Փաստ ինֆո

Լեռնային Ղարաբաղի ժողովուրդը հիանալի հիշում է խնդիրը Արցախի բնակչությանը ֆիզիկական ոչնչացման ճանապարհով «լուծելու» Ադրբեջանի իշխանությունների փորձը։

Այս մասին ասել է ԼՂՀ նախագահի մամուլի խոսնակ Դավիթ Բաբայանը՝  NEWS.am–ի խնդրանքով մեկնաբանելով Ադրբեջանի ԱԳ նախարար էլմար Մամեդյարովի հայտարարությունը, թե կարգավիճակի հարցը չի կարելի դիտարկել «բանակցությունների նախնական փուլում»։

«Հայկական մշակույթում կա հարսանիքներին տարոսիկներ բաժանելու ավանդույթ։ Այնպիսի տպավորություն է, որ Ադրբեջանում այդ տարոսիկները դրել են քաղաքական մշակույթի հիմքում. իշխանական գործիչները փոխվում են, բայց ցանկությունները նույնն են մնում»,– նշել է Դավիթ Բաբայանը՝ հավելելով, որ Մամեդյարովի  վերջին հայտարարությունը ցուցադրում է, որ Ադրբեջանում չեն էլ մտածում ագրեսիվ եւ ֆաշիստական հռետորաբանությունից հրաժարվելու մասին։

«Երբ մենք ասում ենք, որ դեպի անցյալ վերադարձ չկա, այդ թվում՝ սահմանների առումով, մենք դա չենք ասում ի հեճուկս Բաքվի հայտարարությունների։ Եղել է նախադեպ, երբ Ադրբեջանը փորձել է ֆիզիկապես բնաջնջել Լեռնային Ղարաբաղը, եւ դա ոչ թե 100-200 տարի առաջ էր, այլ 25՝ սկսած 1988 թվականից։ Չէ՞ որ այն ժամանակ էլ Լեռնային Ղարաբաղը ինքնավար մարզ էր։ Եվ ինչպիսի՞ն եղան Բաքվի գործողությունները։ Ցեղասպանություն Բաքվում, Կիրովաբադում, Սումգայիթում, Հյուսիսային Արցախի օկուպացիան եւ Լեռնային Ղարաբաղի հայ բնակչության մասնակի վտարումը, հետո մեծամասշտաբ պատերազմը, Բուդապեշտում ցեղասպան գործողությունները (հայ սպայի կացնահարումը խմբ.)։ Հիմա փորձում են մեզ պարտադրել ագրեսիվ, վայրագ պլանները։ Կարծում եմ, որ Ադրբեջանի իշխանությունները պետք է ազատվեն վատ տարոսիկներից, որպեսզի, ինչպես կասեր դասականը, «գործընթացը սկսվի»,– ասել է Դավիթ Բաբայանը։

Լուսանկարը՝ Armenpress-ի

Աղբյուր` Փաստինֆո