Փաստ ինֆո

ԱՄՆ նախկին նախագահ Բարաք Օբամայի ավագ դուստրը՝ Մալիան, միացել է Dakota Access նավթատարի շինարարության դեմ բողոքներին: Այս մասին հաղորդում է Daily Mail-ը:

Շաբաթվա սկզբին նա այցելել է Յուտայում ամենամյա Sundance կինոփառատոն, որտեղ ակցիայի հարյուրավոր այլ մասնակիցների հետ միասին բողոքել է ներկայիս ամերիկյան առաջնորդ Դոնալդ Թրամփի կողմից խողովակաշարի շինարարությունը վերսկսելու մասին հրամանագրերի ստորագրման դեմ, գրում է պարբերականը:

Ըստ ամերիկացի դերասանուհի Շեյլին Վուդլիի, ինքը զարմացել է, երբ տեսել է ինքնուրույն հանրահավաքին եկած Մալիային: Ինչպես նշել է Վուդլին, նախագահության ժամանակ Բարաք Օբաման բավականաչափ ջանքեր չի գործադրել նավթատարի շինարարությունը լրիվ կանգնեցնելու համար:

Ավելի վաղ Թրամփը հրամանագիր է ստորագրել երկու նավթատարների՝ Keystone և Dakota Access, շինարարության նախագծի վերսկսման մասին, որոնցից ավելի վաղ նրա նախորդը հրաժարվել էր:

Հյուսիսային Դակոտայում Dakota Access-ի շինարարության դեմ հանդես եկող ակտիվիստները մտավախություն ունեն, որ այդ նախագիծը բացասաբար կանդրադառնա խմելու ջրի որակի վրա և կհանգեցնի «հնդկացիների սրբազան հողերի պղծմանը»: Երթուղին անցնում է Հյուսիսային ու Հարավային Դակոտայի, Այովա և Իլլինոյս նահանգների տարածքով:

2016թ. դեկտեմբերին ԱՄՆ իշխանություններն ընդառաջել են բազում ամիսներ տևած բողոքներին և համաձայնել են վերանայել խողովակաշարի երթուղին: Բողոքների ընթացքում ընդհանուր առմամբ ձերբակալվել, ապա բաց է թողնվել մոտ 600 մարդ:

Աղբյուր` Փաստինֆո