսպիսով, հրապարակված մեղադրական եզրակացությունից հետո ամուսիններ Մելանյա և Կամո Գալստյանները մեղադրանքի վերաբերյալ հայտարարեցին, որ դիրքորոշում կհայտնեն դատաքննության ընթացքում, թեև կինն իրեն մեղավոր էր ճանաչում, իսկ ամուսինը՝ ոչ:

Ի տարբերություն մյուսների՝ փաստաբան Էդվարդ Չինարյանն իրեն մեղավոր ճանաչեց առաջադրված մեղադրանքում՝ միևնույն ժամանակ հայտարարելով, որ մեղադրականում որոշակի անճշտություններ կան:

Ամբաստանյալ Ռոբերտ Գրիգորյանին էլ մեղադրանքը պարզ չէր, ցայտնոտի մեջ էր հայտնվել և ամիսներ շարունակ քննվող գործի վերաբերյալ դեռևս չէր կարողանում հստակ դիրքորոշում հայտնել: Ասաց՝ «զղջում եմ, բայց մեղավոր եմ ճանաչում ինձ», թե ի՞նչ նկատի ուներ ամբաստանյալը, այդպես էլ հասկանալի չդարձավ:

Ամբաստանյալի այս հայտարարությանն արձագանքեցին գործով մյուս ամբաստանյալների պաշտպանները: Մասնավորապես՝ Արմեն Բարսեղյանի պաշտպան Հովսեփ Սարգսյանը նշեց, որ, ըստ էության, ամբաստանյալին հասկանալի չէ մեղադրանքը, պաշտպան Արմեն Մելքոնյանն էլ կարծիք հայտնեց, թե իրենց հասկանալի չէ, ամբաստանյալին որտեղի՞ց պետք է մեղադրանքը հասկանալի լինի:

Ի վերջո արձագանքեց նաև ամբաստանյալի պաշտպանը՝ խնդրելով դադարեցնել դիրքորոշման վերաբերյալ հանգամանքների պարզաբանումը և հավելեց, որ դիրքորոշում այս պահին չունեն:

ՀՀ ԿԱ ԱԳԿ ՊԿ Գեղարքունիքի մարզային ստորաբաժանման անշարժ գույքի ռեգիստր Խաչատուր Դադոյանը, ով որպես անշարժ գույքի պետական գրանցում իրականացնելու լիազորություն ունեցող պաշտոնատար անձ է, ևս իրեն մեղավոր չճանաչեց առաջադրված մեղադրանքում:

Իսկ ՀՀ ԿԱ ԱԳԿ ՊԿ Գեղարքունիքի մարզային ստորաբաժանման ղեկավարի տեղակալ Արմեն Բարսեղյանը, ով մեղադրվում է անձնական այլ դրդումներից ելնելով պաշտոնեական լիազորությունները չարաշահելու մեջ, որն էական վնաս է պատճառել պետության օրինական շահերին՝ իր վերաբերյալ հրապարակված մեղադրական եզրակացությունը լսելուց հետո հայտարարեց, որ  մեղադրանքն իրեն  պարզ չէ, դիրքորոշում կհայտնի դատաքննության ընթացքում, սակայն հավելեց՝ մեղադրանքը չի ընդունում:

Բարսեղյանի պաշտպան Հովսեփ Սարգսյանն էլ հայտարարեց՝ իր պաշտպանյալին առաջադրված մեղադրանքը վերաբերելի չէ, անձին խորհուրդ տալու համար պաշտոնական դիրքի չարաշահման մեջ են մեղադրում:

ՀՀ ԿԱ ԱԳԿ ՊԿ Գեղարքունիքի մարզային ստորաբաժանման ղեկավար Վրույր Վարդանյանը, ով ևս մեղադրվում է պաշտոնեական լիազորությունները չարաշահելու մեջ՝ առաջադրված մեղադրանքը չընդունեց: Վարդանյանի պաշտպանը ևս հայտարարեց, որ մեղադրանքը պարզ չէ:

«Նուբարաշեն» ՔԿՀ-ում պաշտոնատար անձ չհանդիսացող հանրային ծառայող Լաուրա Մարտիրոսյանն էլ, ով մինչ դատական նիստը սկսվելը լրագրողներին հորդորում էր գնալ սահմանին տեսանկարահանումներ կատարել, և որ այս գործով նկարելու բան չկա, չշտապեց մեղադրանքի վերաբերյալ դիրքորոշում հայտնել, դատաքննության ընթացքում կհայտնի:

Այսպես, Վարդենիս քաղաքում զենքի գործադրմամբ կատարված խուլիգանության և դանակահարության փաստի առթիվ քննվող քրեական գործով մեղադրյալ Գոռ Գալստյանի արարքը որպես ինքնապաշտպանություն որակելուն նպաստելու համար Գեղարքունիքի մարզի դատախազ Սևակ Շհոյանը մեղադրյալի ծնողներ Կամո և Մելանյա Գալստյաններից 2015 թվականի հունիսին պահանջել ու ստացել է առանձնապես խոշոր չափերով` 1.880.000 ՀՀ դրամին համարժեք 4000 ԱՄՆ դոլար կաշառք: Սակայն գումարն ստանալուց հետո դատախազը խոստումը չի կատարել, և Գոռ Գալստյանը կալանավորվել է:

Բացի այդ, Կամո և Մելանյա Գալստյաններն իրենց որդուն ավելի մեղմ պատասխանատվության ենթարկելու և նույն գործով մեղադրյալ իրենց բարեկամին պատասխանատվությունից ազատելու համար Վարդենիսի բնակիչ Հայկ Կարապետյանի և Գեղարքունիքի մարզի ընդհանուր իրավասության դատարանի նախագահի վարորդ Կարեն Մարտիկյանի միջոցով գործով վարույթ իրականացնող, հիշյալ դատարանի նախագահ Աղվան Պետրոսյանին տվել են 11.343.373 ՀՀ դրամին համարժեք առանձնապես խոշոր չափերով` 23.000 ԱՄՆ դոլար կաշառք, որից հետո վերջինս կայացրել է նախապես պայմանավորված ապօրինի դատական ակտը:

Գործի նախաքննության ընթացքում բացահայտվել է կաշառքի միջնորդության և դատական իշխանության ներկայացուցիչների կողմից կաշառք ստանալու ևս մեկ դեպք: Գեղարքունիքի մարզի ընդհանուր իրավասության դատարանի նախագահն ու նույն դատարանի դատավոր Վանիկ Վարդանյանը, հիշյալ մարզի Ձորագյուղ համայնքի բնակիչ Զարիկ Գրիգորյանի անշարժ գույքի կապակցությամբ վճռի պարզաբանում տալու համար, խմբով առանձնապես խոշոր չափերով կաշառք են ստացել:

Մասնավորապես՝ Զ.Գրիգորյանի ամուսինը` Ռոբերտ Գրիգորյանը, փաստաբան էդվարդ Չինարյանի միջնորդությամբ հիշյալ դատարանի նախագահին և դատավորին տվել է 1.011.600 ՀՀ դրամին համարժեք 120.000 ՌԴ ռուբլի կաշառք, որի արդյունքում դատավոր Վանիկ Վարդանյանը կայացրել է նախապես պայմանավորված ակնհայտ ապօրինի դատական ակտը: Ավելին՝ ՀՀ անշարժ գույքի կադաստրի պետական կոմիտեի աշխատակիցներ Խաչատուր Դադոյանը, Արմեն Բարսեղյանն ու Վրույր Վարդանյանը չարաշահել են իրենց պաշտոնեական դիրքն ու դատարանի կողմից ակնհայտ անհիմն որոշում կայացնելու համար դատարանի նախագահին ու դատավորին վերջիններիս պահանջով տրամադրել անհրաժեշտ փաստաթղթեր, որոնք դրվել են որոշման հիմքում:

Ի դեպ, նախաքննության ընթացքում բացահայտվել է նաև քրեակատարողական հիմնարկի պաշտոնատար անձի կողմից կատարված հանցագործության դեպք, որում դարձյալ ներգրավված են եղել Գեղարքունիքի մարզի ընդհանուր իրավասության դատարանի նախագահի վարորդ Կարեն Մարտիկյանն ու նրա ընկերը` նույն մարզի բնակիչ Հայկ Կարապետյանը:

Մասնավորապես՝ պարզվել է, որ ՀՀ ԱՆ «Նուբարաշեն» ՔԿՀ-ի կալանավոր, ծանր և առանձնապես ծանր հանցագործությունների մեջ մեղադրվող Լիպարիտ Մարգարյանին իր նախընտրած խուց տեղափոխելու համար նույն հիմնարկի պաշտոնատար անձը` Լաուրա Մարտիրոսյանը, Կ. Մարտիկյանի միջոցով Հ.Կարապետյանից որպես ապօրինի վարձատրություն ստացել է 45.000 ՀՀ դրամ, ապա` օգտագործելով իր ծառայողական դիրքը՝ կալանավորին տեղաբաշխել այլ խուց:

Աղվան Պետրոսյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով (2 դրվագ),
Վանիկ Վարդանյանին՝ ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով,
Սևակ Շհոյանին՝ ՀՀ քրեական օրենսգրքի 311-րդ հոդվածի 4-րդ մասի 2-րդ կետով,
Կարեն Մարտիկյանին՝ ՀՀ քրեական օրենսգրքի 313-րդ հոդվածի 1-ին մասով (2 դրվագ),
Հայկ Կարապետյանին՝ ՀՀ քրեական օրենսգրքի 313-րդ հոդվածի 1-ին մասով և 34-312-րդ հոդվածի 1-ին մասով,
Մելանյա Գալստյանին՝ ՀՀ քրեական օրենսգրքի 312-րդ հոդվածի 3-րդ մասի 1-ին կետով (2 դրվագ),
Կամո Գալստյանին՝ ՀՀ քրեական օրենսգրքի 312-րդ հոդվածի 3-րդ մասի 1-ին կետով (2 դրվագ),
Էդվարդ Չինարյանին՝ ՀՀ քրեական օրենսգրքի 313-րդ հոդվածի 1-ին մասով,
Ռոբերտ Գրիգորյանին՝ ՀՀ քրեական օրենսգրքի 312-րդ հոդվածի 1-ին մասով,
Խաչատուր Դադոյանին՝ ՀՀ քրեական օրենսգրքի 308-րդ հոդվածի 1-ին մասով,
Արմեն Բարսեղյանին՝ ՀՀ քրեական օրենսգրքի 308-րդ հոդվածի 1-ին մասով,
Վրույր Վարդանյանին՝ ՀՀ քրեական օրենսգրքի 308-րդ հոդվածի 1-ին մասով
Լաուրա Մարտիրոսյանին՝ ՀՀ քրեական օրենսգրքի 311.1-րդ հոդվածի 1-ին մասով:

Հիշեցնենք նաև, որ 13 ամբաստանյալներից կալանքի տակ են գտնվում 5-ը՝ Գեղարքունիքի մարզի ընդհանուր իրավասության դատարանի նախագահ Աղվան Պետրոսյանը, նրա վարորդ Կարեն Մարտիկյանը, նույն դատարանի դատավոր Վանիկ Վարդանյանը, Գեղարքունիքի մարզի դատախազ Սևակ Շհոյանը և նույն մարզի բնակիչ Հայկ Կարապետյանը:

Աղբյուր` Փաստինֆո