Փաստ ինֆո

ՀՀ նախկին փոխվարչապետ և պաշտպանության նախկին փոխնախարար Վահան Շիրխանյանի պաշտպան Հայկ Ալումյանն այսօրվա ասուլիսում ահազանգել էր իր պաշտպանյալի ծայրահեղ ծանր վիճակում գտնվելու մասին, որին հետևել էր ՀՀ արդարադատության նախարարության հայտարարությունը հակառակի մասին:

«Փաստինֆո»-ի լրագրողի խնդրանքով հայտարարությունը մեկնաբանեց փաստաբան Հայլ Ալումյանը: Մասնավորապես, ՀՀ առողջապահության նախարարության գլխավոր նեղ մասնագետների մասնակցությամբ նոյեմբերի 18-ին հրավիրված բժշկական կոնսիլիումի հանգած այն եզրահանգման վերաբերյալ, թե Վահան Շիրխանյանը ստացիոնար բուժման կարիք չունի, Հայկ Ալումյանը նշեց հետևյալը.

«Ասուլիսի ժամանակ հնչեցված իմ գլխավոր միտքն եղել է այն, որ Վահան Շիրխանյանին պետության կողմից չի ցուցաբերվում անհրաժեշտ բժշկական օգնություն, որի սուր կարիքն այս պահին ինքը զգում է: Մենք մեղադրում ենք պետությանը՝ ի դեմս պաշտոնատար անձանց, այն բանում, որ խախտվել է Վ.Շիրխանյանի առողջության պահպանման իրավունքը, ավելին՝ Մարդու իրավունքների եվրոպական կոնվենցիայի երրորդ հոդվածով՝ խոշտանգումների արգելում, ամրագրված նրա իրավունքը»:

Հայկ Ալումյանը նշեց, որ նախքան իր այդ հայտարարությունը, դեռևս նոյեմբերի 10-ին, նույնպիսի եզրահանգման էր եկել նաև ՀՀ մարդու իրավունքների պաշտպանը իր ընդունած որոշման մեջ:

Ի՞նչ է հակադրում սրան արդարադատության նախարարությունը՝ բժշկական կոնսիլիումին մասնակցած 4 բժիշկների՝ ՀՀ առողջապահության նախարարության գլխավոր նյարդաբանի, գլխավոր անոթաբանի, գլխավոր թերապևտի և գլխավոր սրտաբանի, կարծիքը, այն բժիշկների, որոնց պետության կողմից որոշակի արտոնյալ լիազորություններ են վերապահվել, որոնց առողջապահության նախարարի հրամաններով պաշտոններ ու կոչումներ են շնորհվել և ովքեր համագործակցում են պետության հետ:

Նույնը կլիներ, նշեց Հայկ Ալումյանը, եթե արդարադատության նախարարը փաստաբանների խմբից ընտրեր մեկին, ում շնորհեր ՀՀ գլխավոր փաստաբան կոչումը և նրա միջոցով հերքեր որևէ այլ փաստաբանի հայտարարությունը:

Բժիշկների պաշտոնները (ՀՀ առողջապահության նախարարության գլխավոր նյարդաբանի, գլխավոր անոթաբանի, գլխավոր թերապևտի և գլխավոր սրտաբանի) ոչ թե ավելացնում են հավատը նրանց կարծիքի նկատմամբ, այլ ստիպում են մտածել, որ իրենք հակված են պաշտպանելու պետության դիրքորոշումը, որն իրենց պաշտոններ ու կոչումներ է շնորհել: «Ես շատ ավելի կվստահեի մի որևէ հիվանդանոցի շարքային բժշկի կարծիքին: Թեև այս դեպքում որևէ մեկի կարծիքը չի կարող որոշիչ լինել, որովհետև ես իմ աչքով եմ տեսնում, թե ինչպես է սրընթաց վատանում Վ.Շիրխանյանի առողջական վիճակը»:

Ըստ Հայկ Ալումյանի, հետաքրքիր է նաև Արդարադատության նախարարության հերքման այն հատվածը, որ նույն այդ բժիշկները միաժամանակ առաջարկել են կատարել մի շարք լրացուցիչ հետազոտություններ: «Այդ դեպքում ավելի տրամաբանական կլիներ ձեռնպահ մնալ Վ.Շիրխանյանի առողջական վիճակի մասին լավատեսական եզրահանգումներից մինչև այդ հետազոտությունների կատարումը», - ասաց նա:

Իսկ ինչ վերաբերվում է արդարադատության նախարարության այն հորդորին, թե փաստաբանը պետք է իր մասնագիտությամբ զբաղվի, այլ ոչ թե բժշկությամբ, ապա Հայկ Ալումյանը հիշեցրեց, որ Եվրոպական կոնվենցիայի 3-րդ հոդվածի խախտումը դա հենց փաստաբանին վերաբերող հարց է: «Վատ է, որ այս մասին արդարադատության նախարարությունն իր պատասխանը գրելու պահի դրությամբ դեռ տեղյակ չէր»,- հավելեց Հայկ Ալումյանը:

Աղբյուր` Փաստինֆո