Փաստ ինֆո

Հանցավոր համագործակցության վերաբերյալ աղմկահարույց գործով այսօրվա դատական նիստը նորից տեղի չունեցավ. ինչպես և նախորդ երեք դատական նիստերին, չէր ներկայացվել գործով ամբաստանյալ, ՀՀ նախկին փոխվարչապետ ու պաշտպանության նախկին փոխնախարար Վահան Շիրխանյանը: 

Ըստ Երևան-Կենտրոն ՔԿՀ-ից ստացված գրության, Վահան Շիրխանյանը հրաժարվել է դուրս գալ իր խցից և ուղեկցվել դատարան՝ դատական նիստին:

ՔԿՀ-ից տեղեկացրել են նաև, որ հիմնարկ մուտք գործելիս էլ Վահան Շիրխանյանը ունեցել է առողջական խնդիրներ: Ամբաստանյալին, ըստ ՔԿՀ տեղեկանքի, չի նշանակվել անկողնային ռեժիմ, նա ստացիոնար բուժման կարիք չունի, նշանակվել է դեղորայքային բուժում:

Ըստ ՔԿՀ տեղեկանքի, երկու հատորից՝ 179 էջից, կազմված Վ.Շիրխանյանի բժշկական քարտից քաղվածքներ կատարել իրենք չեն հասցրել, ուստի դատարան են ուղարկվել բժշկական այլ փաստաթղթերի լուսապատճեններ՝ 33 թերթ կազմող:

Մեղադրող կողմը հայտարարեց, որ Վահան Շիրխանյանի արգելանքի տակ գտնվելու ընթացքում նրա առողջության պահպանման իրավունքը չի խախտվել, նրան բժշկական օգնություն է ցուցաբերվել և կատարվել են հետազոտություններ, առողջությունը գտնվում է բավարար վիճակում: Ըստ մեղադրողների, Վահան Շիրխանյանն արդեն չորրորդ անգամ առանց հարգելի պատճառների չարամտորեն խուսափում է դատական նիստին ներկայանալ, դրսևորում է անհարգալից վերաբերմունք դատարանի հանդեպ: Մեղադրողները գտնում են, որ ամբաստանյալի նկատմամբ դատական սանկցիա պետք է կիրառվի, հաջորդ դատական նիստում պետք է ապահովվի նրա մասնակցությունը՝ չխախտելու համար նաև այլ ամբաստանյալների ողջամիտ ժամկետում գործը քննելու իրավունքը:

Վահան Շիրխանյանի պաշտպան, փաստաբան Հայկ Ալումյանը հայտարարեց, որ Քրեակատարողական հիմնարկն է անհարգալից վերաբերմունք ցույց տալիս դատարանի հանդեպ, այլ ոչ թե Վահան Շիրխանյանը: Պաշտպանը պարզաբանեց, որ նախորդ դատական նիստին դատարանը որոշում է կայացրել ամբաստանյալի բոլոր բժշկական փաստաթղթերի պատճենները քրեակատարողական հիմնարկից պահանջելու մասին, սակայն ՔԿՀ-ն՝ չկատարելով դատարանի պահանջն, ընդամենը ասում է՝ ծավալը մեծ է, չենք հասցնում քաղվածքներ անել, և «հանդգնում է բժշկական փաստաթղթերը դատարանին չտալ»:

Հայկ Ալումյանն ընդգծեց, որ ՔԿՀ-ն երրորդ անգամ սուտ տեղեկություններ է հաղորդում Վահան Շիրխանյանի առողջական վիճակի մասին:

Փաստաբանը հակառակի մասին վկայող՝ նյարդաբան Բաբաջանյանի կոնսուլտացիայի արդյունքում կազմված բժշկական փաստաթուղթ ներկայացրեց, ըստ որի՝ ելնելով բացասական դինամիկայից՝ ցուցված է հիվանդի բուժումը կազմակերպել ստացիոնար պայմաններում:

Հայկ Ալումյանը պնդեց իր միջնորդությունը բոլոր բժշկական փաստաթղթերը պահանջելու մասին՝ «բոլոր բժշկական փաստաթղթերն՝ առանց բանտապետի մեկնաբանությունների, դատարանը հետևություններ կանի»:

Պաշտպանը հրապարակեց Վահան Շիրխանյանի նամակն, որում վերջինս հայտնում էր, որ մեկուսարանում ինքը 17 տեսակի 4000 հաբեր է ընդունել, սակայն այսօրվա դրությամբ զրկված է տեղաշարժվելու ու ուղիղ նստելու հնարավորությունից: Շիրխանյանը հայտնում է, որ հունվարի 25-ից դադարեցրել է բոլոր դեղերի ընդունումը: Ամբաստանյալը նամակում նշում է նաև, որ ցանկանում է մասնակցել դատավարությանը, որի ընթացքում կապացուցվի, որ իր դեմ բոլոր մեղադրանքները շինծու են: Ընդգծելով, որ առողջ մարդուն հաշմանդամ են դարձրել, Վահան Շիրխանյանը նշել է, որ դատական նիստին կարող է մասնակցել պառկած կամ կիսապառկած վիճակում:

Այլ ամբաստանյալի պաշտպան, փաստաբան Հովիկ Արսենյանը դժգոհություն հայտնեց դատական նիստի հերթական հետաձգնան հետ կապված՝ կալանավորը գտնվում է դատարանի հաշվին, ուստի դատարանը պետք է շահագրգռված լինի, որ բերի ամբաստանյալին: Դատարանը առաջարկեց պաշտպանին ցույց տալ օրենքի այն նորմը, որով դատարանը կարող է բերման ենթարկել կալանքի մեջ գտնվող ամբաստանյալին, ինչին ի պատասխան պաշտպանը հակադարձեց՝ թող թևերի վրա բերեն, տեսեք ինչ ուժեղ տղերք են՝ ուղեկցող դասակի անդամներին ի նկատի ունենալով:

Հ.Արսենյանն՝ անդրադառնալով մեղադրողի հայտարարությանը նկատեց, մեղադրողը քիչ էր մնում ևս մի քանի մեղադրանք ավելացներ: Եթե ինչպես նշվում է, ամբաստանյալը առողջ է, ուրեմն ապահովեք նրա մասնակցությունը դատական նիստին, որպեսզի չխախտվեն նաև մյուս ամբաստանյալների իրավունքները, ասաց պաշտպանը:

Լուսանկարը՝ Ֆոտոլուրի

Աղբյուր` Փաստինֆո