Փաստ ինֆո

«Անելիք» բանկի իրավաբանական վարչության պետ Հովհաննես Աթանյանի սպանության գործով այսօրվա դատական նիստում հարցաքննվեց մեկ վկա:

Վկան պատմեց, որ տուժողն ու բանկի ևս մեկ աշխատակիցը՝ իր փեսան, որոշել են ՍՊԸ ստեղծել՝ վկայի գլխավորությամբ: Վկան պետք է զբաղվեր կազմակերպչական հարցերով, ՍՊԸ-ի նպատակն էր աշխատեցնել ամբաստանյալ Մկրտիչ Պողոսյանի նախկին սեփականությունը հանդիսացող «Անգելինա» ռեստորանը, որպեսզի օբյեկտը ոտքի կանգնի և որպեսզի հետագայում կարողանան վաճառել այն, անձնական շահագրգռվածություն չեն ունեցել:

Ըստ վկայի, նախկին սեփականատիրոջը պատկանող գույքը փակել են երկու սենյակում: Գույքը միայն մասամբ է օգտագործվել, մասնավորապես, սեղանը, գազօջախն ու լուսամփոփն է օգտագործվել, մնացած գույքը չի օգտագործվել:

Ամբաստանյալը վկային փորձեց հարցեր ուղղել, հարցերը մեղադրական բնույթի էին: Դատարանը հիշեցրեց, որ մեղադրանք իրեն՝ ամբաստանյալին է առաջադրված և ոչ թե նրանց՝ բանկի աշխատակիցներին: Ամբաստանյալի հարցերն այսպիսով սպառվեցին:

Հաջորդ դատական նիստում դատարան չներկայացած երեք վկաներից երկուսը բերման կենթարկվեն, իսկ մեկին հարցում կուղարկվի սահմանային ծառայություններին՝ պարզելու նա հատե՞լ է Հայաստանի սահմանը, թե՞ ոչ:

Հիշեցնենք, որ 2015թ. նոյեմբերի 24-ին` ժամը 20:40-ի սահմաններում, Վարդանանց փողոցում որսորդական հրացանից արձակված կրակոցով սպանվել էր «Անելիք» բանկի իրավաբանական վարչության պետ Հովհաննես Աթանյանը， ում հայրը երկար տարիներ աշխատել է որպես դատավոր։

Սպանությունը կատարելու մեջ մեղադրվում է տաքսու վարորդ Մկրտիչ Պողոսյանը, ով բանկի հետ ունեցել է գույքային վեճ, ինչի կապակցությամբ նախկինում մի քանի անգամ հանդիպել է բանկի իրավաբանական վարչության պետին: Վերջին հանդիպումը տեղի է ունեցել դեպքի օրը՝ բանկում, որից ժամեր անց տեղի է ունեցել սպանությունը։

2012թ-ի սեպտեմբերին Պողոսյանները վաճառել են Փարաքարում գտնվող, իրենց ընտանիքին պատկանող «Անգելինա» ռեստորանը, որի ներսում գտնվող գույքը նույն պայմանագրով անհատույց օգտագործման պայմանագրով հանձնվել է ռեստորանի նոր տիրոջը: Նա էլ գրեթե անմիջապես գրավադրել է ռեստորանի անշարժ գույքը «Անելիք բանկ»-ում` դրա դիմաց ստանալով 1.300.000 ԱՄՆ դոլարի վարկ: Սակայն հետագայում վարկային պարտավորությունները չի կատարել, որի պատճառով էլ գրավադրված գույքը դարձել է բանկի սեփականությունը:

Իմանալով այս մասին՝ Մկրտիչ Պողոսյանը դիմել է բանկ` ռեստորանում մնացած իր գույքի դիմաց բանկից պահանջելով 300.000 ԱՄՆ դոլար:
Բանկը, սակայն, հրաժարվել է վճարել կամ վերադարձնել գույքը` պատճառաբանելով, որ ռեստորանային համալիրում գտնվող շարժական գույքը նույնպես հանդիսացել է գրավի առարկա, որի նկատմամբ բռնագանձում է տարածվել և այն չի կարող վերադարձվել իրեն:

Այս հարցի շուրջ Մկրտիչ Պողոսյանը 2012թ-ից մինչ օրս բազմիցս հանդիպել է բանկի իրավաբան, այնուհետև իրավաբանական վարչության պետ Հովհաննես Աթանյանին, բայց մերժում ստացել:
Մկրտիչ Պողոսյանը նաև դատարան է դիմել` դատական կարգով փորձելով վերականգնել իր խախտված իրավունքները: Բայց քաղաքացիական գործերի քննությունը դեռևս չավարտված՝ Մկրտիչ Պողոսյանն իմացել է, որ «Անգելինա» ռեստորանը` իրեն պատկանող գույքով, դարձյալ շահագործվում է:

Աղբյուր` Փաստինֆո