Փաստ ինֆո

Կարելի է ասել, որ այսուհետ Վահան Շիրխանյանը կատարյալ մեկուսացման մեջ է և նրան չեն թույլատրում տեսակցել ոչ միայն լրագրողների կամ հարազատների հետ, այլ անգամ իր սեփական պաշտպանի հետ, ինչը չլսված երևույթ է: Այս մասին «Հայելի» մամուլի ակումբում լրագրողների հետ այսօրվա հանդիպմանը հայտարարեց ՀՀ նախկին փոխվարչապետ, Պաշտպանության նախկին փոխնախարար Վահան Շիրխանյանի պաշտպան, փաստաբան Հայկ Ալումյանն՝ ընդգծելով, որ ինքն որպես փաստաբան ոչ միայն երբևէ չի հայտնվել նման իրավիճակում, այլև չի լսել, որ Հայաստանում որևէ մեկի հետ այդպիսի դեպք պատահած լինի:

Տեսակցությունների ու հեռախոսային խոսակցությունների, լրագրողների հետ շփումների, ՄԻԵԴ-ում փաստաբանների հետ տեսակցելու արգելքից հետո Վահան Շիրխանյանը արտաքին աշխարհի հետ կապը պահում էր իր միջոցով: Ինքն էլ փետրվարի 11-ից այլևս չի կարողանում տեսակցել իր պաշտպանյալի հետ:

Ըստ քրեակատարողական հիմնարկի պատճառաբանության, Վահան Շիրխանյանը չի ցանկացել դուրս գալ խցից և ներկայանալ տեսակցությունների համար նախատեսված սենյակ՝ հայտարարելով, որ չի կարող գալ և առանձին տեսակցել պաշտպանի հետ:

Փաստաբան Հայկ Ալումյանին թույլ չեն տվել տեսակցել իր պաշտպանյալին՝ Վահան Շիրխանյանին

Հ.Ալումյանը պարզաբանեց, որ Վ.Շիրխանյանը երևի մոտավորապես վեց ամիս է, ինչ երբեք չի կարողացել ինքնուրույն գալ ու տեսակցել պաշտպանին, միշտ իրեն օգնել են՝ ձեռքերից, թևատակերից բռնած բերել-հասցրել են պաշտպանի հետ տեսակցության: Պարզապես, ըստ պաշտպանի, հիմա իրավիճակը փոխվել է, Վ.Շիրխանյանին չեն էլ ուզում նույնիսկ օգնել, որպեսզի նա գա տեսակցելու իր պաշտպանի հետ, իսկ նա ինքնուրույն չի կարողանում քայլել:

Մերժում ստանալով՝ պաշտպանը գրավոր դիմել է ՔԿՀ ղեկավարությանը, որպեսզի այդ դեպքում իրեն հնարավորություն տան Վ.Շիրխանյանին տեսակցել նրա խցում, սակայն ստացել է բանավոր մերժում:

Ըստ Հայկ Ալումյանի, մերժման պատրվակն եղել է այն, որ խուցը արգելված գոտի է, այնտեղ մուտքն արգելված է նաև պաշտպանների համար, քանի որ այդ խցում կան նաև ուրիշ մարդիկ ուրիշ քրեական գործերով: «Պատճառը խորքային է՝ պարզապես, ես ոնց հասկանում եմ, իրենք փորձում են կոտրել պրն. Շիրխանյանի դիմադրությունը, փորձում են բարոյապես, հոգեբանորեն նրան ընկճել, կոտրել դիմադրելու ցանկությունը, որն, իհարկե, իրենց չի հաջողվել, բայց իրենք դա փորձում են»,- ասաց փաստաբանը:

Ապա պաշտպանը խնդրել է իր պաշտպանյալին փոխանցել նրա գործի հետ կապված ՄԻԵԴ-ից ստացված փաստաթուղթը՝ գործին վերաբերող փաստաթղթեր ստանալը նույնպես նրա անվիճելի իրավունքն է, սակայն այդ խնդրանքն ևս մերժվել է:
«Այսինքն՝ ապօրինությունը արդեն դադարել է ուղղակի ապօրինություն լինելուց, սա արդեն կարելի է կոչել իրավական սանձարձակություն, որն իրականում կապված է այն բանի հետ, որ փետրվարի 9-ին Եվրոպական դատարանից Հայաստանի Հանրապետությունը պրն. Շիրխանյանի գործի հետ կապված ստացել է 5 հարց, որոնց երկիրը պետք է պատասխանի շատ կարճ ժամկետում, մինչև փետրվարի 22-ը»,- ասաց Հայկ Ալումյանը՝ հավելելով, որ բոլոր հարցերը վերաբերվում են Վ.Շիրխանյանի առողջական վիճակին, նրան ցուցաբերվող բժշկական օգնությանը, ինչպես նաև հարց է ներկայացված առ այն, թե ի՞նչ հիմքերով է պետությունը ցանկանում նրան տեղափոխել «Արմավիր» ՔԿՀ: Ընդ որում, կառավարությունից պահանջել են Վահան Շիրխանյանի բոլոր բժշկական փաստաթղթերը, այն, ինչ քրեակատարողական հիմնարկն ամեն գնով փորձում էր չտալ սկզբում պաշտպանին, ապա նաև Վ.Շիրխանյանի գործը քննող դատարանին:

Հայկ Ալումյանն ընդգծեց, որ փետրվարի 9-ին Հայաստանի Հանրապետությունն արդեն ստացել է ՄԻԵԴ այս պահանջը էլեկտրոնային փոստի միջոցով, և արդեն փետրվարի 11-ին Վ.Շիրխանյանի նկատմամբ լրացուցիչ ռեպրեսիաներ են սկսվել, այսինքն՝ հիմա անգամ նրա պաշտպանը չի կարող նրան տեսակցել:

Ի պատասխան լրագրողի հարցի՝ Հայկ Ալումյանը նշեց, որ որքան իրեն հայտնի է, Վ.Շիրխանյանին «Արմավիր» ՔԿՀ տեղափոխելու որոշում դեռևս չի ընդունվել, բայց միջնորդությունն արդեն մոտ մեկ շաբաթ ՔԿՀ-ի կողմից ներկայացված է:

«Ինչպես տեսնում եք, դա Եվրոպական դատարանին նույնպես մտահոգել է, որովհետև կառավարությանը ներկայացված հինգերորդ հարցը վերաբերվում է հենց այդ տեղափոխմանը»,- ասաց Հայկ Ալումյանը՝ հավելելով, որ իրենք Վ.Շիրխանյանի գործի առաջիկա դատական նիստից շատ ակնկալիքներ չունեն:

«Մենք հասկանում ենք, որ պրն. Շիրխանյանի առողջական վիճակը իրեն հերթական անգամ հնարավորություն չի տալու ներկայանալ դատարան և հերթական անգամ մեզ ասելու են, որ ոչ մի հնարավորություն չունեն պրն. Շիրխանյանին պատգարակով կամ սայլակով բերելու դատարան»:

Փաստաբանը նշեց նաև, որ այդ անելանելի վիճակից առայժմ ինքը ելք չի տեսնում: Այդ ամեն ինչին գումարվում է նաև այն, որ անգամ դատարանի պահանջով բժշկական փաստաթղթերը չեն ներկայացվում, իսկ առանց բժշկական փաստաթղթերի դատարանը չի կարողանում պարզել, թե Վ.Շիրխանյանը կարո՞ղ է ներկայանալ դատարան, թե՞ ոչ: «Այս պահին մեր միակ հույսը, որ այս իրավիճակից հնարավոր կլինի դուրս գալ, մնում է Եվրոպական դատարանը, բարեբախտաբար Եվրոպական դատարանն արդեն անցել է ակտիվ գործողությունների»,- ասաց Հայկ Ալումյանը:

Աղբյուր` Փաստինֆո