Փաստ ինֆո

ՀՀ Նախագահի հրամանագրով Վերաքննիչ քրեական դատարանի դատավորներ են նշանակվել՝ Նարինե Հովհակիմյանը, Կարեն Մարդանյանը, Անդրանիկ Մնացականյանը:

ՀՀ նախագահի հրամանագրով.

1. Նարինե Հովակիմյանին նշանակել Հայաստանի Հանրապետության վերաքննիչ քրեական դատարանի դատավոր` դադարեցնելով նրա` Լոռու մարզի ընդհանուր իրավասության առաջին ատյանի դատարանի դատավորի լիազորությունները:

2. Կարեն Մարդանյանին նշանակել Հայաստանի Հանրապետության վերաքննիչ քրեական դատարանի դատավոր` դադարեցնելով նրա` Երևան քաղաքի Շենգավիթ վարչական շրջանի ընդհանուր իրավասության առաջին ատյանի դատարանի դատավորի լիազորությունները:

3. Անդրանիկ Մնացականյանին նշանակել Հայաստանի Հանրապետության վերաքննիչ քրեական դատարանի դատավոր` դադարեցնելով նրա` Սյունիքի մարզի ընդհանուր իրավասության առաջին ատյանի դատարանի դատավորի լիազորությունները:

4. Ուժը կորցրած ճանաչել Հայաստանի Հանրապետության Նախագահի 2010 թվականի նոյեմբերի 9-ի «Վերաքննիչ դատարաններում դատավոր նշանակվելու համար ծառայողական առաջխաղացման ցուցակը հաստատելու մասին» ՆՀ-270-Ա հրամանագրի 1-ին կետով հաստատված հավելվածի` Քրեական մասնագիտացման բաժնի 1-ին, 2-րդ և 3-րդ կետերը:

Ավելի վաղ «Փաստինֆո»-ն տեղեկացրել էր, որ դեռևս նախորդ տարվանից վերաքննիչ քրեական դատարանում կար երկու թափուր տեղ, դատավոր Արարատ Պետրոսյանի լիազորությունները դադարեցվել էին 65 տարին լրանալու կապակցությամբ, իսկ դատավոր Լիլիթ Թադևոսյանը ՀՀ Նախագահի հրամանագրով նշանակվել էր ՀՀ վճռաբեկ դատարանի քրեական պալատի դատավոր:

Այս տարի հունվարի 30-ին էլ լրացավ դատավոր Գրիշա Մելիք-Սարգսյանի 65 տարին, նա ևս գնաց թոշակի:

Իսկ Վերաքննիչ քրեական դատարանի դատավոր Կարինե Ղազարյանը դեռևս մինչև տարեվերջ՝ դեկտեմբերի 17-ը, կշարունակի պաշտոնավարել, այդ օրը կլրանա դատավորի 65- տարին և նա ևս կգնա թոշակի:

Աղբյուր` Փաստինֆո